Koj Puas Xav Paub Ntxiv Txog Phau Vajlugkub?
Vim Li Cas Thiaj Li Nyeem Phau Vajlugkub?
PHAU VAJLUGKUB tsis zoo li lwm phau ntawv—nws muaj Vajtswv tej kev cob qhia zoo heev. (1 Thexalaunika 2:13) Yog tias koj ua raws li tej lus qhia hauv phau Vajlugkub yuav muaj nqes heev. Koj yuav muaj kev hlub ntxiv rau Vajtswv thiab yuav txav ze rau nws, tus uas muab “txhua yam uas zoo kawg nkaus” pub rau peb. (Yakaunpau 1:17) Koj yuav kawm kom paub txav los cuag Vajtswv ntawm txojkev thov nws. Thaum lub caij muaj kev nyuaj siab, koj muaj peevxwm tau txais Vajtswv txojkev pab. Yog tias koj ua lub neej raws li tej kevcai hauv phau Vajlugkub, Vajtswv yuav pub txojsia ntev dhawv mus ib txhis rau koj.—Loos 6:23.
Phau Vajlugkub muaj tej lus tseeb uas qhia txog tej tswvyim zoo. Cov uas kawm paub phau Vajlugkub yuav dim tej tswvyim cuav uas kav ntau plhom tus tib neeg. Piv txwv li no, thaum paub qhov tseeb txog tej yam uas muaj tshwm sim tom qab peb tuag, yuav tso peb dim ntawm txojkev uas ntshai tej neeg tuag tias tsam lawv yuav rov los ua mob rau peb, lossis peb tej phoojywg thiab tej txheeb ze uas tau tuag lawm ho raug kev tsim txom. (Exekhee 18:4) Tej lus qhia hauv phau Vajlugkub hais txog txojkev sawv hauv qhov tuag rov qab los, yuav nplig tau txhua tus uas muaj cov neeg tau tuag lawm lub siab. (Yauhas 11:25) Thaum peb paub qhov tseeb txog cov tubtxib phem yuav ceeb toom rau peb txog tej kev phem uas los ntawm txojkev teev dab, thiab pab peb to taub tias vim li cas hauv lub ntiajteb no yuav muaj teeb meem ntau ua luaj li.
Vajtswv tej kevcai hauv phau Vajlugkub qhia kom peb paub ua lub neej noj qab nyob zoo. Piv txwv li no, yog peb paub “xyuam xim” lossis tswj peb tus kheej ces yuav pab tau peb noj qab haus huv. (1 Timaute 3:2) Thaum peb ‘ntxuav peb tus kheej kom dawb huv ntawm txhua yam kev phem kev qias ntawm sab nqaij tawv thiab txojkev xav,’ ces peb yuav zam dhau tej kev mob kev nkeeg. (2 Khaulee 7:1) Yog peb ua raws li Vajtswv tej lus ntuas hauv phau Vajlugkub, yuav pab tau peb txojkev txij nkawm muaj kev zoo siab thiab saib taus peb tus kheej.—1 Khaulee 6:18.
Yog tias koj coj raws li Vajtswv Txojlus, koj yuav ua tau ib tug neeg muaj kev zoo siab dua. Thaum peb paub tej lus hauv phau Vajlugkub yuav pab tau peb muaj lub siab tus, muaj kev txaus siab, thiab muaj kev cia siab. Phau Vajlugkub pab peb muaj tej yeeb yam zoo xws li muaj lub siab khuvleej, muaj kev hlub, muaj kev xyiv fab, muaj lub siab tus, muaj lub siab dawb siab zoo, thiab muaj kev ntseeg. (Kalatia 5:22, 23; Efexau 4:24, 32) Cov yeeb yam zoo li no, pab tau peb ua tau ib tug txiv zoo lossis ib tug pojniam zoo, ua tau ib leej txiv zoo lossis ib leej niam zoo, ua tau ib tug tub zoo lossis ib tug ntxhais zoo.
