Kev Pab Kawm Vajlugkub

TXHUA txhua lub lim tiam, puas yooj yim rau koj kawm phau Vajlugkub? Tej thaud koj puas laj kawm Vajlugkub? Muaj qee lub sij hawm peb yeej xav li ntawd. Tiam sis ua zoo xav seb txhua txhua hnub koj ua dab tsi rau dab tsi? Xws li koj yeej da dej. Ntxuav ib ce yeej siv sij hawm thiab siv dag siv zog tiam sis tom qab ntawd koj yeej laj khiam heev! Zoo ib yam li ntawd tom qab peb kawm Vajlugkub tag, peb yeej yuav zoo siab heev. (Efexus 5:26) Yog peb coj li cov ntsiab no yuav pab kom peb nyiam kawm Vajlugkub:

• Teem sij hawm. Kawm Vajlugkub rau yus tus kheej yog ib “yam uas tseem ceeb dua ntais” rau ib tug Khixatias lub neej. (Filipis 1:10) Yuav kom pab tau koj coj raws li koj twb teem tseg, koj yuav tau muab sau tseg cia rau ntawm ib qho cuab cuab tha xwv koj thiaj pom. Los sis koj kuj muab caws cia rau hauv koj lub xov tooj kom nrov koj thiaj li nco qab mus kawm.

• Xav seb dab tsi yuav pab tau koj. Puas yooj yim dua rau koj ua ob peb ntus kawm los sis thooj txhij kawm kom tag? Yog tias txog lub sij hawm uas koj teem tseg kawm es koj ho tsis muaj siab kawm, ua li koj puas kam kawm kaum feeb xwb? Txawm koj kawm kaum feeb xwb los koj yeej kawm tau tej yam tshiab. Tej zaud thaum koj pib kawm lawm kuj ua rau koj tsis xav tso tseg.​—Filipis 2:13.

• Xav ua ntej seb koj yuav kawm dab tsi. Yog koj twb los zaum kawm es koj mam li xav seb yuav kawm dab tsi ces twb yog koj tsis “siv txhua lub sijhawm kom muaj nqis.” (Efexus 5:16) Muab cov ntsiab uas koj xav kawm sau rau ib nplooj ntawv. Thaum twg yog koj tsis nkag siab ib yam dab tsi, muab sau cia. Tom qab koj kawm tag ib yam twg, tej zaud koj yuav xav txhab dua ib lub ntsiab rau lwm zaus.

• Paub yoog. Yoog koj lub sij hawm kawm Vajlugkub los sis cov ntsiab uas koj xav kawm. Qhov tseem ceeb yog koj kawm Vajlugkub txhua txhua lub lim tiam. Yuav kom koj ua tau li no tej zaum koj yuav tau hloov lub sij hawm koj kawm, seb koj yuav kawm hov ntev, los sis tej ntsiab koj kawm.

Yog peb kawm Vajlugkub rau peb tus kheej txhua txhua lub lim tiam ces peb yuav nrog Yehauvas sib raug zoo heev, txawj txiav txim siab rau lub neej, thiab peb yuav tau kev txhawb zog.​—Yausuas 1:8.