Yog Koj Muaj Koj Ib Koog Puas Pab Tau Koj?
1. Ua cas ho zoo rau koj muaj koj ib koog?
1 Ua cas ho zoo rau koj muaj koj ib koog? Nyob hauv cov koom txoos muaj ntau koog, zoo rau koj muaj ib koog ua koj ntiag tug, uas nyob ze koj tsev. Phau ntawv Organized, sab 103, hais tias: “Yog koj muaj koj ib koog, koj yuav tau sijhawm ntau mus qhia Vajlugkub. Thiab yog koj xav coj lwm tus nrog koj mus qhia hauv koj koog los kuj tau.”
2. Lub caij koj mus koom tsis tau txojkev sib txoos mus qhia Vajlugkub, koj koog pab tau koj li cas?
2 Pab Rau Lub Caij Koom Tsis Tau Txojkev Sib Txoos Mus Qhia Vajlugkub: Yog tias koj tau ib koog nyob ze koj txoj haujlwm, koj kuj mus qhia tau Vajlugkub rau lub sijhawm noj sus lossis tom qab ua haujlwm, qhov zoo yog koj nrog ib tug ua haujlwm ze koj mus. Thiab yog tias koj tau ib koog nyob ze koj tsev, ces yuav yoojyim rau koj thiab koj tsev neeg mus qhia Vajlugkub rau yav tsaus ntuj. Txawm koj mus koom tsis tau txojkev sib txoos mus qhia Vajlugkub los, zoo rau koj thov Yehauvas coj koj txoj hau kev ua ntej koj mus. (Flp. 4:6) Koj yuav tsum ua tib zoo luj lub sijhawm koj mus qhia hauv koj koog thiab lub sijhawm koj nrog lub koom txoos mus ua ke, rau qhov tseem ceeb rau koj mus txhawb txojkev sib txoos mus qhia Vajlugkub. Tshwj xeeb rau koj mus txhawb koj pawg rau hnub 6 thiab hnub 7 thaum muaj coob leej tuaj ua ke mus tshaj tawm.
3. Yog koj muaj koj ib koog pab tau koj li cas?
3 Pab Tau Li No: Yog koj muaj koj ib koog, ces thaum koj muaj sijhawm koj cia li mus qhia hauv koog ntawd xwb. Ua li no koj yuav muaj sijhawm ntau dua mus qhia Vajlugkub, rau qhov koj tsis tau siv sijhawm mus ntau qhov. Qhov no kuj yoojyim rau ib txhia los ua ib tug pab tho kev lossis ua ib tug tho kev. Vim cov neeg uas txaus siab kawm Vajlugkub nyob hauv koog ntawd, yuav yoojyim rau koj rov mus qhia lawv. Muaj coob leej pom tias thaum lawv muaj lawv ib koog, es lawv mus qhia ob peb lwm ua ntej muab xa rov qab, pab tau lawv paub cov neeg nyob hauv koog ntawd zoo thiab pab tau cov neeg ntawd tso siab rau lawv. Ua li, yog koj muaj koj ib koog puas pab tau koj thiab koj tsev neeg ua Vajtswv tes num ntau ntxiv?—2Tmt. 4:5.