Cia Li Xaiv Lub Neej Zoo!
PEB HLOOV PUAS TAU PEB LUB NEEJ? Ib txhia ntseeg tias lub neej mus raws li yus txoj hmoo xwb. Yog yus hmoov tsis zoo ces lub neej yeej mus raws li ntawd. Coob tus thiaj hais tias thaum lub neej tsis mus li lawv xav twb yog ntawv tsis raug xwb.
Muaj lwm cov ho tas kev cia siab vim lub qab ntuj no muaj ntau yam kev nyuaj siab ntxhov plawv. Txawm lawv peem npaum twg los lub neej tsis cuag luag. Tej zaum lawv tsuas pom muaj kev tsov kev rog, muaj tub sab tub nyiag, lossis lawv raug lwm yam xwm txheej huab cua phem. Ib txhia kuj raug mob raug nkeeg tsis txawj zoo li. Vim lub neej nyuaj siab ntsuav, lawv xav tias tsis tas nrhiav lub neej zoo lawm.
Tsis muaj leejtwg paub tias lub neej yav tom hauv ntej yuav mus li cas. Tej zaum muaj lwm yam cuam tshuam lub neej los kuj muaj. (Yakaunpau 4:14, 15) Tiamsis phau Vajlugkub qhia tias peb yeej xaiv tau txojkev uas yuav mus txog txojsia ib txhis tsis kawg. Cia peb kawm txog qhov ntawd.
Puag thaum ub, muaj ib tug txivneej hu ua Mauxe uas coj haiv neeg Yixayee. Thaum cov Yixayee yuav mus rau lub tebchaws uas Vajtswv cog tseg rau lawv, Mauxe cev Vajtswv lus rau lawv tias: “Kuv twb muab txojsia thiab txojkev tuag, muab koob hmoov thiab los tsawm foom tso rau ntawm nej xubntiag. Mas nej cia li xaiv yuav txojsia, kom nej thiab nej caj ces thiaj li muaj txojsia nyob.”—Kevcai 30:15, 19, 20.
“Kuv twb muab txojsia thiab txojkev tuag, muab koob hmoov thiab los tsawm foom tso rau ntawm nej xubntiag. Mas nej cia li xaiv yuav txojsia.”—Kevcai 30:19
Lub caij ntawd Vajtswv twb coj cov Yixayee tawm hauv Iyi tebchaws lawm. Vajtswv xav kom lawv nyob ywj pheej kaj siab lug hauv lub tebchaws uas nws yuav pub rau lawv. Tiamsis yog lawv xav tau zoo, lawv yuav tsum “xaiv” lub neej zoo. Lawv yuav ua li cas “xaiv” lub neej zoo? Lawv yuav tsum mloog lus thiab nrog nraim Vajtswv.
Niaj hnub no los zoo ib yam li ntawd thiab. Yog peb xav tau zoo, peb yuav tsum xaiv lub neej zoo. Txiav txim siab mloog Vajtswv lus thiab nrog nraim Nws. Yog peb ua li ntawd ces peb yuav tau lub neej zoo. Yav tom hauv ntej peb yuav tau txojsia ib txhis tsis kawg hauv lub ntiajteb no. Cia peb kawm seb peb yuav nrog nraim Vajtswv li cas.
HLUB VAJTSWV
Vajtswv tshoov Yauhas sau tej lus no: “Vajtswv yog txojkev hlub.” (1 Yauhas 4:8) Twb yog li ntawd Yexus thiaj qhia tias txoj kevcai uas tseem ceeb tshaj hauv Vajtswv Txojlus yog li no: “Koj yuav tsum hlub [Yehauvas] uas yog koj tus Vajtswv kawg siab kawg ntsws, thiab kawg koj lub tswvyim.” (Mathai 22:37) Yog li ntawd, twb yog peb hlub Vajtswv peb thiaj xav nrog nws sib raug zoo thiab mloog nws lus. Vim li cas tsim nyog peb hlub Vajtswv?
Yehauvas txojkev hlub rau noob neej zoo yam li leej niam leej txiv txojkev hlub rau tej tub ki. Txawm tej metub menyuam ua tsis tau zoo tiav log los, leej niam leej txiv yeej zoo siab txhawb thiab ntuas lawv. Vim li cas? Vim nkawd xav kom nkawd cov menyuam tsim txiaj thiab tau lub neej zoo xwb. Nkawd ntshaw dabtsi tshaj ntawm tej menyuam? Nkawd xav kom tej menyuam tig rov los hlub nkawd, thiab xav kom lawv khaws nkawd tej lus ntuas mus siv ua neej. Peb Leej Txiv Yehauvas los, zoo ib yam li ntawd thiab. Yeej tsim nyog peb ris nws txiaj ntsig, puas yog?