Koj puas tau xav txog lub neej yav tom hauv ntej? Tej lus faj lem hauv phau Vajlugkub qhia tias peb nyob rau lub caij twg lawm. Tsis yog tej lus faj lem no yuav piav txog tej yam uas muaj nyob rau hauv lub ntiajteb niaj hnub no xwb, tiamsis kuj qhia txog tias tsis ntev tom ntej no Vajtswv yuav muab lub ntiajteb hloov ua ib lub vaj kaj siab.—Qhia Tshwm 21:3, 4.
Pab Kom To Taub Phau Vajlugkub
Tej zaum koj twb nyeem phau Vajlugkub lawm, tiamsis nyuaj heev rau koj to taub. Lossis tej zaum koj yuav tsis paub mus nrhiav hauv phau Vajlugkub los teb koj tej lus nug. Yog muaj li ntawd, tsis yog koj ib leeg xwb. Peb txhua tus yuav tsum tau kev pab thiaj li to taub Vajtswv Txojlus. Yehauvas cov Timkhawv qhia Vajlugkub pub dawb rau ntau plhom tus neeg, tshaj li 235 lub tebchaws. Lawv yuav zoo siab pab koj thiab.
Qhov uas yuav kawm tau Vajlugkub zoo zuj zus, mas yog pib kawm lub hauv paus ua ntej. (Henplais 6:1) Yog koj kawm ntxiv mus, koj yuav noj taus “tej zaub mov tawv”—uas yog paub tob txog qhov tseeb. (Henplais 5:14) Phau Vajlugkub yog lub hauv paus pib kawm. Tej ntaub ntawv uas los ntawm phau Vajlugkub, uas zoo li phau Vajtswv Xav Kom Peb Yuav Tsum Ua Dabtsi?, yuav pab tau koj to taub ntau lub ntsiab txog tej lus hauv phau Vajlugkub.
Koj Puas Txaus Siab Siv Sijhawm Txhua Lub Lim Tiam Los Kawm Kom To Taub Phau Vajlugkub?
Yog tias koj kawm Vajlugkub, yuav tau teem ib lub sijhawm thiab ib qho chaw kom haum rau koj. Coob leej kawm Vajlugkub nyob rau hauv lawv tej tsev. Muaj ib txhia kawm hauv xov tooj. Qhov kev kawm Vajlugkub no, tsis yog qhia rau ib pab neeg, tiamsis yog qhia rau koj tus kheej thiab qhia kom yoojyim raws li koj paub xwb. Yuav tsis muaj kev sib tw, thiab yuav tsis ua rau koj txaj muag. Yuav teb tau koj tej lus nug txog phau Vajlugkub thiab koj yuav kawm kom paub txav ze rau ntawm Vajtswv.
Koj yuav tsis tau them nqe rau qhov kev kawm Vajlugkub no. (Mathais 10:8) Yog qhia pub dawb rau txhua tus, cov uas coj kev ntseeg thiab cov uas tsis coj kev ntseeg tibsi, tsuas yog lawv muaj lub siab xav kawm kom paub Vajtswv Txojlus tiag tiag.
Leejtwg yuav los koom tau nrog txojkev kawm no thiab? Tag nrho koj tsev neeg. Koj yuav caw tus phoojywg twg tuaj kawm los yeej tau thiab. Lossis yog tias koj nyiam kawm koj tib leeg xwb los yeej tau.
Muaj coob leej teem caij los kawm Vajlugkub, ib lub lim tiam kawm ib txoos teev. Txawm koj muaj sijhawm ntau lossis tsawg, cov Timkhawv yuav zoo siab tuaj pab koj.
Caw Koj Los Kawm
Peb xav kom koj nrhiav Yehauvas cov Timkhawv. Qhov uas koj yuav nrhiav tau lawv yog koj sau ntawv mus rau ib qho chaw nram qab no. Lawv yuav xa ib tug neeg tuaj qhia Vajlugkub pub dawb rau koj.
□ Kuv xav tau phau ntawv, Vajtswv Xav Kom Peb Yuav Tsum Ua Dabtsi?
□ Thov xa ib tug tuaj qhia Vajlugkub pub dawb rau kuv.
Yog tias tsis pom qhia, cov nqe Vajlugkub uas sau cia rau hauv daim ntawv no yog los ntawm phau Vajtswv Txojlus Txhais Tshiab Xyoo 2004.