Yuav Tau Mus Xyuas Kom Sai

Txij thaum peb muab peb lub Vej xaij kho dua tshiab los, tau muaj cov uas rau npe kawm Vajlugkub rau hauv lub Vej xaij coob heev. Tsis tas li ntawd xwb, thaum mus qhia Vajlugkub rau tom tej kiab tej khw lossis tej chaw uas muaj neeg coob mus mus los los kuj muaj coob tus rau npe kawm Vajlugkub uas tau muab tso rau hauv lub Vej xaij thiab. Thaum ceg uas nyob rau koj lub tebchaws txais tau cov npe no lawm, lawv muab xa mus rau cov koom txoos sai li sai tau. Piv txwv, yog muaj ib tug twg rau npe rau hauv lub Vej xaij jw.org, ob hnub xwb ceg uas nyob rau koj lub tebchaws twb xa tau tus ntawd npe mus txog lub koom txoos uas nyob ze nws lawm. Tiamsis hnov tias muaj tej txhia uas rau npe kawm Vajlugkub lawm, tau tsheej lub lim tiam los, tsis muaj leejtwg mus xyuas lawv li. Yuav ua li cas peb thiaj mus xyuas tau cov uas rau npe kawm Vajlugkub ua ntej uas lawv hloov siab tsis xav kawm?​—Mk. 4:14, 15.

Yog muaj ib tug uas tsis nyob rau koj lub koom txoos thaj tsam xav kawm Vajlugkub, muab nws npe sau rau hauv daim Please Follow Up (S-43) es muab rau tus ceev ntawv hauv lub koom txoos sai sai, tsis pub dhau txojkev sib txoos uas yuav los tom ntej. Tus ceev ntawv hauv lub koom txoos yuav tsum muab xa mus rau lub koom txoos uas nyob ze tus uas xav kawm Vajlugkub lossis muab xa hauv lub Vej xaij jw.org hauv kab uas sau tias “Congregation” mus rau ceg uas nyob rau nws lub tebchaws tsis pub dhau ib lossis ob hnub. Cov txwj laus yuav tsum mus saib lub Vej xaij txhua txhua hnub. Yog thaum twg pom muaj cov uas rau npe kawm Vajlugkub, lawv yuav tsum nrhiav ib tug mus xyuas sai sai. Tus ntawd yuav tsum maj nroos mus xyuas. Yog mus tsis ntsib tus neeg ntawd, zoo rau koj sau koj npe thiab xov tooj cia rau nws.