Txhob Tav Koj Txoj Hau Kev​—Txawm Tias Tsis Muaj Sijhawm

1. Vim li cas ib txhia tsis xav nug seb tibneeg puas kam kawm Vajlugkub?

¹ Muaj ib txhia tsis xav nug seb tibneeg puas kam kawm Vajlugkub, vim lawv tsis muaj sijhawm qhia. Yuav tau lauj sijhawm zias, thiaj pab tau ib tug uas kawm Vajlugkub. Yuav tsum siv sijhawm npaj zaj kawm ua ntej tso, xyaum seb yuav qhia li cas, thiab pab kom nws tiv dhau tej kev sim siab thiab kev tsim txom uas nws yuav ntsib. Tus tubtxib Povlauj tau hais tias nws muab nws tus kheej pub rau cov uas nyob hauv Thexalaunika, kom lawv thiaj tau los paub txog Yehauvas. (1Thxk. 2:7, 8) Txawm tias peb tsis khoom li los, peb yuav tau npaj li cas peb thiaj qhia tau ib tug uas xav kawm Vajlugkub?

2. Yog tias peb hlub Yehauvas, peb yuav lauj sijhawm ua dabtsi?

² Lauj Sijhawm Thiaj Ua Tau Vajtswv Tes Num: Yog tias peb xav pe hawm Vajtswv, peb yuav tsum tau lauj sijhawm zias. Peb yuav tsum lauj sijhawm mus koom kev sib txoos, mus qhia Vajlugkub, nyeem Vajlugkub, thiab thov Vajtswv. Cov muaj txij nkawm uas tsis khoom kiag li, twb zoo siab hlo siv sijhawm nrog nws tus txij nkawm ua ke. Tsim nyog peb yim huab lauj sijhawm los pe hawm Yehauvas vim peb hlub nws. (Efx. 5:15-17; 1Yh. 5:3) Yexus qhia tias qhov uas peb nrhiav tibneeg los ua nws cov thwjtim, yog ib feem tseem ceeb ntawm peb txojkev pe hawm Vajtswv. (Mth. 28:19, 20) Yog tias peb nco ntsoov tej no rau nruab siab, peb yuav zoo siab hlo mus qhia cov uas xav kawm Vajlugkub.

3. Txawm muaj lwm yam haujlwm tab kaum los, peb yuav ua li cas mus qhia tau cov uas xav kawm Vajlugkub?

³ Peb yuav ua li cas mus qhia tau tus uas kawm yog tias, peb muaj haujlwm tab kaum, muaj txiab xeeb txiab nkeeg, lossis muaj lwm yam haujlwm los ntawm lub koom haum? Zoo rau peb nrhiav lwm txojkev mus qhia Vajlugkub rau cov uas xav kawm. Qee zaus uas muaj haujlwm tab kaum, ib txhia hu xov tooj mus qhia, lossis hu koos pis tawj (computer) mus qhia. Muaj tej tug timkhawv mus tsis tau vim muaj mob muaj nkeeg, lawv thiaj caw tus uas kawm tuaj kawm hauv lawv tsev. Thiab ib txhia ho npaj kom ib tug timkhawv uas xyeej, pab mus qhia.

4. Yog tias koj rau siab ntso mus qhia Vajlugkub rau cov uas xav kawm, koj yuav tau koob hmoov dabtsi?

⁴ Qhov uas Povlauj muab tag nrho nws lub dag lub zog thiab lub sijhawm mus qhia tibneeg txog qhov tseeb, ua rau nws muaj kev xyiv fab kawg li. (Ttx. 20:35) Nws ua Yehauvas tsaug thaum nws xav txog cov tibneeg hauv Thexalaunika uas nws tau pab. (1Thxk. 1:2) Txawm tias peb tsis muaj sijhawm ntau los, tsis txhob pub ib yam dabtsi tav peb txoj hau ke. Cia li lauj sijhawm mus qhia Vajlugkub, peb thiaj muaj kev xyiv fab puv npo.