Koj Puas Muaj Siab Tuab Tshaj Tawm Txoj Xov Zoo?
1 Txawm yog Petus thiab Yauhas raug luag ntes thiab raug luag hem los, nkawd yeej muaj siab tuab tshaj tawm txoj xov txog Vajtswv lub Nceeg Vaj. (Ttx. 4:17, 21, 31) Ua li, niaj hnub no, peb yuav tau muaj siab tuab tshaj tawm txoj xov zoo li cas?
2 Muaj Siab Tuab Ua Timkhawv: Muaj siab tuab yog txhais li cas? Rau cov tseem Khixatia, muaj siab tuab yog qhov tsis ntshai mus tshaj tawm txoj xov zoo rau txhua qhov chaw thiab rau txhua tus. (Ttx. 4:20; 1Pt. 3:15) Kuj yog qhov uas peb tsis txaj muag mus tshaj tawm txoj xov zoo rau tibneeg thiab. (Nt.Nk. 119:46; Loos 1:16; 2Tmt. 1:8) Yog li ntawd, nyob rau lub sijhawm kawg no, peb yuav tsum muaj siab tuab peb thiaj tsis ntshai mus tshaj tawm txoj xov zoo txog Vajtswv lub Nceeg Vaj rau txhua leej txhua tus uas peb ntsib.—Ttx. 4:29; 1Khl. 9:23.
3 Muaj Siab Tuab Tom Tsev Kawm Ntawv: Yog tias koj txaj muag thiab ntshai tibneeg heev, yuav nyuaj rau koj tshaj tawm txoj xov zoo rau cov tibneeg tom tsev kawm ntawv. Tiamsis yog koj thov Yehauvas pab kom koj muaj siab tuab, nws yuav pab koj muaj siab tawv tshaj tawm txoj xov zoo rau lwm tus. (Nt.Nk. 138:3) Qhov uas koj muaj siab tuab, yuav yoojyim rau koj qhia kom lwm tus paub tias koj yog Yehauvas ib tug timkhawv, thiab koj yuav thev taus thaum luag thuam koj. Tsis tas li ntawd xwb, yog koj muaj siab tuab, koj yuav tabmeeg qhia Vajlugkub rau cov uas kam mloog koj tom tsev kawm ntawv.—1Tmt. 4:16.
4 Muaj Siab Tuab Tom Haujlwm: Tom koj qhov chaw ua haujlwm, tibneeg puas paub tias koj yog Yehauvas ib tug timkhawv? Yog koj tsis qhia txoj xov zoo rau cov tibneeg uas koj nrog ua haujlwm, tej zaum lawv yuav tsis hnov txoj xov zoo ib zaug li. Thiab yog koj muaj siab tuab, koj yuav tsis ntshai thov sijhawm mus koom tej kev sib txoos thiab tej rooj sib txoos loj.
5 Muaj Siab Tuab Thaum Raug Kev Sim Siab: Thaum peb ntsib kev sim siab, peb yuav tsum muaj siab tuab. (1Thxk. 2:1, 2) Rau qhov yog peb muaj siab tuab, thaum peb raug luag hem, raug luag thuam, lossis raug luag tsim txom, peb txojkev ntseeg thiaj yuav tsis qaug. (Flp. 1:27, 28) Thiab yog peb muaj siab tuab, thaum peb raug luag yuam kom ua tej yam uas hla Vajtswv Yehauvas tej kevcai, peb yuav sawv ruaj khov. Tsis tas li ntawd xwb, yog peb muaj siab tuab, peb yuav nyob sib haum xeeb nrog luag thiab yuav tsis nrog luag sib cav sib ceg thaum luag ua rau peb npau taws.—Loos 12:18.
6 Txawm peb yuav raug yam teeb meem twg los xij, yog peb muaj siab tuab, peb yuav rau siab ntso tshaj tawm txoj xov zoo.—Efx. 6:18-20.