“Cia Li Ua Zoo Kawg Nkaus Rau Hauv Lwm Haiv Neeg”

1. Vim li cas ho tseem ceeb rau peb coj cwj pwm zoo thaum peb mus koom cov rooj sib txoos rau xyoo no?

¹ Txhua xyoo tibneeg yeej saib ntsoov peb thaum peb mus cov rooj sib txoos. Yog li ntawd, tseem ceeb rau peb coj cwj pwm zoo vim peb yog cov uas sawv Vajtswv Yehauvas cev. (L.Kc. 20:26) Peb tus cwj pwm thiab tej tsoos tsho uas peb hnav yuav tsum qhia tias peb yog Yexus cov thwjtim. Yog li, thaum peb mus cov rooj sib txoos loj lossis cov rooj sib txoos rau ntau tebchaws, peb yuav “ua zoo kawg nkaus rau hauv lwm haiv neeg” li cas es thiaj ua rau peb Leej Txiv Yehauvas tau ntsej muag?—1Pt. 2:12.

2. Thaum mus lub rooj sib txoos, peb yuav tau coj cwj pwm zoo rau lub sijhawm twg?

² Coj Cwj Pwm Zoo: Txojkev hlub uas peb muaj rau peb cov kwvtij nkauj muam thiab qhov uas peb ua zoo rau “cov uas nyob sab nraud” ua rau peb txawv ntawm lub qab ntuj no tus cwj pwm. (Khx. 3:10; 4:5; 2Tmt. 3:1-5) Peb yuav tsum ua siab zoo thiab siab ntev rau cov neeg ua haujlwm tom tej tsev so thiab tej khw noj mov txawm tias lawv ua tsis tau raws li peb siab xav. Thiab peb yuav tsum paub cai es tso mentsis nyiaj rau cov uas ua haujlwm pab peb.

3. Cov niam txiv yuav tsum ua dabtsi thiab vim li cas lawv yuav tsum ua li ntawd?

³ Cov niam txiv yuav tsum saib xyuas lawv cov menyuam kom zoo tsis hais thaum nyob tom lub rooj sib txoos, tom tej khw noj mov, lossis tom tej tsev so. (P.L. 29:15) Ib tug uas saib xyuas chav noj mov hauv ib lub tsev so tau hais li no rau ob niam txiv: “Peb nyiam nej heev. Nej txhua tus tsis hais cov laus lossis cov menyuam puavleej paub cai thiab coj tau zoo kawg li. Txhua tus uas ua haujlwm ntawm no qhuas nej heev thiab peb xav kom txhua Hnub 6 thiab Hnub 7 nej yog cov uas tuaj so ntawm no xwb.”

4. Tsim nyog peb hnav tej tsoos tsho zoo li cas thaum peb nyob hauv lub nroog uas muaj lub rooj sib txoos?

⁴ Hnav Tsoos Huv Siab Si: Thaum peb mus lub rooj sib txoos, peb yuav tsum hnav tej tsoos tsho uas tsim nyog hnav thiab huv siab si, tsis txhob hnav li tej tibneeg hauv lub qab ntuj no. (1Tmt. 2:9) Thaum peb mus txog tom lub tsev so lossis tawm ntawm lub tsev so los tsev thiab thaum peb mus ua si, peb yuav tsum nco ntsoov hnav tej tsoos tsho kom du lug es tsis txhob hnav ua dog ua dig. Yog peb hnav tej tsoos zoo, peb yuav tsis txaj muag coj daim ntawv qhia npe thiab qhia Vajlugkub rau lwm tus. Yog peb coj tau cwj pwm zoo thiab hnav tej tsoos tsho huv siab si thaum peb mus cov rooj sib txoos rau xyoo 2014, yuav pab tau cov uas muaj siab mos siab muag los paub phau Vajlugkub txoj xov uas cawm tau neeg txojsia thiab yuav ua rau Yehauvas zoo siab xyiv fab.—Xfny. 3:17.

Nco Ntsoov Tej No Rau Cov Rooj Sib Txoos 2014

◼ Sijhawm Pib Thiab Xaus: Yuav qheb qhov rooj rau thaum 8:00 sawv ntxov. Yuav tso suab nkauj thaum 9:20 sawv ntxov, rau 3 hnub tibsi. Thaum hnov suab nkauj nrov, sawvdaws yuav tau mus zaum. Hnub 5 (Friday) thiab Hnub 6 (Saturday) lub rooj sib txoos yuav xaus thaum 4:55 tsaus ntuj. Hnub 7 (Sunday) yuav xaus thaum 3:50 tsaus ntuj.

