Xyiv Fab Hlo Npaj Ua Kevcai Nco Txog Yexus
1. Lub caij ua kevcai nco txog Yexus peb yuav tsum ua dabtsi?
1 Peb yuav ua kevcai nco txog Yexus txojkev tuag rau Hnub 2 (Tuesday), lub 3 Hlis, tim 26. Peb xyiv fab heev vim Vajtswv twb qheb kev rau noob neej los txais txojkev cawm dim lawm. (Yxy. 61:10) Tiamsis ua ntej yuav txog hmo ntawd, peb yuav tsum muaj kev xyiv fab peb thiaj ua tib zoo npaj. Peb yuav npaj li cas?
2. Vim li cas peb thiaj npaj rau hmo ua kevcai nco txog Yexus?
2 Npaj Ua Kevcai Nco Txog Yexus: Tus Tswv Pluas Hmo yog ib pluag tsis loj tiamsis tseem ceeb heev. Yog li yuav tsum npaj zoo zoo ua ntej, thiaj npaj txhij npaj txhua tej uas yuav cheem tsum rau hmo ntawd. (P.L. 21:5) Yuav tau teem lub sijhawm thiab teem qhov chaw sib txoos ua ntej. Lub ncuav thiab khob cawv los yuav tau npaj kom txhij. Qhov chaw sib txoos los yuav tau tu kom huv siab si. Tus kwvtij uas yuav qhia rau hmo ntawd, yuav tau ua tib zoo npaj nws zaj lus qhuab qhia. Yuav tau qhia cov kwvtij uas pab nqa cov ncuav thiab cov cawv, nrog rau cov tub ncig num, kom nyias paub nyias tes haujlwm. Tso siab tias cov kwvtij twb npaj tej uas hais tas los no tiav lawm ntau. Twb yog peb nco txiaj ntsig tias Yehauvas txhiv peb los tau txojsia, peb thiaj ua tib zoo npaj rau txojkev sib txoos no.—1Pt. 1:8, 9.
3. Peb yuav npaj peb lub siab li cas mus koom tus Tswv Pluas Hmo?
3 Npaj Siab: Tseem ceeb heev rau peb npaj peb lub siab mus koom hmo ua kevcai nco txog Yexus, peb thiaj pom tias Yexus txojkev tuag muaj nqes heev rau peb. (Exl. 7:10) Peb tsev neeg yuav tsum siv sijhawm los nyeem cov nqe Vajlugkub uas teem tseg rau lub caij ua kevcai nco txog Yexus. Thiab siv sijhawm los xav txog tej uas tau raug Yexus, ua ntej ob peb hnub uas nws tuag. Yog tias peb ua tib zoo xav txog Yexus tus qauv zoo, peb yuav xyaum tau Yexus txojkev hlub uas nws tau muab nws tus kheej tuag this peb.—Klt. 2:20.
4. Vim li cas qhov uas Yexus tuag txhiv peb ho ua rau koj zoo siab ua luaj?
4 Khetos txojkev tuag txhawb Yehauvas lub hwjchim kav thiab tso tau neeg dim txojkev txhaum thiab kev ploj kev tuag. (1Yh. 2:2) Khetos txojkev tuag qheb kev rau neeg los nrog Vajtswv sib raug zoo thiab kom neeg tau txojsia nyob mus ib txhis. (Khx. 1:21, 22) Khetos txojkev tuag kuj txhawb tau peb txojkev ntseeg kom peb coj tau raws li peb cog lus tseg rau Yehauvas. Thiab kuj pab kom peb sawv ruaj khov ua nws cov thwjtim. (Mth. 16:24) Yog koj ua tib zoo npaj kom mus koom tau hmo ua kevcai nco txog Yexus xyoo no, ces koj yeej yuav muaj kev xyiv fab puv npo!