Zaj 11—Xyaum Qhia Kom Tus Kawm Vajlugkub Loj Hlob
Pab Tus Tshaj Tawm Tshiab Rov Mus Xyuas
1 Thaum ib tug kawm Vajlugkub pib mus tshaj tawm txoj xov zoo, nws yuav mus nrhiav tau cov uas nyiam kawm Vajlugkub. Yog li ntawd, peb yuav tau pab tus uas tshaj tawm tshiab li cas nws thiaj paub rov mus xyuas thiab txawj pab cov tibneeg ntawd?
2 Txawm yog tus kawm ntsib tus tswv tsev thawj zaug xwb los, zoo rau peb qhia kom nws npaj rov mus xyuas. Txhawb kom tus kawm mob siab cov tibneeg uas nws nrog tham. (Flp. 2:4) Cob kom nws txawj nug tej lus uas yuav rub tau tibneeg lub siab. Pab kom nws ua tib zoo mloog thaum nws nrog lawv tham, nws thiaj cim tau tej yam uas lawv txhawj txog. Thaum mus ntsib ib tug uas nyiam Vajlugkub, kom tus tshaj tawm tshiab muab tej lus tseem ceeb uas neb nrog nws tham sau tseg cia, xwv neb thiaj tau siv los npaj rau lwm zaus rov mus xyuas nws.
3 Npaj Rov Mus Xyuas: Ua ntej neb yuav rov mus xyuas tus tswv tsev, pab tus kawm muab tej lus uas nws tau muab sau tseg cia lawd los npaj ua ib zaj kom raug tus tswv tsev siab. (1Khl. 9:19-23) Neb ob leeg npaj ib nqes Vajlugkub thiab ib nqe hauv phau ntawv uas neb yuav coj mus qhia tus tswv tsev. Tsis tas li ntawd xwb, tom qab neb kawm Vajlugkub tas, npaj ib lo lus mus nug tus tswv tsev rau lwm zaus. Pab tus tshaj tawm tshiab kom txhua zaus nws rov mus xyuas tus tswv tsev, nws yuav tau npaj thiaj mus qhia tau tus tswv tsev paub phau Vajlugkub ntxiv.
4 Pab tus tshaj tawm tshiab npaj ib zaj uas yuav yoojyim rau nws tham, thaum nws rov mus xyuas tus tswv tsev. Thaum mus ntsib tus tswv tsev, zoo rau nws hais li no: “Kuv zoo siab kawg li uas zaum tas los no, kuv tau nrog koj tham. Hnub no kuv rov tuaj nrog koj tham txog [hais lub ntsiab lus].” Zoo rau koj qhia tus tshaj tawm tshiab seb nws yuav tham li cas yog mus tsis ntsib tus tswv tsev tiamsis ho ntsib dua lwm tus.
5 Nquag Rov Mus Xyuas: Txhawb tus kawm kom maj nroos rov mus xyuas cov uas nyiam Vajlugkub. Pab kom nws ua siab ntev nws thiaj yuav rov mus ntsib cov tibneeg ntawd nyob tsev. Thiab qhia rau nws tias thaum nws tau cog lus yuav rov mus xyuas ib tug twg, nws yuav tau rov mus raws li tau cog tseg. (Mth. 5:37) Cob tus tshaj tawm tshiab kom muaj lub siab zoo, txawj xav, thiab saib taus cov uas muaj siab mos siab muag uas xav kawm Vajlugkub.—Tit. 3:2.