Koj Puas Muaj Koj Ib Koog?
1. Vim li cas ho zoo rau koj muaj koj ib koog?
1 Zoo rau koj muaj koj ib koog. Yog vim li cas? Rau qhov yog koj muaj koj ib koog uas nyob ze koj, yuav yoojyim rau koj mus qhia Vajlugkub, tsis hais koj mus koj ib leeg lossis nrog lwm tus mus ua ke. Thaum muaj kev sib txoos mus qhia Vajlugkub, zoo rau koj mus koom ua ntej tso. Tiamsis yog koj muaj koj ib koog, yuav pab tau koj mus qhia rau lub caij uas koj xyeej es tsis muaj kev sib txoos mus qhia Vajlugkub. Yog li ntawd, yog koj nyob rau lub koom txoos uas muaj ib thaj tsam dav heev, hajyam zoo rau koj muaj koj ib koog, koj thiaj yuav ua tau timkhawv rau sawvdaws.—Tubtxib Tes Haujlwm 10:42.
2. Yog koj muaj koj ib koog pab tau koj li cas?
2 Pab Tau Li No: Muaj ib txhia pom tias yog lawv muaj lawv ib koog uas nyob ze lawv txoj haujlwm, pab tau lawv mus qhia Vajlugkub rau lub sijhawm uas so noj sus lossis tom qab ua haujlwm tas. Lwm cov ho pom tias yog lawv muaj lawv ib koog uas nyob ze lawv lub tsev, zoo rau lawv coj tsev neeg mus qhia Vajlugkub ib ob teev ua ntej mus kev sib txoos. Vim cov tibneeg uas lawv yuav rov mus xyuas thiab cov uas kawm Vajlugkub twb nyob ze lawv lawm, lawv thiaj tsis tau siv dag zog, sijhawm, thiab nyiaj txiag ntau. Ib txhia kuj pom tias yog lawv muaj lawv ib koog, lawv mus qhia tau Vajlugkub ntau dua. Qhov no pab tau lawv ua tau ib tug pab tho kev lossis ib tug tho kev. Tsis tas li ntawd xwb, yog peb muaj peb ib koog, peb yuav paub cov tibneeg uas nyob rau koog ntawd zoo dua. Thaum peb mus qhia Vajlugkub, peb yuav tham tau raug lawv siab dua, thiab lawv los yuav tsis ntshai peb. Thaum kawg, peb tes num thiaj yuav tawg paj txi txiv.
3. Ib tug tho kev tau hais li cas txog qhov uas nws muaj nws ib koog?
3 Muaj ib tug saib xyuas thaj tsam tau txhawb ib tug tho kev kom nws yuav tsum muaj ib koog mus qhia Vajlugkub. Tus tho kev thiaj hais tias: “Kuv txawm ua raws li nws tau hais, ces tsis ntev xwb kuv paub cov tibneeg uas nyob rau kuv koog zoo heev. Vim li no, kuv thiaj hloov kuv cov sijhawm mus qhia Vajlugkub kom haum lawv. Thaum xub pib, tsuas muaj 35 tug uas kuv rov mus xyuas xwb. Tiamsis tom qab ntawd, ib lub hlis twg kuv muaj tshaj li 80 tus, thiab muaj 7 tus kawm Vajlugkub.”
4. Koj yuav mus nqa ib koog ntawm leejtwg thiab yuav mus qhia li cas?
4 Yuav Nqa Thiab Yuav Qhia Li Cas: Yog koj xav tau koj ib koog, mus nrog tus kwvtij uas tuav tej koog tham. Koj caw tau cov tshaj tawm nrog koj mus qhia Vajlugkub rau hauv koog ntawd, nco ntsoov sau cov uas tsis nyob tsev lawd cia. Zoo rau koj siv li 4 lub hlis los qhia kom thoob plaws koj koog. Yog dhau 4 lub hlis koj qhia tsis thoob, koj hais rau tus kwvtij uas saib xyuas koj pawg lossis lwm tus pab koj qhia kom thoob. Thiab tom qab 4 lub hlis uas koj qhia koj koog tas, koj muab koog ntawd xa rov qab es nqa dua lwm koog lossis rov nqa koog qub los nyob ntawm koj. Tiamsis tsis zoo rau koj tuav rawv koog qub ntawd tas mus li, zoo rau koj muab xa rov qab xwv lwm tus thiaj tau nqa thiab. Yog koj nyob rau lub koom txoos uas muaj ib thaj tsam me me es koj tsis muaj koj ib koog, koj hais rau tus saib xyuas koj pawg kom qee nws koog ib qho rau koj mus qhia.
5. Peb yuav tsum ua li cas peb thiaj ua tiav tes haujlwm uas Yehauvas tau muab cob rau peb ua?
5 Peb tes haujlwm mus tshaj tawm txoj xov zoo kom “thoob plaws lub ntiajteb” yog ib tes haujlwm ntau heev. (Mth. 24:14) Peb yuav tsum txawj siv peb lub sijhawm thiaj yuav qhia thoob. Peb yuav tau mus qhia rau lub sijhawm uas sawvdaws mus sib ntsib ua ke, thiab yog peb muaj peb ib koog, peb kuj mus tau rau txhua lub sijhawm uas peb xyeej. Yog peb ua li no, peb yuav qhia tau txoj xov zoo rau tibneeg coob leej ntau tus.