◼ Cov Rooj Sib Txoos Rau Ntau Tebchaws: Tej qho chaw thiaj muaj cov rooj sib txoos rau ntau tebchaws. Nco ntsoov tias ceg uas nyob rau koj lub tebchaws tsuas caw tau qho lub koom txoos thiab qho tus uas nyob txawv tebchaws tuaj koom, rau qhov tsuas muaj rooj zaum, chaw nres tsheb, thiab tej tsev so txaus cov ntawd xwb. Yog cov uas tsis raug caw mus koom cov rooj sib txoos rau ntau tebchaws ntawd ces yuav tsis muaj chaw txaus sawvdaws. Yog koj mus koom tsis tau lub rooj sib txoos loj nrog koj lub koom txoos, koj yuav tsum mus rau lwm lub rooj sib txoos loj xwb, tsis txhob mus koom cov rooj sib txoos rau ntau tebchaws.

◼ Chaw Nres Tsheb: Nyob rau cov rooj sib txoos uas cov kwvtij tau hom chaw nres tsheb tseg lawm, peb nres dawb xwb. Tiamsis zoo rau peb tuaj ntxov, thiaj tau chaw nres. Vim tsis muaj chaw nres tsheb ntau, zoo rau peb thauj lwm tus lossis nrog lwm tus tuaj ua ke. Cov chaw nres tsheb uas tau hom tseg rau cov uas cev tsis meej xeeb, cov uas muaj ntaub ntawv nres thiaj nres tau xwb.

◼ Hom Chaw Zaum: Txhua tagkis thaum qheb qhov rooj rau lub rooj sib txoos, thov tsis txhob khiav mus txeeb rooj zaum. Peb yuav tsum xav txog lwm tus es cia lawv ua ntej thiaj qhia tias peb yog cov tseem Khixatia thiab thiaj ua rau lwm tus qhuas Yehauvas. (Yh. 13:34, 35; 1Khl. 13:4, 5; 1Pt. 2:12) Thov hom rooj rau koj tsev neeg, cov uas nrog koj caij tib lub tsheb, thiab cov uas koj tseem qhia Vajlugkub rau xwb. Muaj tej leej rooj tau muab hom tseg rau cov laus lossis cov muaj mob zaum xwb. Cov rooj no tsis muaj ntau lub, yog li ntawd tsuas pub ib ob tug nrog cov ntawd zaum es saib xyuas lawv xwb.

◼ Ntim Su: Thov ntim su tuaj noj es thiaj tsis tau tawm mus yuav sab nraud. Nqa cov taub txias uas haum qab rooj xwb. Tsis pub nqa cov taub txias loj loj, thiab tsis pub nqa lam hwj tuaj.

◼ Pab Nyiaj Siab Dawb: Cov nyiaj siab dawb yuav pab txhawb tes haujlwm tshaj tawm txoj xov zoo thoob qab ntuj. Yog koj sau tshev (check) nyiaj, sau rau “Christian Congregation of Jehovah’s Witnesses.” Yog koj xav siv koj daim debit lossis credit los kuj tau thiab.

◼ Tshuaj: Nco ntsoov tias lub rooj sib txoos tsis muaj tshuaj nyob rau hauv. Yog koj noj cov tshuaj uas kws kho mob muab, thov nqa kom txaus noj. Yog koj txhaj tshuaj rau ntshav qab zib, tom qab txhaj tas, thov muab pov tseg kom raws kevcai. Tsis pub muab pov tseg rau hauv cov thoob uas txawb puag ncig lub rooj sib txoos loj. Nyob tom tsev so los, yuav tau muab rab koob pov tseg raws kevcai ib yam thiab.

◼ Yuav Tau Xyuam Xim: Thov ua tib zoo saib thiaj tsis dawm ntog ua rau koj raug mob. Ib xyoos twg muaj coob tus ntog raug mob, vim lawv rau tej khau tsis zoo, xws li cov khau luj siab. Zoo rau koj xaiv tej nkawm uas yoojyim rau koj nce toj nqes hav, nce ntaiv nqes ntaiv, thiab taug tej kev uas tsis xwm yeem.

◼ Tsis Hnov Lus Zoo: Cov kwvtij yuav tso tawm cov lus qhuab qhia hauv xov tooj cua thiab. Yog tias koj xav mloog, nco ntsoov nqa ib lub xov tooj cua me me tuaj, thiab nqa txoj hlua mloog ntawm pob ntseg.

◼ Cov Tawb Laub Menyuam Thiab Cov Rooj Quav: Tsis pub nqa cov tawb laub menyuam thiab cov rooj quav tuaj rau hauv lub rooj sib txoos. Tiamsis yog menyuam lub rooj zaum haum lub rooj ntawm niam txiv ib sab, ces nqa los tau.