MLOOG VAJTSWV LUS
Phau Vajlugkub qhia kom peb mloog Vajtswv lus. Qhov ntawd yog li cas? Muab xav tias thaum luag qhia kom peb mloog niam txiv lus, twb yog peb yuav tsum hwm thiab coj raws nraim li niam txiv tau sam hwm. Yog li ntawd, qhov uas peb mloog Vajtswv yog peb coj raws nraim li Vajtswv tej lus sam hwm thiab. Nws tej lus sam hwm twb muab sau cia rau hauv nws Txojlus phau Vajlugkub lawm.—1 Yauhas 5:3.
Peb yuav tsum mloog Vajtswv lus. Yexus thiaj qhia tias: “Tsis yog tib cov mov xwb thiaj yug tau neeg txojsia, tiamsis yog txhua lo lus uas tawm ntawm Vajtswv qhov ncauj los thiaj yug tau.” (Mathai 4:4) Zaub mov yug tau peb txojsia tiamsis qhov uas peb paub Vajtswv tseem ceeb tshaj ntawd. Vim li cas? Ib tug vajntxwv muaj tswvyim heev hu ua Xalaumoo hais tias: “Tswvyim tiv thaiv tau ib yam li nyiaj txiag tiv thaiv. Kev txawj ntse tus nqe yog qhov uas tswvyim tuav tau tus uas txawj ntse txojsia.” (Laj Lim Tswvyim 7:12) Vajtswv lub tswvyim tiv thaiv tau peb thiab pab kom peb xaiv txojsia ib txhis tsis kawg rau yav tom hauv ntej.
NROG NRAIM VAJTSWV
Koj puas nco qab Yexus zaj lus piv txwv hauv zaj nram ntej? Yexus hais tias: “Lub qhov rooj nqaim thiab txojkev me uas coj mus txog txojsia, mas cov uas nrhiav tau kuj muaj tsawg heev.” (Mathai 7:13, 14) Yeej tsis yoojyim taug txojkev nqaim. Yog peb xav mus txog chaw, yuav tsum muaj ib tug pab coj peb txoj hau kev, peb thiaj taug mus txog txojsia ib txhis tsis kawg. Tus ntawd yog leejtwg? Yog Yehauvas ntag. Thiaj tsim nyog peb nrog nraim Nws. (Ntawv Nkauj 16:8) Peb yuav nrog nraim Vajtswv li cas?
Niaj hnub no muaj ntau yam rau peb ntshaw, thiab muaj ntau yam haujlwm tab kaum peb lub sijhawm. Yog peb tsis ceev faj ces peb yuav muab tag nrho peb lub sijhawm siv rau tej ntawd. Peb yuav tsis nco qab xav txog tej uas Vajtswv xav kom peb ua. Phau Vajlugkub thiaj qhia tias: “Ceev faj tib zoo ua nej lub neej, tsis txhob ua zoo li cov uas tsis muaj tswvyim, yuav tsum ua zoo li cov uas muaj tswvyim. Yuav tsum siv lub sijhawm kom muaj nuj nqes rau qhov tiam no phem kawg.” (Efexau 5:15, 16) Hauv peb lub neej, peb yuav tsum muab peb txojkev sib raug zoo nrog Yehauvas saib hlob.—Mathai 6:33.
KOJ YUAV TSUM XAIV
Tsis muaj leejtwg yuav hloov tau lub neej dhau los. Tiamsis peb txhua tus muaj peevxwm xaiv seb peb xav tau lub neej zoo li cas rau yav tom hauv ntej. Txojkev uas peb xaiv yuav pab tau peb tsev neeg thiab. Phau Vajlugkub qhia tias peb Leej Txiv Yehauvas hlub peb kawg nkaus li. Nws yeej yuav qhia seb nws xav kom peb ua lub neej zoo li cas. Ua tib zoo xav txog tus cev Vajtswv lus Mikha cov lus no:
“Neeg’e, nws twb qhia qhov uas zoo rau nej paub lawm. Tej uas [Yehauvas] xav kom nej ua tsuas yog ua ncaj thiab nyiam txojkev hlub luag, thiab ua lub neej txo lub siab nrog nraim nej tus Vajtswv xwb.”—Mikha 6:8.
Koj yuav xaiv lub neej zoo li cas? Koj puas yuav nrog nraim Vajtswv xwv koj thiaj taug mus txog txojsia ib txhis kawg? Peb txhua tus, nyias yuav tau xaiv nyias.