Qhia Cov Uas Tsis Tshua Txawj Nyeem Ntawv
1. Thaum peb mus qhia Vajlugkub, tej zaum peb yuav ntsib cov neeg twg?
1 Thaum peb mus qhia Vajlugkub, tej zaum peb yuav ntsib cov uas tsis tshua txawj nyeem ntawv. Peb yuav pab cov ntawd li cas?
2. Vim li cas peb yuav tsum saib taus tus uas tsis tshua txawj nyeem ntawv thiab yuav ua li cas thiaj qhia tias peb saib taus nws?
2 Saib Taus Lawv: Qhov tseem ceeb rau Yehauvas yog tus neeg lub siab tsis yog qhov nws txawj ntaub txawj ntawv. (1Xmy. 16:7; P.L. 21:2) Yog li peb yuav tsum saib taus cov uas tsis tshua txawj nyeem ntawv. Yog peb ua siab ntev thiab saib taus lawv, lawv yuav xav kawm ntxiv. (1Pt. 3:15) Yog ib tug twg tsis txawj nyeem ntawv, tsis txhob yuam nws nyeem. Yog peb ua li no, qhia tau tias peb saib taus nws. Thaum tus neeg ntawd paub qhov tseeb zuj zus lawm, nws yuav rau siab kawm ntxiv xwv nws thiaj paub “tshawb nrhiav [Yehauvas] txoj kevcai nruab hnub hmo ntuj.”—Nt.Nk. 1:2, 3.
3. Peb yuav ua li cas qhia cov uas tsis tshua txawj nyeem ntawv?
3 Yuav Qhia Tus Kawm Li Cas: Duab yog ib yam uas zoo siv los qhia thiab pab kom tus kawm nco tau tej uas nws twb kawm lawd. Zoo rau koj siv ib daim duab hauv phau ntawv uas neb tabtom kawm los nug seb nws nyiam dabtsi hauv daim duab ntawd. Pab kom nws to taub tias daim duab ntawd yog qhia txog dabtsi. Thiab siv tej nqe Vajlugkub uas yuav pab tau nws to taub zoo txog daim duab ntawd. Thaum neb kawm tas ib zag lawd, koj kuj rov siv cov duab los qhia nws txog zaj ntawd. Tiamsis ib zaug twg tsis txhob kawm ntau ntau. Thaum neb kawm, yuav tsum qhia kom nws paub lub ntsiab loj thiab cov ntsiab me tiamsis tsis txhob muab lwm yam los tham ntxiv. Nyeem cov nqe Vajlugkub thiab pab kom tus kawm to taub tej nqe Vajlugkub ntawd. Yog koj ua li no, yuav pab tau tus kawm kub siab xyaum kom txawj nyeem ntawv xwv nws thiaj li paub tshawb nrhiav tau qhov tseeb hauv phau Vajlugkub.
4. Peb yuav ua li cas ntxiv thiaj pab tus kawm txawj nyeem ntawv?
4 Lwm Txojkev Los Pab Kom Txawj Nyeem Ntawv: Cov tibneeg uas tsis tshua txawj nyeem ntawv lossis tsis muaj sijhawm mus kawm ntawv yog ib co uas to taub sai thiab cim tau zoo heev. Koj kuj txhawb kom cov zoo li no mloog tej ntaub ntawv uas twb muab kaw ua suab lawm. Thaum lawv mloog, qhia kom lawv nthuav lawv phau ntawv los saib es qog ua qab. Yog nws ua li no, yuav pab tau nws paub nyeem ntawv zoo tuaj. Nws kuj siv tau phau ntawv Apply Yourself to Reading and Writing los pab kom nws paub nyeem ntawv thiab. Nyob rau tej qho chaw, cov txwj laus kuj npaj ib cha hauv lub Tsev Nceeg Vaj los qhia kom txawj nyeem ntawv. Peb siv tau tag nrho tej no los pab cov tsis tshua txawj nyeem ntawv kom to taub “Vajtswv txojlus,” uas pub tau lawv muaj tswvyim paub txojkev dim.—2Tmt. 3:15.