Pab Cov Uas Tsis Tshua Paub Nyeem Ntawv

1. Vim li cas ho nyuaj heev los qhia cov uas tsis tshua paub nyeem ntawv?

¹ Tej zaum cov uas tsis tshua paub nyeem ntawv xav paub Vajtswv heev, tiamsis tsis muaj cuab kav nyeem phau Vajlugkub thiab tej phau ntawv loj. Yog peb tseb phau Vajlugkub Qhia rau cov zoo li ntawd thawj zaug uas peb ntsib, tej zaum lawv yuav tsis xav txais mus nyeem. Yuav ua li cas peb thiaj pab tau cov zoo li no los paub Vajtswv? Peb tau nug cov tshaj tawm uas paub qhia Vajlugkub nyob rau 20 tawm lub tebchaws seb lawv tau pab cov uas tsis tshua paub nyeem ntawv li cas. Lawv thiaj tau hais li nram qab no.

2. Tej ntaub ntawv twg thiaj pab tau tus uas tsis tshua paub nyeem ntawv?

² Yog koj qhia ib tug uas tsis tshua paub nyeem ntawv lossis yeej tsis paub kiag li, zoo rau koj siv phau Mloog Vajtswv Lus lossis phau Mloog Vajtswv Lus koj thiaj Muaj Sia Nyob Mus Ib Txhis los qhia. Muaj ib tug tho kev nyob hauv tebchaws United States nyiam muab ob phau ntawv no rau tus tswv tsev xaiv seb nws nyiam phau twg. Ceg nyob rau tebchaws Kenya tau hais tias ob phau ntawv no pab tau cov neeg Afika heev, rau qhov thaum lawv qhia ib yam dabtsi lawv tsis siv lus nug lus teb los qhia, tiamsis lawv qhia li piav dab neeg xwb. Rau cov uas kawm ntaub kawm ntawv lawm, siv lus nug lus teb los qhia yeej tsis nyuaj ua luaj twg, tiamsis cov uas tsis tau kawm mas nyuaj heev. Ib yam ntxiv uas yuav pab tau tus uas tsis tshua paub nyeem ntawv yog mloog peb tej ntaub ntawv uas twb muab kaw ua suab lawm. Thaum nws mloog, qhia kom nws nthuav nws phau los saib es qog ua qab. Thaum qhia tus uas tsis tshua paub nyeem ntawv, coob tus tshaj tawm nyiam siv phau Vajtswv Muaj Xov Zoo Rau Peb!, lossis phau Koj Ua Tau Vajtswv Tus Phoojywg!, lossis phau Kuv Phau Ntawv Txog Phau Vajlugkub los qhia.

3. Yuav kom peb qhia tau cov tsis tshua paub nyeem ntawv peb yuav tsum paub tej yam twg txog lawv?

³ Qhuas Lawv: Tej zaum cov uas tsis tau paub nyeem ntawv yuav txaj muag thiab saib lawv tus kheej qes heev. Peb yuav tau pab kom lawv tsis txhob xav li ntawd xwv lawv thiaj xav kawm qhov tseeb. Cov uas tsis paub nyeem ntawv feem coob yeej ntse heev thiab kawm tau zoo heev. Yog li ntawd, peb yuav tsum saib taus lawv thiab paub txuag lawv ntsej muag. (1Pt. 3:15) Thaum lawv pom tias tej uas lawv kawm ntawd muaj qab hau thiab pab tau lawv txojkev ntseeg loj hlob zuj zus ces lawv yeej yuav kawm ntxiv. Yog li, peb yuav tau qhuas thiab txhawb lawv kam tiag.

