Pib Kawm Vajlugkub Nrog Cov Uas Tau Txais Phau The Watchtower Thiab Awake! Mus Nyeem Txhua Hli
1. Vim li cas Yehauvas lub koom haum yeej ib txwm txhawb cov tshaj tawm kom coj phau The Watchtower thiab Awake! mus rau tibneeg nyeem txhua hli?
1 Coob leej tsis xav kawm Vajlugkub tiamsis lawv nyiam nyeem peb 2 phau ntawv The Watchtower thiab Awake!. Yog li Yehauvas lub koom haum thiaj txhawb kom cov tshaj tawm coj phau The Watchtower thiab Awake! mus rau cov ntawd. Yog tibneeg nyeem 2 phau ntawv no tsis tu ncua, yuav ua rau lawv nqhis Vajtswv txojlus. (1Pt. 2:2) Thaum kawg tej uas lawv nyeem yuav raug lawv lub siab thiab yuav ua rau lawv xav los kawm Vajlugkub.
2. Peb yuav ua li cas tus tswv tsev thiaj li xav kawm Vajlugkub?
2 Ywg Dej Rau Tej Noob: Thaum coj phau The Watchtower thiab Awake! mus rau tus tswv tsev, tsis txhob cia li muab rau nws xwb, yuav tau nrog nws tham kom koj thiab nws sib paub zoo. Yog koj ua li no, koj yuav paub txog nws lub neej, seb nws nyiam dabtsi thiab ntseeg dabtsi koj thiaj tau tswvyim los qhia nws. (P.L. 16:23) Yuav tau npaj txhua zaus koj rov mus xyuas nws. Yog muaj sijhawm, piav ib lub ntsiab thiab ib nqes Vajlugkub hauv phau The Watchtower lossis Awake! rau nws, thiaj li pab tau qhov tseeb uas cog rau hauv nws nruab siab lawd kom loj hlob. (1Khl. 3:6) Txhua zaus uas koj rov mus xyuas tus tswv tsev, koj yuav tau sau cia seb koj tau mus xyuas nws hnub twg, tau muab phau ntawv twg, tau tham txog tej ntsiab lus twg, thiab tau siv tej nqe Vajlugkub twg.
3. Hov ntev peb li rov mus xyuas tus tswv tsev?
3 Hov Ntev Mam Rov Mus Xyuas? Koj yuav tsum rov mus xyuas ib hlis ib zaug thiab coj phau The Watchtower thiab Awake! uas tawm tshiab mus rau lawv. Tiamsis, yog koj khoom thiab tus tswv tsev tsis xav li cas, koj xav rov mus xyuas nws ntau zaus los nyob ntawm koj. Yog tias koj tso phau The Watchtower thiab Awake! rau tus tswv tsev lawm, tom qab 1 lossis 2 lub lim tiam thaum koj rov mus xyuas nws koj kuj hais tau li no, “kuv rov tuaj nrog koj tham txog ib yam uas hais nyob hauv 2 phau ntawv kuv tau muab rau koj lawd.” Yog koj ua li no, yuav ua rau tus tswv tsev xav nyeem zaj uas tham txog yam ntawd. Yog nws twb nyeem tas zaj uas koj tabtom tham lawd, kuj nrog nws tham ntxiv txog zaj ntawd thiab nug seb nws xav li cas. Yog koj pom tias nws nyiam nyeem cov ntaub ntawv heev, thaum koj rov mus xyuas nws, muab ib daim ntawv tseb, ib phau ntawv me, lossis ib phau ntawv loj uas tseb rau lub hli ntawd rau nws.
4. Peb yuav tau ua li cas thiaj paub tias tus tswv tsev xav kawm Vajlugkub?
4 Koj yuav tsum yog tus xub nug tus tswv tsev seb nws puas xav kawm Vajlugkub, tsis txhob tos nws xub nug koj. Txawm yav tas los tus tswv tsev tsis xav kawm los, thaum koj rov mus xyuas nws, koj kuj siv lub ntsiab Bible Questions Answered (Lus Nug Thiab Lus Teb Txog Phau Vajlugkub) hauv phau The Watchtower los qhia nws seb nws puas xav kawm. Yog nws xav kawm, koj kuj nrog nws kawm Vajlugkub ntawm qhov rooj ua ntej. Tiamsis yog nws tsis xav, cia li rau siab ntso nqa phau The Watchtower thiab Awake! mus rau nws seb ib hnub twg puas yuav pab tau nws los kawm.