Cov Ntawv Tseb Tshiab
1. Peb muaj cov ntaub ntawv tshiab twg los pab peb ua Vajtswv tes num?
1 Muaj 5 daim ntawv tseb tawm tshiab rau lub rooj sib txoos loj ‘Vajtswv Txojlus Yog Txoj Tseeb!’ rau xyoo 2013. Tsis tas li ntawd xwb, kuj muaj dua ib daim ntxiv thiab uas yog daim Lub Nceeg Vaj Zaj Xov Xwm 38 uas hu ua “Cov Tuag Puas Yuav Sawv Tau Rov Los Ua Neej Nyob Tiag?” Rau daim ntawv tseb tshiab no txawv cov uas peb tau siv yav tas los. Cov ntawv tseb no ho txawv li cas? Thaum peb mus qhia Vajlugkub ib lub tsev rau tsev, peb yuav siv cov ntawv tseb tshiab no li cas?
2. Cov ntawv tseb tshiab yuav pab tau peb qhia Vajlugkub li cas?
2 Txawv Li No: Thaum peb mus qhia Vajlugkub ib lub tsev rau tsev, peb kheev hais li nram no: (1) Nug ib lo lus rau tus tswv tsev xav. (2) Nyeem ib nqes Vajlugkub rau tus tswv tsev mloog. (3) Muab ib daim ntawv lossis ib phau ntawv rau tus tswv tsev nyeem. (4) Nug tus tswv tsev ib lo lus es lwm zaus mam rov mus teb. Cov ntawv tseb tshiab yuav pab tau peb qhia Vajlugkub li 4 nqes saum no.
3. Peb yuav mus tseb cov ntawv tseb tshiab li cas?
3 Yuav Tseb Li Cas: (1) Tom qab tus tswv tsev hu koj tas, muab daim ntawv tseb rau nws saib thiab qhia nws txog lo lus nug uas nyob rau sab 1 seb nws xav li cas. (2) Nthuav daim ntawv tseb mus rau sab 2 thiab sab 3 es tham lub ntsiab “Phau Vajlugkub Qhia Li No.” Thaum twg zoo nyeem, nthuav koj phau Vajlugkub es nyeem nqe Vajlugkub uas nyob rau ntawd rau nws mloog. Yog tus tswv tsev muaj sijhawm, mus tham lub ntsiab “Phau Vajlugkub Yuav Pab Tau Koj Li No” nrog nws ntxiv. (3) Muab daim ntawv tseb rau tus tswv tsev thiab txhawb kom nws nyeem thaum nws muaj sijhawm. (4) Ua ntej koj mus, qhia lo lus nug uas nyob rau sab kawg nkaus ntawm lub ntsiab “Kawm Ntxiv” rau nws thiab teem sijhawm rov mus tham lo lus teb hauv phau Vajlugkub rau lwm zaus.
4. Thaum koj rov mus xyuas tus tswv tsev, koj yuav qhia nws li cas?
4 Thaum koj rov mus xyuas los yeej tsis nyuaj li. Koj cia li siv cov nqe Vajlugkub nyob rau sab kawg nkaus ntawm lub ntsiab “Kawm Ntxiv” los teb lo lus nug uas zaum tas los koj qhia rau nws. Ua ntej koj mus, kom tus tswv tsev saib daim duab txog phau Xov Zoo uas nyob rau sab kawg nkaus. Muab ib phau los rau nws saib thiab nthuav mus rau zaj uas muaj lub ntsiab uas neb tabtom tham ntawd. Tom qab ntawd, muab ib phau rau nws. Yog nws txais lawd, teem sijhawm rov mus nrog nws kawm phau Xov Zoo. Thaum koj ua li no, ces twb yog koj kawm Vajlugkub nrog nws lawm. Yog koj tsis muab phau Xov Zoo rau nws los, koj kuj muab lwm daim ntawv tseb rau nws thiab teem sijhawm rov mus nrog nws tham txog daim ntawv tseb ntawd.
5. Cov ntawv tseb pab tau peb npaum li cas?
5 Peb twb siv cov ntawv tseb mus ua Vajtswv tes num tau tshaj 130 xyoo lawm. Txawm cov ntawv tseb no yuav loj yuav me thiab yuav zoo li cas los yeej yog ib yam twj uas pab tau peb ua Vajtswv tes num zoo heev. Yog li ntawd, cia peb ua tib zoo siv cov ntawv tseb tshiab no mus tshaj tawm txoj xov zoo kom thoob ntiajteb.—P.L. 15:7a.