Koj Puas Npaj Ua Kevcai Nco Txog Yexus?

Yexus paub tias hmo Nixa 13 xyoo 33 T.Q.Y. yog hmo kawg uas nws nrog nws cov thwjtim nyob lawm xwb, ua ntej nws raug tua. Hmo ntawd yog zaum kawg uas nws nrog nws cov thwjtim ua kevcai Hla Dhau es tsa txoj kevcai tshiab hu ua tus Tswv Pluas Hmo. Tej lub caij uas tseem ceeb npaum li no yuav tau ua tib zoo npaj. Yog li ntawd, Yexus thiaj txib Petus thiab Yauhas mus npaj rau hmo ntawd. (Lk. 22:7-13) Txij thaum ntawd los, txhua xyoo cov Khixatia uas ua Kevcai Nco Txog Yexus yuav tsum ua tib zoo npaj li ntawd thiab. (Lk. 22:19) Peb yuav tau npaj tej twg rau hmo ua Kevcai Nco Txog Yexus rau lub 4 Hlis tim 3 uas yuav los no?

Cov Txwj Laus Yuav Tau Npaj Dabtsi:

Npaj seb yuav mus sib ntsib tom Tsev Nceeg Vaj lossis lwm lub tsev. Lub tsev ntawd yuav tsum muaj rooj zaum kom txaus, muaj teeb cig kom pom kev lam lug, thiab muaj cua hliv laws. Ua ntej hmo ntawd, tu lub tsev kom huv siab si.
Xaiv ib tug kwvtij uas txawj qhia ua tus qhia, ib tug kwvtij ua tus coj, thiab ob tug kwvtij thov Vajtswv rau lub ncuav thiab khob cawv.
Yog muaj ntau tshaj ib lub koom txoos uas yuav mus sib txoos rau tib lub tsev xwb, npaj zoo zoo seb lub koom txoos twg yuav mus rau lub sijhawm twg, seb yuav nkag lub qhov rooj twg tawm lub twg, thiab seb tsheb yuav nkag qhovtwg tawm qhovtwg.
Xaiv ib co kwvtij ua cov tub ncig num thiab ib co ua cov thiab ncuav thiab cawv.
Npaj cov ncuav thiab cawv uas tsim nyog siv nrog rau cov phaj, cov khob, lub rooj, thiab daim ntaub pua rooj.

Cov Tshaj Tawm Yuav Tau Npaj Li Cas:

Npaj mus caw kom tau coob tus tuaj koom ua Kevcai Nco Txog Yexus.
Muab cov uas peb kawm Vajlugkub nrog, cov uas txheeb ze peb, cov uas peb nrog kawm ntawv, cov uas peb nrog ua haujlwm, thiab lwm tus uas peb paub tej npe sau cia es thiaj mus caw tau lawv.
Nyeem thiab ua zoo xav txog cov nqe Vajlugkub uas teem tseg nyeem rau lub caij ua Kevcai Nco Txog Yexus.
Hmo ua Kevcai Nco Txog Yexus, npaj tuaj kom txog ntxov es thiaj tau tos txais qhua.