4. Peb yuav txhawb cov tsis tshua paub nyeem ntawv kom lawv npaj ua ntej li cas?

⁴ Txawm tus kawm tsis tshua paub nyeem ntawv los, koj yuav tau txhawb kom nws npaj ua ntej neb kawm. Muaj ib co tshaj tawm nyob hauv tebchaws South Africa txhawb cov kawm uas tsis paub nyeem ntawv kom thov ib tug hauv lawv tsev neeg lossis ib tug phoojywg uas paub nyeem ntawv pab nyeem rau lawv. Kuj muaj ib tug tshaj tawm hauv tebchaws Britain txhawb cov uas kawm Vajlugkub nrog nws kom saib nws phau seb nws kos cov lus teb li cas. Nws ua li no kom lawv thiaj pom tias yoojyim rau lawv teb dua yog lawv twb muab cov lus teb kos cia lawm. Ib tug kwvtij nyob rau tebchaws Is Dias kuj txhawb kom cov uas kawm Vajlugkub nrog nws mus saib cov duab rau zaj uas yuav kawm rau lub lim tiam tom ntej thiab ua zoo xav seb cov duab ntawd cov ntsiab yog dabtsi. Tsis tas li no xwb, koj kuj txhawb tus kawm kom mloog cov suab rau phau uas tabtom kawm ntawd thaum nws npaj thiab.

5. Thaum qhia Vajlugkub rau ib tug twg, koj yuav tau ua siab ntev li cas?

⁵ Ua Siab Ntev: Txawm koj yuav siv phau ntawv twg los qhia los xij, nco ntsoov xaiv cov ntsiab tseem ceeb los qhia, thiab qhia kom tus kawm to taub zoo txog cov ntsiab ntawd. Thaum koj nyuam qhuav pib kawm Vajlugkub nrog ib tug twg, zoo rau neb kawm li 10 feeb mus rau 15 feeb xwb. Thaum neb kawm tsis txhob kawm ntau ntau, ib zaug tsuas kawm li ob peb nqes xwb. Yog tus kawm nyeem qeeb qeeb, koj yuav tau ua siab ntev rau nws. Thaum tus kawm muaj kev hlub rau Yehauvas lawm, nws yeej yuav rau siab kawm kom nws paub nyeem ntawv. Yuav kom pab tau tus kawm muaj kev hlub rau Yehauvas, koj yuav tau caw nws tuaj cov kev sib txoos thaum neb nyuam qhuav pib kawm Vajlugkub.

6. Peb yuav pab ib tug li cas nws thiaj paub nyeem ntawv?

⁶ Yog cov uas kawm Vajlugkub paub nyeem ntawv, lawv yuav kawm tau Vajlugkub zoo dua ces lawv txojkev ntseeg yuav loj hlob sai dua. (Nt.Nk. 1:1-3) Yog li ntawd, coob tus thiaj li siv phau Apply Yourself to Reading and Writing los qhia cov uas kawm Vajlugkub nrog lawv kom paub nyeem ntawv tom qab kawm Vajlugkub tas. Yog tus kawm qaug zog vim nws pheej nyeem tsis tau, pab kom nws pom tej uas nws ua tau es thiaj yuav txhawb tau nws lub zog. Pab kom nws pom tias Yehauvas yeej yuav foom koob hmoov rau tej uas nws ua thiab txhawb kom nws thov Yehauvas pab nws. (P.L. 16:3; 1Yh. 5:14, 15) Muaj ib co tshaj tawm nyob hauv tebchaws Britain txhawb cov uas kawm Vajlugkub nrog lawv kom kawm ib qho zuj zus ntawm hauv paus tuaj xwv thiaj pab tau lawv paub nyeem ntawv. Xws li, lawv yuav tau kawm kom paub cov tsiaj ntawv zoo, tom qab ntawd xaiv tej nqe Vajlugkub uas yoojyim rau lawv nyeem, ces mam li mus nyeem tej ntaub ntawv Vajlugkub uas koj paub tias lawv yuav nyeem tau. Thaum koj qhia ib tug twg kom paub nyeem ntawv, koj yuav tau pab kom nws xav kawm es nws thiaj kawm tau.

7. Vim li cas zoo rau peb yuav tsum qhia qhov tseeb rau cov uas tsis tshua paub nyeem ntawv?

⁷ Txawm cov uas tsis paub ntaub paub ntawv los, Yehauvas yeej saib lawv rau nqe. (Yauj 34:19) Yehauvas saib lawv lub siab tsis yog qhov uas paub ntaub paub ntawv. (1VKk. 28:9) Yog li ntawd, txawm cov uas tsis tshua paub nyeem ntawv los, koj yuav tau qhia qhov tseeb rau lawv. Muaj ntau yam ntaub ntawv zoo heev uas koj siv tau los qhia lawv. Thaum tus kawm paub nyeem ntawv lawd, koj mam li hloov mus kawm phau Vajlugkub Qhia kom nws paub Vajlugkub zoo ntxiv.