“Cia Li Ua Li No”
Ua Nco Txog Yexus Lub Plaub Hlis Tim 5
1. Vim li cas hmo ua kevcai nco txog Yexus tseem ceeb ua luaj li?
1 Yexus tau hais li no rau nws cov thwjtim: “Cia li ua li no thiaj nco ntsoov kuv.” (Luka 22:19) Nws sam hwm kom lawv nco ntsoov nws txojkev tuag. Tus nqe txhiv ntawd pab txhawb Vajtswv lub ntsiab rau txhua fab. Txhua txhua xyoo, cov Khixatia thiaj ua kevcai nco txog hnub tseem ceeb ntawd. Xyoo no, peb yuav ua kevcai nco txog Yexus rau lub Plaub Hlis, tim 5. Yog li, hnub ntawd twb los ze lawm, yog peb nco Yehauvas txiaj ntsim, zoo rau peb ua dabtsi?—Khx. 3:15.
2. Peb yuav npaj li cas thiaj qhia tias hmo ua kevcai nco txog Yexus muaj nqes rau peb?
2 Cia Li Npaj: Ua ntej peb yuav ua ib teg haujlwm tseem ceeb, peb yeej ua tib zoo npaj. Yog li ntawd, ua ntej peb ua kevcai nco txog Yexus, tseem ceeb rau peb npaj siab. Peb yuav tsum nrog peb tsev neeg kawm txog tej xwm uas Yexus raug ua ntej nws tuag. Nyeem thiab ua tib zoo xav txog Yexus tes haujlwm. (Exl. 7:10) Yog tias xav paub seb zoo nyeem cov nqe Vajlugkub twg, saib hauv daim qhia hnub qhia hli, thiab hauv phau ntawv Examining the Scriptures Daily. Hauv phau ntawv The Watchtower lub Ob Hlis, tim 1, xyoo 2011, ntawm sab 23-24, yuav qhia seb zoo nyeem cov nqe Vajlugkub twg ntxiv. Tsis tas li ntawd xwb, yuav kom peb hajyam nkag siab txog tus nqe txhiv, nyeem sab 52-62, thiab sab 236-238, hauv phau ntawv Phau Vajlugkub Qhia Txog Dabtsi Tiag?
3. Peb yuav ua li cas qhia tias peb nco Yehauvas txiaj ntsim?
3 Tshaj Tawm: Yog peb kub siab tshaj tawm txoj xov zoo, yuav qhia tias peb nco Yehauvas txiaj ntsim. (Lk. 6:45) Lub Peb Hlis, tim 17, peb cov kwvtij thoob qab ntuj, yuav pib caw ib tsoom sawvdaws tuaj ua kevcai nco txog Yexus. Koj puas kam siv sijhawm ntxiv mus tshaj tawm txoj xov zoo? Koj rau npe ua ib tug pab tho kev puas tau? Hmo uas koj tsev neeg pe hawm Vajtswv ua ke, zoo rau nej tham seb nej yuav npaj li cas rau lub caij ntawd.
4. Thaum peb ua kevcai nco txog Yexus, txhawb tau peb lub zog li cas?
4 Txhua txhua xyoo, thaum peb ua kevcai nco txog Yexus, txhawb tau peb lub zog heev! Yehauvas hlub peb kawg li nws thiaj txib nws tib leeg Tub los tuag txhiv noob neej. Thaum peb muab ua tib zoo xav, ua rau peb hajyam muaj kev hlub rau Yehauvas, thiab ua rau peb muaj kev xyiv fab heev. (Yh. 3:16; 1Yh. 4:9, 10) Thaum peb muaj kev hlub rau Yehauvas, peb yuav tsis xam pom peb tus kheej xwb. (2Khl. 5:14, 15) Peb yuav muaj lub siab kub lug, qhuas Yehauvas tab meeg ib tsoom sawvdaws. (Nt.Nk. 102:19-21) Yog li ntawd, peb zoo siab kawg li uas peb yuav tau tshaj tawm lossis “qhia tus Tswv txojkev tuag” rau lub Plaub Hlis, tim 5.—1Khl. 11:26.