Zaj 10—Xyaum Qhia Kom Tus Kawm Vajlugkub Loj Hlob
Cob Tus Kawm Mus Qhia Vajlugkub Ib Lub Tsev Rau Tsev
1 Thaum cov txwj laus pom zoo rau ib tug uas kawm Vajlugkub los ua ib tug tshaj tawm uas tsis tau raus dej, nws mam nrog tau lub koom txoos mus qhia Vajlugkub. (Mus saib phau Organized to Do Jehovah’s Will, sab 79-81.) Peb yuav tau pab nws li cas kom nws paub mus tshaj tawm ib lub tsev rau tsev?
2 Ob Leeg Npaj Ua Ke: Yuav tau ua tib zoo npaj ua ntej mam mus qhia Vajlugkub. Pab tus uas kawm kom paub mus nrhiav tej qauv uas nyob hauv daim Tes Num Rau Lub Nceeg Vaj thiab phau Reasoning. Pab nws nrhiav ib tug qauv uas yoojyim thiab phim cov tibneeg uas nyob hauv tej koog uas lub koom txoos qhia. Thiab pab kom nws siv phau Vajlugkub thaum nws nrog ib tug twg tham.—2Tmt. 4:2.
3 Ib tug tshaj tawm tshiab yuav tau xyaum zoo zoo seb nws yuav hais li cas ua ntej mus tshaj tawm. Yog li ntawd, thaum nws xyaum, koj yuav tau pab kom nws paub teb tej lus uas tibneeg kheev nug txog. (Khx. 4:6) Thiab qhia rau nws tias cov Khixatia yeej tsis paub txhua yam uas tibneeg nug txog. Yog nws teb tsis tau tus tswv tsev cov lus nug, nws yuav tau mus tshawb nrhiav cov lus teb tso mam li rov mus teb.—P.L. 15:28.
4 Ob Leeg Mus Qhia Vajlugkub Ua Ke: Thawj zaug tus uas kawm Vajlugkub nrog koj mus qhia ib lub tsev rau tsev, koj cia nws saib seb koj siv tus qauv uas neb tau npaj ua ke los tham li cas tso. Tom qab ntawd mam li cia nws ua tus tham. Tiamsis zoo rau nws tham mentsis xwb, xws li cia nws nyeem thiab piav ib nqes Vajlugkub. Koj yuav tsum paub nws zoo, paub nws tus cwj pwm, thiab tej uas nws txawj thiab tsis txawj, xwv koj thiaj paub pab nws. (Flp. 4:5) Lub sijhawm koj cob nws, nco ntsoov qhuas nws kom thiaj txhawb tau nws lub zog.
5 Tseem ceeb heev rau koj pab tus tshaj tawm tshiab kom teem sijhawm mus qhia Vajlugkub txhua lub lim tiam li nws mus tau. (Flp. 3:16) Koj yuav tau teem sijhawm nrog nws mus qhia Vajlugkub ua ke, thiab txhawb kom nws nrog cov uas kub siab mus qhia Vajlugkub ua ke. Li ntawd, lawv thiaj pab tau nws kom txawj qhia Vajlugkub xwv nws thiaj muaj kev xyiv fab mus tshaj tawm ib lub tsev rau tsev.