**Tej Uas Pab Kom Peb Txawj Ua Vajtswv Tes Num—Nrhiav Cov Uas Xav Tau Phau Tsom Faj Los Nyeem Txhua Hli**

Vim Li Cas Ho Tseem Ceeb: Coob leej uas nyiam nyeem peb Phau Tsom Faj tsis xav kawm Vajlugkub nrog peb. Tej zaum lawv txaus siab rau lawv txojkev ntseeg lawm, lossis lawv xav tias lawv tsis muaj sijhawm kawm Vajlugkub. Tiamsis thaum lawv nyeem peb Phau Tsom Faj tsis tu ncua, tej zaum yuav ua rau lawv nqhis Vajtswv Txojlus. (1Pt. 2:2) Thaum lawv nyeem, tej zaum ib zaj twg yuav raug lawv siab, lossis ho muaj qee yam txawv txav hauv lawv lub neej uas ua rau lawv qheb siab. Yog peb mus xyuas lawv tsis tu ncua es siv mentsis sijhawm nrog lawv tham kom lawv paub peb, qhov no yuav ua rau lawv qheb siab rau peb ces peb yuav paub tej uas lawv nyiam thiab txhawj xeeb txog. Tsis ntev ces tej zaum lawv yuav xav kawm Vajlugkub nrog peb.

Yuav Tau Ua Li Cas:

Txhua lub hlis, teem sijhawm nqa Phau Tsom Faj uas tawm tshiab mus rau tus uas nyiam nyeem. Lub hli ntawd koj kuj siv sijhawm mus xyuas nws dua es piav rau nws txog tej zaj hauv Phau Tsom Faj kom nws xav nyeem ntxiv, lossis nqa phau ntawv uas tseb rau lub hli ntawd mus rau nws. Muab tej ntaub ntawv koj tseb thiab tej neb tau tham txog sau cia.—Mus saib sab 4-5 hauv daim Tes Num Rau Lub Nceeg Vaj lub 1 Hlis xyoo 2014.
Txhua zaus koj rov mus xyuas nws, koj yuav tsum npaj ua ntej. Thaum koj rov nqa ib Phau Tsom Faj mus rau nws, tsis txhob cia li muab rau nws xwb, tiamsis nrog nws tham kom neb sib paub zoo xwv koj thiaj paub pab nws ntxiv.
Saib seb lub sijhawm twg thiaj zoo pib kawm Vajlugkub nrog cov uas nyiam nyeem Phau Tsom Faj. Yog cov ntawd ib tug nug koj txog ib lub ntsiab twg, nqa ib phau ntawv uas teb tau los lus nug ntawd mus rau nws es nrog nws kawm ua ke. Ua ntej koj mus, nug nws ib lo lus es lwm zaus mam rov mus teb. Yog koj siv phau Vajlugkub lossis ib phau ntawv nrog nws tham tsis tu ncua, txawm yog ib zaug twg kawm ib pliag xwb los, twb yog koj kawm Vajlugkub nrog nws lawm. Koj puas tau muab phau Xov Zoo rau tus tswv tsev es ua qauv qhia seb yog kawm Vajlugkub yuav kawm li cas xwb? Koj puas tau tso zaj yeeb yaj kiab Kawm Vajlugkub Ua Dabtsi? thiab zaj Kev Kawm Vajlugkub Zoo Li Cas? rau nws saib? Txawm yav tas los nws tsis xav kawm Vajlugkub los, yuav muaj qee yam txawv txav hauv nws lub neej. Puas tsim nyog koj rov nug seb nws puas xav kawm Vajlugkub?

Xyaum Li No Rau Lub Hli No:

Muab cov uas koj paub tias xav tau Phau Tsom Faj los nyeem txhua hli cov npe sau cia. Muab lub hli no Phau Tsom Faj rau lawv thiab hais rau lawv tias lwm zaus phau tshiab tawm, koj mam nqa dua mus rau lawv.