Leejtwg Pab Nyiaj Los Ua Tes Haujlwm No?

Txhua txhua xyoo, peb lub koom haum luam thiab tseb tawm ntau plhom phau Vajlugkub thiab lwm yam ntaub ntawv mus pub dawb rau sawvdaws tau nyeem. Peb kuj tsim tsa thiab kho tej Tsev Nceeg Vaj thiab tej tsev Npe-ee nyob rau ntau ceg. Peb yug ntau txhiab leej uas ua haujlwm hauv Npe-ee thiab yug cov tubtxib tshaj tawm txawv tebchaws. Peb kuj muaj kev pab rau cov uas raug xwm txheej huab cua phem. Tej zaum koj yuav xav tias, ‘Peb muab nyiaj qhovtwg los ua tej haujlwm no?’

Peb tsis sau nyiaj ib feem kaum, thiab tsis sau nqe. Tes haujlwm tshaj tawm txoj xov zoo yeej yuav siv nyiaj txiag ntau thiaj tiav. Tiamsis peb yeej tsis thov nyiaj los ntawm lwm tus. Tau 100 tawm xyoo dhau los, thaum nyuam qhuav luam Phau Tsom Faj, cov kwvtij twb sau tseg tias peb tso siab plhuav rau Yehauvas ua tus txhawb tes haujlwm no. Peb yeej yuav tsis “thov khawv lossis taij thov kom neeg pab peb.” Peb tau ua raws nkaus li cov lus ntawd los txog niaj hnub nimno!​—Mathai 10:8.

Muaj cov nyiaj siab dawb los txhawb peb tes haujlwm. Coob leej ntau tus txaus siab rau peb tes haujlwm qhia Vajlugkub, lawv thiaj pub nyiaj siab dawb los pab peb. Cov Timkhawv kuj zoo siab hlo pub lawv lub sijhawm, dag zog, thiab qhov txhia chaw, los pab ua Vajtswv tes dej num thoob ntiajteb. (1 Vaj Keeb Kwm 29:9) Yog tias xav pab nyiaj siab dawb, muaj ib co thawv los tso nyiaj nyob hauv lub Tsev Nceeg Vaj, thiab tom cov rooj sib txoos 1 hnub thiab cov rooj sib txoos 3 hnub, lossis mus rau hauv peb lub vej xaij, jw.org. Cov kwvtij nkauj muam uas tau pab nyiaj, feem coob tsis yog neeg nplua nuj. Tiamsis lawv zoo ib yam li tus poj ntsuam uas Yexus hais txog, uas tau tso 2 lub nyiaj me me hauv lub tuam tsev. (Luka 21:1-4) Yog li ntawd, txhua tus tsis hais tus muaj ntau muaj tsawg, puavleej muaj peevxwm “khaws tej nyiaj ib qho cia” es ‘muab raws li nws twb xav tseg hauv lub siab lawm.’​—1 Khaulee 16:2; 2 Khaulee 9:7.

Peb paub tseeb tias Yehauvas yeej yuav siv cov tibneeg uas xav ‘muab lawv tej qhov txhia chaw xyeem rau nws,’ los txhawb nws lub Nceeg Vaj ntxiv mus, kom thiaj muaj raws li nws lub siab nyiam.​—Paj Lug 3:9.

• Ua li cas peb lub koom haum ho txawv ntawm lwm txojkev ntseeg?

• Cov kwvtij muab cov nyiaj siab dawb siv li cas?