Peb Yam Uas Yuav Pab Koj Txawj Qhia Ntxiv
1. Vim li cas peb yuav tsum xyaum kom peb txawj qhia Vajlugkub ntxiv?
1 Txhua tus Khixatia muaj tes haujlwm qhia txoj xov zoo rau lwm tus. Tsis hais thaum peb xub ntsib ib tug twg, peb rov qab mus xyuas nws, lossis pib kawm Vajlugkub nrog nws, peb xav qhia qhov tseeb rau nws. Txoj xov uas peb qhia yuav pab kom tibneeg nkag siab “Vajtswv txojlus,” lawv thiaj “paub txojkev dim.” (2Tmt. 3:15) Yog li, txoj xov ntawd tseem ceeb heev. Tes haujlwm uas peb muaj yog ib qho koob hmoov zoo kawg nkaus, puas yog? Cia peb kawm txog peb yam uas yuav pab kom peb txawj qhia Vajlugkub ntxiv.
2. Peb yuav qhia Vajlugkub li cas luag thiaj nkag siab yoojyim?
2 Qhia Yooj Yoojyim Xwb: Tej zaum peb paub Vajlugkub zoo, ces peb xav tias yuav yoojyim rau lwm tus kawm thiab. Tiamsis nco ntsoov tias, tsis yoojyim rau tibneeg nkag siab tej yam uas lawv tsis tau kawm dua li. Thaum koj qhia Vajlugkub, tsis txhob piav txog ntau yam. Ib txhia xav yuam kev tias yog peb qhia ntau ces tus kawm yuav hajyam nkag siab. Zoo rau koj qhia tej ntsiab tseem ceeb xwb. (P.L. 10:19) Tsis tas koj yuav nyeem txhua nqe Vajlugkub. Zoo rau koj nyeem tej nqe uas txhawb lub ntsiab xwb. Ib nqes twg, yuav muaj ntau lub ntsiab, tiamsis tham txog cov lus uas phim lub ntsiab uas neb tabtom kawm. Xav txog Yexus zaj lus qhuab qhia saum roob, ntawm Mathai tshooj 5 txog 7. Yexus qhia tej ntsiab lus tob heev thiab muaj kuab kawg li, tiamsis nws muab tej lus piv txwv uas yoojyim nkag siab thiab nws tsis piav ntev piav ntau.
3. Vim li cas tseem ceeb rau peb siv lus piv txwv thiab siv duab, thiab peb yuav siv tej lus piv txwv li cas thiaj zoo?
3 Siv Lus Piv Txwv Thiab Siv Duab: Yog peb siv lus piv txwv qhia yuav raug siab dua, yuav ua rau tus neeg ntawd muab lub ntsiab los ua tib zoo xav, thiab yuav pab nws nco tau. Tsis txhob xav tias tus uas txawj txawj qhia, thiaj piav tau tej lus piv txwv zoo xwb. Ntau zaus Yexus tsuas qhia tej lus piv txwv uas luv luv thiab yoojyim nkag siab xwb. (Mth. 7:3-5; 18:2-4) Tsis tas li ntawd, yog peb kos duab ua piv txwv qhia, tej zaum yuav pab tau nws thiab. Yog tias koj ua tib zoo npaj ua ntej thaum koj mus qhia Vajlugkub, koj yuav xav tau tej lus piv txwv uas yuav pab tau lwm tus.
4. Peb yuav siv lus nug zoo li cas thiaj pab tau cov uas kawm?
4 Siv Lus Nug: Yog peb txawj nug, peb yuav pab kom tus uas kawm xav tau lub ntsiab tawm. Ua siab ntev tos, nws xav tau tso, cia nws mam li teb. Tsis txhob maj qhia lo lus teb rau nws. Yog koj cia li qhia hlo rau nws xwb, koj yuav tsis paub tias nws puas nkag siab tiag. Yog nws teb yuam kev, ua ob peb yam nug, nws thiaj paub teb. (Mth. 17:24-27) Tsis muaj ib tug yuav txawj txawj qhia heev. Phau Vajlugkub thiaj txhawb kom peb ua tib zoo ntsuam xyuas tej uas peb qhia. Yog peb xyaum li ntawd, yuav cawm tau peb, thiab cov uas mloog txojsia.—1Tmt. 4:16.