Tej Uas Pab Kom Peb Txawj Ua Vajtswv Tes Num—Cob Cov Tshaj Tawm Tshiab

Vim Li Cas Ho Tseem Ceeb: Yexus cov thwjtim tshiab yuav tsum “tuav rawv txhua yam” uas nws tau sam hwm rau lawv, xws li mus qhia qhov tseeb rau lwm tus. (Mth. 28:19, 20) Muaj coob tus tshiab twb rau npe rau Kev Kawm Tshaj Tawm thiab tej zaum lawv twb qhia Vajlugkub rau lawv tsev neeg lossis rau lawv cov phoojywg lawm. Tiamsis thaum lawv paub nco txiaj ntsig rau tej uas lawv kawm thiab paub tias Yehauvas xav kom txhua leej txhua tus los paub qhov tseeb ces tej zaum lawv kuj yuav xav mus qhia Vajlugkub rau lwm tus thiab. (Loos 10:13, 14) Tom qab lawv los ua ib tug tshaj tawm uas tsis tau ua kevcai raus dej, peb yuav tsum ua zoo cob lawv xwv lawv thiaj muaj lub siab tawv mus qhia Vajlugkub.—Lk. 6:40.

Yuav Cob Lawv Li Cas:

Nrog tus tshaj tawm tshiab mus nqa tej ntaub ntawv uas nws yuav siv rau thaum nws mus qhia Vajlugkub. Cia nws saib koj lub hnab seb koj ntim cov ntaub ntawv li cas thiab piav rau nws tias koj yuav siv cov ntaub ntawv ntawd phau twg mus qhia rau tus twg.
Neb xyaum ib tug qauv uas muaj nyob hauv daim Tes Num Rau Lub Nceeg Vaj. Qhia tus tshaj tawm tshiab tias nws tsis tas yuav hais raws nraim li tus qauv ntawd. Mus xaiv tej chaw qhia Vajlugkub uas hais nyob hauv phau Ministry School sab 82, ib qho uas zoo thooj li neb thaj tsam los xyaum. Qhia nws tias vim li cas ho tseem ceeb rau peb tu peb tus kheej thiab hnav tej tsoo tsho kom du lug thiab raug ntsej muag.—2Khl. 6:3, 4.
Cob nws tsis tseg kom txawj mus qhia Vajlugkub. Muab ib daim ntawv qhia koog rau nws saib thiab qhia seb siv li cas. Qhia nws seb yuav tau sau tej twg cia thaum ntsib ib tug uas xav kawm Vajlugkub. Qhia nws seb yuav siv lub Vej xaij jw.org thiab phau Good News for People of All Nations li cas thaum nws mus qhia Vajlugkub. Qhia kom nws paub pab cov uas xav kawm Vajlugkub.—1Khl. 3:6.
Ua siab ntev thiab qhuas nws. (P.L. 25:11) Tso ib tug qauv zoo rau nws xyaum. Nws yeej yuav nco ntsoov qhov uas koj kub siab lug pab nws.

Xyaum Li No Rau Lub Hli No:

Coj tus tshaj tawm tshiab nrog koj mus qhia Vajlugkub thaum mus ib lub tsev rau tsev, thaum rov mus xyuas cov uas koj tau ntsib lawd, thiab thaum mus kawm Vajlugkub nrog lwm tus. Yog tsis muaj ib tug tshaj tawm tshiab uas koj qhia Vajlugkub rau, koj kuj coj ib tug tshaj tawm uas tsis tshua paub qhia Vajlugkub nrog koj mus.