Zaj 12—Xyaum Qhia Kom Tus Kawm Vajlugkub Loj Hlob
Pab Tus Kawm Kom Txawj Qhia Vajlugkub Rau Lwm Tus
1 Thaum cov uas kawm Vajlugkub nyuam qhuav pib mus tshaj tawm, tej zaum lawv yuav ntshai mus qhia Vajlugkub rau lwm tus. Peb yuav pab lawv li cas kom lawv tsis txhob ntshai mus ua tes num tseem ceeb uas Yehauvas tau muab cob rau peb?—Mth. 24:14; 28:19, 20.
2 Ua ntej tus kawm Vajlugkub los ua ib tug tshaj tawm uas tsis tau raus dej, zoo rau nws rau npe Kawm Kev Tshaj Tawm. Rau qhov tej uas nws kawm ntawd yuav pab tau nws txawj ua “ib tug tub zog uas tsis txaj muag thiab qhia Vajtswv txojlus tseeb raug cai.”—2Tmt. 2:15.
3 Ua Qauv Qhia: Yexus tau cob thiab ua qauv qhia nws cov thwjtim. Yexus hais tias: “Txhua tus uas kawm tiav tag yuav zoo thooj li tus xibhwb.” (Lk. 6:40) Tseem ceeb rau koj xyaum Yexus tus qauv thaum mus ua Vajtswv tes num. Rau qhov thaum tus kawm Vajlugkub nrog koj mus ua Vajtswv tes num ua ke, nws yuav pom tias lub hom phiaj uas rov mus xyuas tibneeg yog mus kawm Vajlugkub nrog lawv. Thaum ntawd nws yuav pom tias qhov uas rov mus xyuas tibneeg yog ib qho tseem ceeb heev.
4 Qhia rau nws tias thawj zaug uas nws qhia Vajlugkub rau ib tug twg, nws tsuas piav mentsis seb kawm li cas rau tus ntawd xwb. Zoo rau nws siv ib ob nqes hauv phau ntawv uas nws yuav siv qhia tus ntawd los ua ib qho yeeb yam seb thaum kawm Vajlugkub yuav kawm li cas. Mus saib cov qauv seb yuav mus kawm Vajlugkub nrog tibneeg li cas hauv daim Tes Num Rau Lub Nceeg Vaj, lub 8 Hli xyoo 2005, sab 8 thiab lub 1 Hlis xyoo 2002, sab 6.
5 Yog nws mus tau, coj nws nrog koj lossis lwm tus uas teev tiam Yehauvas los ntev lawm mus qhia rau ib tug uas kawm Vajlugkub. Thaum kawm txog ib nqes twg, cia nws tham mentsis nqe ntawd lossis cia nws piav ib nqes Vajlugkub rau tus kawm. Yog koj cia nws ua li ntawd, yuav pab tau nws txawj qhia cov uas kawm Vajlugkub kom loj hlob. (P.L. 27:17; 2Tmt. 2:2) Qhuas tej uas nws ua thiab pab kom nws hajyam txawj qhia Vajlugkub ntxiv.
6 Cob cov tshaj tawm tshiab kom lawv txawj mus qhia Vajtswv Txojlus. Yog koj cob li no yuav pab tau lawv los ua tes “haujlwm zoo” uas yog txawj mus qhia Vajlugkub rau lwm tus. (2Tmt. 3:17) Peb zoo siab kawg li uas peb tau nrog cov tshaj tawm tshiab ua ke mus caw tibneeg los “txais cov dej uas pub txojsia tsis txog them nqe kiag li.”—QTsh. 22:17.