◼ Tshuaj Tsw Qab: Ntau zaus, cov rooj sib txoos tsuas nyob hauv tej tsev uas muaj kiv cua thiab cua txias xwb, tsis muaj qhov rais qheb rau cua los hauv tsev. Yog li ntawd, thov xav txog lwm tus es tsis txhob tsuag tshuaj tsw qab ntau ntau, nyob tsam tsis haum ib txhia lossis ua rau lawv mob.—1Khl. 10:24.

◼ Daim Ntawv Please Follow Up (S-43): Thaum mus lub rooj sib txoos, zoo rau koj nqa ib ob daim ntawv Please Follow Up. Yog thaum twg koj qhia Vajlugkub rau tibneeg tom tej kiab tej khw, koj thiaj tau daim ntawv ntawd sau lawv npe thiab chaw nyob cia. Tom qab ntawd nqa mus rau Chav Rau Ntawv, lossis nqa mus rau tus ceev ntawv hauv koj lub koom txoos.

◼ Khw Noj Mov: Peb yuav tsum hnav tej tsoos zoo thiab paub cai thiaj qhuas tau Yehauvas. Yuav tsum tseg mentsis nyiaj rau tus neeg ua haujlwm yog tias lub tebchaws koj nyob yeej coj li ntawd.

◼ Tsev So:

Thov tsis txhob hom ntau chav pw yog koj pw tsis tas. Hom kom txaus rau koj tsev neeg pw xwb. Thiab ib chav twg tsis pub pw coob tshaj lub tsev so tso cai.
Tsis txhob rho npe tom qab hom chaw pw tas lawm. Yog muaj xwm loj es yuav tau rho npe, hu sai sai mus rau lub tsev so xwv lwm tus thiaj tau hom chav ntawd. (Mth. 5:37, NW) Yog koj yuav tau rho npe, kom lub tsev so muab ib tug zauv lossis nab npawb (number) rho npe rau koj. Yog tshuav 2 hnub xwb twb txog lub rooj sib txoos lawm es koj mam hu mus rho npe, ces lub tsev so yuav tsis thim cov nyiaj ceev cia rau koj.
Yog koj siv daim debit lossis credit los rau npe tom lub tsev so, lub tsev so muaj cai rho nyiaj hauv koj daim debit lossis credit los ceev cia kom txaus them chav koj hom tseg thiab lwm yam nuj nqes uas koj muaj. Koj yuav siv tsis tau cov nyiaj ceev cia ntawd mus txog thaum them koj tej nuj nqes tas tso.
Thaum txog tom tsev so, tsis txhob mus laub lub laub phij xab los cia yog koj tsis tau maj siv. Thiab thaum siv tas, yuav tsum xa sai sai rov qab mus xwv lwm tus thiaj tau siv.
Yog lub tebchaws uas koj nyob yeej ib txwm muab mentsis nyiaj pub rau cov neeg ua haujlwm hauv lub tsev so, ces zoo rau koj muab mentsis nyiaj rau tus nqa phij xab thiab tus tu tsev.
Ua zaub ua mov hauv tej chav uas tso cai ua xwb.
Muaj tej lub tsev so pub tshais, kas fes (coffee), los yog dej khov rau cov tuaj so rau hauv. Tsis txhob nqa tshaj li koj yuav noj thiab haus thiab tsis txhob nqa mus tom lub rooj sib txoos.
Cov neeg ua haujlwm hauv lub tsev so yuav tau pab thiab saib xyuas coob tus. Yog li ntawd, peb yuav tau ua siab zoo thiab siab ntev rau cov neeg ntawd xwv lawv thiaj kaj siab ua haujlwm.
Zoo rau cov niam txiv zov rawv lawv cov menyuam txhua lub sijhawm, tsis hais thaum mus da dej ua si, thaum nyob hauv chav tos txais qhua, thiab thaum mus lwm qhov chaw.
Tus nqe hauv daim Recommended Lodging List yog tus nqe them rau txhua hmo xwb. Koj yuav tau them se nrog thiab. Yog tias lub tsev so kom koj them tshaj li tus nqe hauv daim Recommended Lodging List, tsis txhob them. Cia li mus qhia cov kwvtij hauv Chav Saib Xyuas Chaw Pw paub sai li sai tau.
Yog tias koj muaj teeb meem li cas tom tsev so, qhia rau Chav Saib Xyuas Chaw Pw paub, lawv thiaj pab tau koj.

◼ Pab Ua Haujlwm: Yog leejtwg xav pab ua haujlwm tom lub rooj sib txoos, mus qhia rau cov kwvtij hauv Chav Pab Ua Haujlwm paub. Cov hluas uas tsis tau muaj 16 xyoo kuj pab tau thiab, tiamsis yuav tau nrog lawv niam lawv txiv lossis cov saib xyuas lawv ua ke. Yog leej niam leej txiv lossis tus saib xyuas nws tso cai rau nws nrog ib tug laus ua haujlwm ua ke, los kuj tau thiab.