Koj Puas Ua Zoo Siv Lub Sijhawm Uas Tseem Muaj?
Lub Caij Ua Kevcai Nco Txog Yexus Yog Ib Lub Caij Rau Peb Qhia Tias Peb Nco Yehauvas Txiaj Ntsig
1. Lub caij ua kevcai nco txog Yexus yog ib lub caij rau peb ua dabtsi?
1 Peb yuav ua kevcai nco txog Yexus rau lub 4 Hlis tim 14. Lub caij ntawd yog ib lub zoo heev rau peb qhia rau Yehauvas tias peb nco nws txiaj ntsig rau tej yam zoo uas nws tau ua rau peb. Zaj uas hais nyob hauv Luka 17:11-18 qhia rau peb tias Yehauvas thiab Yexus nkawd zoo siab heev thaum peb nco txog nkawd tej txiaj ntsig. Nyob rau zaj ntawd, tsuas muaj ib tug mob ruas uas Yexus kho zoo thiaj rov los ua Yexus tsaug xwb. Yav tom ntej, tus nqe txhiv uas Vajtswv tau pub yuav kho tau txhua yam mob zoo huvsi, xwv txhua tus thiaj tau txojsia ib txhis. Lub sijhawm ntawd ntshe peb yuav niaj hnub ua Yehauvas tsaug rau tej koob hmoov uas nws tau muab rau peb. Yog li ntawd, peb yuav qhia li cas tias peb nco Yehauvas txiaj ntsig?
2. Yuav kom peb nco txiaj ntsig rau tus nqe txhiv, peb yuav tau ua dabtsi?
2 Paub Nco Txiaj Ntsig: Yog peb ua tib zoo xav txog tej uas ib tug twg tau ua rau peb, ces peb thiaj yuav paub nco tus ntawd txiaj ntsig. Qhov uas yuav pab tau peb nco Yehauvas txiaj ntsig rau tus nqe txhiv yog peb yuav tau nyeem cov nqe Vajlugkub uas teem tseg rau lub caij ua kevcai nco txog Yexus. Cov nqe Vajlugkub ntawd nyob hauv phau New World Translation uas kho tshiab ntawm cov lus qhia ntxiv B12, daim qhia hnub qhia hli thiab hauv phau Niaj Hnub Tshawb Nrhiav Phau Vajlugkub. Zoo rau peb nyeem cov nqe Vajlugkub no rau hmo tsev neeg pe hawm Vajtswv ua ke. Yog peb nyeem cov nqe Vajlugkub no ces peb yim huab yuav nco Yehauvas txiaj ntsig rau tus nqe txhiv thiab yuav pab tau peb coj zoo.—2Khl. 5:14, 15; 1Yh. 4:11.
3. Lub caij ua kevcai nco txog Yexus peb yuav ua li cas thiaj qhia tias peb nco Yehauvas txiaj ntsig?
3 Qhia Tias Koj Nco Txiaj Ntsig: Yog peb nco lwm tus txiaj ntsig, ces peb yuav nco ntsoov ua nws tsaug. (Khx. 3:15) Tus neeg mob ruas tau ua li ntawd, nws rov mus nrhiav Yexus thiab ua Yexus tsaug. Nws kuj zoo siab hlo qhia rau lwm tus txog qhov uas Yexus tau kho nws zoo lawm thiab. (Lk. 6:45) Yog peb nco Yehauvas txiaj ntsig rau tus nqe txhiv, peb yuav tau rau siab ntso mus caw tibneeg tuaj koom hmo ua kevcai nco txog Yexus. Peb kuj ua ib tug pab tho kev lossis siv sijhawm kom ntau zog mus caw tibneeg. Thiab yog peb nco Yehauvas txiaj ntsig, peb yuav siv sijhawm nrog cov uas tuaj tshiab tham thiab teb tej lus nug uas lawv muaj.
4. Peb yuav tau ua li cas xwv thaum dhau lub sijhawm ua kevcai nco txog Yexus lawm peb thiaj tsis xav txog lig?
4 Puas yog peb tsuas ua kevcai nco txog Yexus rau xyoo no lawm xwb? (1Khl. 11:26) Hais txog qhov ntawd, peb tsis paub. Tiamsis yog peb tsuas ua rau xyoo no lawm xwb, ces yuav tsis muaj ib zaug ntxiv rau peb qhia tias peb nco Yehauvas txiaj ntsig lawm. Yog li koj puas yuav zoo siab ua npaum li koj ua tau los qhia tias koj nco Yehauvas txiaj ntsig? Yog koj nco Yehauvas txiaj ntsig tias nws yog tus uas npaj tus nqe txhiv ces cia koj lub siab thiab lub qhov ncauj los qhuas Yehauvas.—Nt.Nk. 19:14.