Leejtwg Thiaj Txaus Siab Nyeem Ob Phau Ntawv No?
1. Thaum peb nyeem phau The Watchtower thiab phau Awake! peb yuav tau ua dabtsi thiab yog vim li cas?
1 Phau The Watchtower thiab phau Awake! yog sau los pab tibneeg txhua tus thoob qab ntuj. Yog li ntawd, ob phau ntawv no thiaj muaj ntau lub ntsiab uas tham txog ntau yam. Thaum peb nyeem ob phau ntawv no, peb yuav tau ua tib zoo xav seb zaj twg phim tus twg es coj mus rau tus ntawd.
2. Ob phau ntawv no muaj tej ntsiab twg uas ntxim lwm tus siab thiab?
2 Phau The Watchtower uas nyuam qhuav tawm puas muaj tej lub ntsiab uas yav tas los koj thiab tus neeg koj nrog ua haujlwm tau tham txog? Thiab puas muaj ib zaj uas tham txog lub cuab lub yig uas yuav pab tau ib tug txheeb ze koj? Puas muaj ib tug koj paub uas yuav mus ua si rau ib lub tebchaws uas phau Awake! tau tham txog los lawm? Puas muaj tej phau The Watchtower los yog tej phau Awake! uas zoo coj mus tseb rau tej kiab tej khw, tej tsev ua haujlwm, lossis tej chaw ua haujlwm rau nom tswv hauv koj koog? Muab ua piv txwv li no, yog muaj ib phau The Watchtower lossis ib phau Awake! uas tham txog cov laus tej kev nyuaj siab, zoo coj mus tseb rau tej tsev laus. Yog muaj tej phau uas tham txog kev txhaum cai, zoo coj mus tseb rau tub ceev xwm tej chaw ua haujlwm.
3. Piav txog ib tug qauv uas tau tseb ib phau The Watchtower lossis ib phau Awake! rau tibneeg.
3 Neeg Yeej Nyeem Tiag: Thaum phau Awake! uas muaj lub ntsiab hu ua “How to Raise Responsible Children” (“Txawj Tu Tub Tu Kiv Kom Paub Ua Neej”) tawm rau lub 10 hli xyoo 2011, ib txij nkawm nyob rau nram South Africa tau hu xov tooj mus rau 25 lub tsev kawm ntawv hauv nkawd lub koom txoos tej koog seb lawv puas xav tau phau Awake! Muaj 22 lub tsev kawm ntawv xav tau. Tom qab cov tsev kawm ntawv tau txais phau Awake! lawd, cov tsev kawm ntawv kuj muab faib rau cov menyuam kawm ntawv thiab. Tsis tas li ntawd xwb, kuj muaj dua ib txij nkawm nyob rau tib lub tebchaws ntawd tau ua tib yam nkaus li txij nkawm no thiab. Hauv ib lub tsev kawm ntawv uas tau txais phau Awake! no, cov xibhwb qhia ntawv thiaj tau muab phau Awake! coj los siv txhua lub lim tiam thaum lawv sib ntsib thiab coj los nyeem thaum lawv qhia cov menyuam kawm ntawv. Txij nkawm no tau qhia qhov no rau tus saib xyuas thaj tsam. Tus saib xyuas thaj tsam thiaj li txhawb cov koom txoos uas nyob hauv nws thaj tsam kom mus xyuas cov tsev kawm ntawv uas nyob hauv lawv tej koog. Vim li no tibneeg thiaj tau sau ntawv ntau heev mus rau ceg nram South Africa kom xa phau Awake! ntxiv rau lawv. Yog li ntawd thiaj tau rov luam dua phau Awake! no ntxiv.
4. Vim li cas peb yuav tau tseb ob phau ntawv no rau txhua leej txhua tus?
4 Phau The Watchtower thiab phau Awake! pab peb pom tias vim li cas thiaj muaj tej xwm txheej tamsim no. Thiab ob phau ntawv no kuj pab kom tibneeg los kawm phau Vajlugkub thiab tso siab rau Vajtswv lub Nceeg Vaj. Thoob ntiajteb tsuas muaj ob phau ntawv no xwb thiaj “tshaj tawm txojkev cawm dim.” (Yxy. 52:7) Yog li ntawd, peb yuav tau tseb ob phau ntawv no rau txhua leej txhua tus. Yuav kom koj tseb tau, koj yuav tau xav txog lo lus nug no, ‘Leejtwg thiaj txaus siab nyeem ob phau ntawv no?’