Yehauvas Hu Xamuyee

Tus Pov Thawj Hlob Eli muaj 2 tug tub hu ua Hauni thiab Fineha. Nkawd ua pov thawj hauv Vajtswv lub tsev ntaub sib ntsib. Nkawd tsis coj raws li Yehauvas tej kevcai thiab ua limhiam heev rau Yehauvas cov tibneeg. Thaum cov Yixayee coj tsiaj tuaj xyeem rau Yehauvas, nkawd xaiv tej nqaij uas zoo nqa mus noj lawm. Eli yeej paub txog tej uas nkawd ua tiamsis nws tsis qhuab ntuas nkawd li. Yehauvas yuav ua li cas xwb?

Txawm tias Xamuyee tseem yau dua Hauni thiab Fineha los nws tsis coj li nkawd. Yehauvas thiaj txaus siab rau Xamuyee. Muaj ib hmos thaum Xamuyee tseem pw, nws hnov ib lub suab hu. Nws txawm sawv tsees dhia mus cuag Eli thiab hais tias: ‘Kuv nyob ntawm no os!’ Eli hais rau nws tias: ‘Kuv tsis tau hu koj. Cia li rov mus pw.’ Xamuyee thiaj rov qab mus pw. Xamuyee rov hnov lub suab hu nws dua. Nws mus cuag Eli ib yam nkaus tiamsis zaum 3, Eli mam paub tias yog Yehauvas hu Xamuyee ntag. Eli thiaj hais rau Xamuyee tias yog nws hnov lub suab hu dua, nws yuav tsum teb tias: ‘Yehauvas, thov koj muaj lus li cas, cia li hais. Koj tus tub qhe tabtom mloog.’

Xamuyee txawm rov qab mus pw. Xamuyee rov hnov lub suab hu tias: ‘Xamuyee! Xamuyee!’ Ces Xamuyee teb tias: ‘Thov koj cia li hais, koj tus tub qhe tabtom mloog.’ Yehauvas hais rau nws tias: ‘Kuv yuav txiav txim rau Eli thiab nws tsev neeg. Nws twb paub lawm tias nws 2 tug tub ua txhaum loj heev rau kuv lub tsev ntaub los nws twb tsis qhuab ntuas nkawd li.’ Thaum kaj ntug, Xamuyee mus qheb tej qhov rooj tsev ntaub li nws ib txwm qheb. Nws ntshai tsis kav hais rau tus pov thawj hlob txog tej uas Yehauvas tau hais. Eli thiaj hu Xamuyee los thiab nug tias: ‘Kuv tus tub, Yehauvas tau hais li cas rau koj? Cia li hais rau kuv tsis txhob zais kiag li.’ Yog li ntawd, Xamuyee thiaj qhia txhua yam rau Eli.

Yehauvas yeej nrog nraim Xamuyee txij thaum nws tseem yau los lawm. Thoob plaws Yixayee tebchaws, cov Yixayee yeej paub tias Yehauvas tau xaiv Xamuyee ua ib tug thawj txiav txim thiab cev Nws lus.