Kev Kawm Vajlugkub Nrog Yehauvas Cov Tim Khawv Zoo Li Cas?
Yehauvas Cov Tim Khawv yuav pab koj kawm Vajlugkub kom koj paub tias phau Vajlugkub qhia li cas. Txoj kev kawm no yuav pab koj:
Lub neej muaj kev kaj siab
Ua Vajtswv tus phooj ywg
To taub Vajtswv tej lus cog tseg rau yav tom ntej
Hauv no qhia ntxiv tias
Yog kuv kawm, puas yog kuv yuav tsum los ua Yehauvas ib tug Tim Khawv?
Yog Yehauvas Cov Tim Khawv twb qhia Vajlugkub rau kuv dua los lawm, kuv puas rov kawm tau?
Yog kuv tsis xav kom ib tug tuaj qhia kuv, puas muaj lwm txoj hau kev kawm Vajlugkub?
Kev kawm Vajlugkub zoo li cas?
Yuav muaj ib tug tuaj qhia ib qho zuj zus hauv phau Vajlugkub rau koj. Nws yuav siv phau ntawv Nyob Kaj Siab Lug Mus Ib Txhis los pab koj to taub phau Vajlugkub. Tej koj kawm yuav pab tau koj lub neej. Yog xav paub seb yuav kawm li cas, saib zaj yeeb yaj kiab no.
Yog kuv kawm kuv puas them nyiaj?
Tsis them. Yehauvas Cov Tim Khawv ua raws li Yexus cov lus uas hais tias: “Vajtswv pub dawb dawb rau nej mas nej cia li pub dawb dawb rau lwm tus.” (Mathais 10:8) Nej yuav tsis tau them ib npib ib xus rau cov ntaub ntawv uas yuav siv los kawm xws li, phau Vajlugkub thiab phau Nyob Kaj Siab Lug Mus Ib Txhis.
Ib zaug twg kawm ntev li cas?
Nyob ntawm seb koj xav kawm ntev li cas xwb. Phau ntawv muaj 60 zaj kawm. Ib lub lim tiam twg, tej tug nyiam kawm ib los sis ob peb zaj.
Yog kuv xav kawm kuv yuav ua li cas?
1. Rau npe kawm hauv lub vej xaij. Yog koj rau npe kawm Vajlugkub, peb tsuas hais kom Yehauvas ib tug Tim Khawv tuaj ntsib los sis hu koj xwb. Peb yuav tsis siv koj lub npe, chaw nyob thiab xov tooj mus ua lwm yam.
2. Ib tug mam hu los sis tuaj xyuas koj. Tus uas yuav qhia Vajlugkub rau koj mam piav seb neb yuav kawm li cas, thiab yog koj muaj lus nug li cas los kav tsij nug nws.
3. Neb mam teem sij hawm kawm. Yog neb tuaj sib ntsib kawm los yeej tau, sau ntawv, sau e-mail, hu xov tooj, tso koob yees duab kawm los yeej tau thiab. Feem coob siv li ib txoos teev los kawm, tiam sis yog xav kawm ntev kawm luv los nyob ntawm koj khoom.
Kuv sim puas tau seb kuv puas nyiam tso?
Tau kawg. Yog xav sim, rau npe kawm hauv lub vej xaij. Thaum Yehauvas Cov Tim Khawv ib tug hu los sis tuaj ntsib koj, qhia rau nws tias koj xav sim seb koj puas nyiam tso. Nws yuav muab phau Nyob Kaj Siab Lug Mus Ib Txhis uas muaj peb zaj kawm los qhia seb koj puas nyiam tiag.
Yog kuv kawm, puas yog kuv yuav tsum los ua Yehauvas ib tug Tim Khawv?
Qhov ntawd nyob ntawm koj xwb. Yehauvas Cov Tim Khawv nyiam qhia Vajlugkub rau txhua tus, tiam sis lawv yuav tsis yuam leej twg los koom lawv txoj kev ntseeg. Lawv tsuas qhia li phau Vajlugkub qhia xwb. Txhua tus nyias muaj cai xaiv nyias txoj kev ntseeg.—1 Petus 3:15.
Kuv siv puas tau kuv phau Vajlugkub los kawm?
Tau kawg. Koj xav siv phau Vajlugkub twg los yeej tau tag. Peb nyiam siv phau Vajtswv Txoj Lus Rau Cov Nyob Lub Qab Ntuj Tshiab vim phau no txhais raug dua thiab yooj yim to taub. Tiam sis peb yeej nkag siab tias txhua tus nyias nyiam siv phau uas nyias ib txwm siv.
Kuv caw puas tau lwm tus tuaj nrog kuv kawm?
Tau kawg. Yog koj caw tag nrho koj tsev neeg thiab tej phooj ywg tuaj nrog koj kawm los yeej tau.
Yog Yehauvas Cov Tim Khawv twb qhia Vajlugkub rau kuv dua los lawm, kuv puas rov kawm tau?
Yeej tau xwb. Tej zaum koj tseem yuav nyiam kawm dua yav tas los vim peb tej ntaub ntawv hloov lawm ntau. Niam no tej ntaub ntawv uas peb siv los qhia, muaj tej duab tej yeeb yaj kiab uas pab tau tib neeg raws lub caij lub nyoog.
Yog kuv tsis xav kom ib tug tuaj qhia kuv, puas muaj lwm txoj hau kev kawm Vajlugkub?
Yeej muaj. Coob tus yeej kawm tau zoo dua yog muaj ib tug tuaj qhia kiag lawv, tiam sis ib txhia nyiam kawm lawv tus kheej ua ntej tso. Peb muaj tej Twj Kawm Vajlugkub dawb uas yuav pab tau koj kawm Vajlugkub. Tej yam hauv no yuav pab tau koj thiab:
Kawm Vajlugkub Hauv Is Taws Nej.a Tej zaj kawm no yuav qhia txog tej uas tib neeg ib txwm xav paub, xws li: Vajtswv yog leej twg? Vim li cas ho muaj kev phem kev lim hiam? Ua li cas peb thiaj raug kev txom nyem? Puas muaj hnub uas Vajtswv yuav rhuav tshem kev txom nyem?
Yeeb Yaj Kiab Vajlugkub. Tej zaj yeeb yaj kiab luv luv hauv no piav txog tej lus qhia tseem ceeb hauv phau Vajlugkub.
Lus Nug Thiab Lus Teb Txog Phau Vajlugkub. Cov ntaub ntawv no qhia ntau tsav ntau yam txog phau Vajlugkub.
a Tam sim no peb tsis tau muaj qhov kawm Vajlugkub hauv Is Taws Nej ua lus Hmoob. Tsuas muaj ua lwm yam lus xwb.