Yehauvas Cov Timkhawv Koom Tes Tshaj Txoj Xov Zoo

Tau 100 tawm xyoos dhau los, Yehauvas Cov Timkhawv koom tes tshaj txoj xov zoo. Tes haujlwm tshaj tawm txoj xov zoo twb nrov ncha mus thoob qab ntuj lawm, tsis tau muaj dua ib zaug li. Peb qhia txoj xov zoo ua ntau pua yam lus thiab qhia mus txog 230 tawm lub tebchaws. (Mth. 24:14) Vim li cas yuav tau ua tes haujlwm no? Thoob ntiajteb tau ua tes haujlwm no tiav li cas? Zaj yeeb yaj kiab hu ua Yehauvas Cov Timkhawv Koom Tes Tshaj Txoj Xov Zoo yuav teb cov lus nug no thiab yuav piav txog txhua tes haujlwm uas peb ua thoob ntiajteb. Tom qab koj saib zaj yeeb yaj kiab no tas, teb cov lus nug nram no:

Zaj yeeb yaj kiab pab tau koj nco txiaj ntsig li cas rau: (1) lub dag lub zog uas Yehauvas lub koom haum tau siv mus tshaj tawm txoj xov zoo? (2Tmt. 4:2) (2) cuab kwvtij Npe-ee thoob ntiajteb? (3) kev kawm Vajlugkub rau cov tubtxib tshaj tawm txawv tebchaws thiab cov kwvtij uas ncig xyuas cov koom txoos? (2Tmt. 2:2) (4) qhov uas nyeem Vajlugkub txhua tagkis thiab qhov uas npaj mus koom txoos? (Ttx. 17:11) (5) tej kev sib txoos? (Hnpl. 10:24, 25) (6) tej koob hmoov uas koj yuav tau txais thaum ntiajteb hloov ua lub Vaj Kaj Siab lawm? (Yxy. 11:9) (7) koj tes haujlwm sau qoob loo tamsim no? (Yh. 4:35) Zaj yeeb yaj kiab no yog ib yam twj uas pab tau coob tus paub txog tes haujlwm uas Yehauvas Cov Timkhawv ua thoob ntiajteb. (8) Thaum twg thiaj zoo rau peb tso zaj no rau cov peb kawm Vajlugkub nrog, cov txheeb ze, thiab lwm tus saib? (9) Thaum muab rau lawv saib tas, lawv nyiam li cas xwb?

Thaum peb xav txog tej uas Yehauvas tau ua, ua rau peb kub siab lug li tus sau Ntawv Nkauj tau hais: “Au kuv tus Vajtswv [Yehauvas], koj tau ua ntau yam phimhwj thiab npaj tseg ntau yam rau peb, tsis muaj leejtwg zoo cuag li koj.” (Nt.Nk. 40:5) Cia peb siv zaj yeeb yaj kiab no mus pab lwm tus, xwv lawv thiaj nco txiaj ntsig rau Yehauvas thiab nws lub koom haum!