Zaj 1—Xyaum Qhia Kom Tus Kawm Vajlugkub Loj Hlob
Kev Kawm Vajlugkub Nrog Tibneeg
1 Ib lub hlis twg, Vajtswv cov tibneeg kawm Vajlugkub nrog ntau tshaj 8 plhom leej thoob ntiajteb. Yog tias peb txawj qhia Vajlugkub, peb yuav pab tau tibneeg loj hlob ntawm sab kev ntseeg. Lawv yuav muab lawv tus kheej cob rau Yehauvas thiab ua kevcai raus dej. Thaum kawg, lawv yuav “muaj peevxwm qhia tau lwm tus” thiab. (2Tmt. 2:2) Koj puas xav pab lwm tus kom loj hlob ntawm sab kev ntseeg li ntawd? Pib zaj no mus, daim Tes Num yuav muaj 11 zaj ntxiv, ntsig txog kev kawm Vajlugkub, seb yuav qhia Vajlugkub li cas tus uas kawm thiaj loj hlob ntawm sab kev ntseeg.
2 Yuav Suav Cov Uas Kawm Vajlugkub Li Cas: Txojkev kawm Vajlugkub yog dabtsi? Yog qhov uas koj siv sijhawm mus qhia Vajlugkub rau ib tug neeg twg tsis tu ncua, es kawm ib lub ntsiab zuj zus. Thiab koj siv ib phau ntawv uas lub koom haum xav kom peb siv los kawm Vajlugkub nrog nws. Txawm neb yuav kawm ntev, kawm luv, kawm ntawm qhov rooj, lossis kawm hauv xov tooj los, yog ib txojkev kawm Vajlugkub lawm ntag. Thaum twg mam li zoo rau koj suav tias koj kawm Vajlugkub nrog nws? Tom qab koj ua qauv seb yuav kawm Vajlugkub li cas, thiab neb kawm 2 zaug ntxiv ntawd, es nws tseem xav kawm ntxiv thiab, ces koj mam li suav tias nws yog ib tug uas kawm Vajlugkub hauv koj Daim Ntawv Qhia Sijhawm.
3 Phau ntawv uas peb siv los pib kawm Vajlugkub nrog tibneeg yog phau Vajlugkub Qhia. Yog tias xav siv lwm phau ntawv lossis siv ib daim ntawv tseb los pib kawm Vajlugkub nrog ib tug neeg twg, los kuj tau thiab. Cov uas tsis paub nyeem ntawv lossis tsis tau kawm ntaub kawm ntawv, siv phau Mloog Vajtswv Lus koj thiaj Muaj Sia Nyob Mus Ib Txhis los yog phau Koj Ua Tau Vajtswv Tus Phoojywg! los tau. Tiamsis ntev mus zoo rau peb pauv mus rau phau Vajlugkub Qhia. Tom qab kawm phau Vajlugkub Qhia tas lawm, txawm tus neeg ntawd yuav kawm qeeb kawm sai los, yog tias nws nyiam tej uas nws kawm thiab pom tias nws txojkev ntseeg rau Yehauvas hlob zuj zus lawd, zoo rau neb kawm ntxiv rau phau ntawv Vajtswv Txojkev Hlub.
4 Qhov uas peb kawm Vajlugkub nrog tibneeg, twb pab tau plhom leej los ua Yexus Khetos cov thwjtim lawm. (Mth. 28:19, 20) Yog tias peb xyaum raws li zaj no thiab 11 zaj uas yuav luam tom ntej no, peb yuav txawj qhia tus uas kawm Vajlugkub, kom loj hlob ntawm sab kev ntseeg.