Peb Lub Neej Rau Yav Tom Ntej Yog Nyob Ntawm Peb

Tau 3,500 xyoo dhau los, Vajtswv Yehauvas qhia cov uas teev tiam nws tias lawv yuav tsum ua li cas lawv thiaj yuav tau lub neej nyob tso siab plhuav. Nws hais tias: “Kuv cia nej xaiv saib nej yuav txojsia lossis yuav kev tuag, nej yuav tej lus foom koob hmoov lossis tej lus foom tsis zoo; kuv thov lub ntuj lub teb nrog ua timkhawv rau tej uas hnub no nej xaiv. Nej cia li xaiv txojsia.”​—2 Kevcai 30:19.

Yuav kom lawv tau ib lub neej zoo rau lawm yav tom ntej lawv yuav tsum paub txiav txim siab. Niaj hnub niam no los peb yuav tau xaiv tib yam nkaus seb peb yuav ua li cas. Phau Vajlugkub hais tias yog peb xav tau lub neej nyob tso siab plhuav peb yuav tsum hlub Yehauvas thiab ua raws li nws tej lus qhia.​—2 Kevcai 30:20.

PEB YUAV MLOOG YEHAUVAS LUS THIAB UA RAWS LI NWS HAIS LI CAS?

KAWM PHAU VAJLUGKUB: Yuav kom peb muaj kev hlub rau Yehauvas peb yuav tsum xub kawm phau Vajlugkub kom peb paub nws. Thaum peb paub nws lawm peb yuav pom tias nws yog ib tug Vajtswv uas muaj kev hlub thiab xav kom peb tau ib lub neej zoo xwb. Nws xav kom peb mus cuag nws thiab qhia peb tej kev nyuaj siab rau nws ‘vim nws mob siab peb.’ (1 Petus 5:7) Phau Vajlugkub qhia tias yog peb rau siab kawm txog nws, nws yuav txav los nyob ze peb.​—Yakaunpaus 4:8.

COJ RAWS LI TEJ UAS PEB KAWM: Yog peb mloog Vajtswv lus peb yuav ua raws li nws tej lus sam hwm hauv phau Vajlugkub. Thaum peb ua li ntawd peb yuav muaj tswvyim thiab peb lub neej yuav vam meej.​—Yausuas 1:8.