Koj Puas Tau Npaj Koj Lub Siab Lub Ntsws Ua Kevcai Nco Txog Yexus?

Twb tau ib xyoos puag ncig zoj rov los txog rau lub caij ua Kevcai Hla Dhau. Yexus thiaj txib Petus thiab Yauhas nkawd mus npaj ib cha tseg cia. (Lukas 22:7-13; saib daim duab ntawm plhaub.) Twb ze ze rau lub sijhawm Yexus yuav ncaim sawvdaws mus. Nws thiaj qhia ib txoj kevcai tshiab rau lawv taug lawm yav tom ntej kom nco ntsoov nws. Yog li ntawd, cia peb npaj peb lub siab lub ntsws ua kevcai nco txog Yexus rau lub 3 Hlis xiab 27. Txawm twb xaiv tus cev lus qhuab qhia, npaj lub ncuav, kua cawv txiv hmab, thiab lwm yam txhij txhua lawm los, tseem tshuav ntau yam koj yuav tau ua.

Kav tsij npaj lub siab lub ntsws. Nyeem tej nqi Vajlugkub hom tseg cia ua kevcai nco txog Yexus. Koj mus nrhiav tau daim kom tswj nyob hauv phau Niaj Hnub Tshawb Nrhiav Phau Vajlugkub thiab phau Vajlugkub ua lus Askiv New World Translation of the Holy Scriptures ntawm sab Appendix B12 (B12-A The Final Week of Jesus’ Life on Earth (Part 1); B12-B The Final Week of Jesus’ Life on Earth (Part 2)). (Mus saib ntxiv hauv phau Lub Neej Thiab Tes Haujlwm Khixatia lub 4 Hlis xyoo 2020.) Muab cov nqi ntawd coj los ua tib zoo zaum tsaws xav seb yog li cas rau li cas. Yog nej cuab yim neeg xav kawm ntxiv, nej mus saib tau Yehauvas Cov Timkhawv Phau Ntawv Tshawb Nrhiav Vajlugkub.

Mus yaum tibneeg tuaj. Lauj sijhawm mus yaum tibneeg tuaj ua kevcai nco txog Yexus. Koj mus yaum tau cov koj qhia Vajlugkub rau, cov koj qhia Vajlugkub rau yav tas los, koj cov kwvtij neej tsa los yog cov koj paub. Zoo rau cov txwj laus yaum cov tsis tuaj kev sib txoos tsis mus qhia Vajlugkub tau ntev loo lawm. Yog tus koj yaum nyob ntuj ncua kev deb, mus xyuas seb nws yuav mus sib txoos tau rau thaj chaw twg hauv lub vej xaij jw.org/hmn. Xaiv ntu NTSIG TXOG PEB ntawm lub ntsiab “Ua Kevcai Nco Txog Yexus.”

Tseem tshuav yam twg koj ua tau ntxiv?