Txojkev Tshaj Tawm Tshiab Rau Tej Chaw Muaj Neeg Coob
1. Lub koom haum txhawb kom cov koom txoos uas muaj tej thaj chaw muaj neeg coob dua kev mus tshaj tawm li cas rau tej thaj chaw ntawd?
1 Yog lub koom txoos twg muaj tej thaj chaw uas muaj neeg coob dua kev, lub koom haum xav kom mus teeb rooj teeb laub qhia Vajlugkub rau thaj chaw ntawd. Yog teeb laub, 1 tug zov xwb los tau. Tiamsis yog teeb rooj ces yuav tsum muaj 2 tug zov. Cov uas zov rooj thiab laub yuav tsum kheev hais lus thiab tham luag ntxhi. Yog muaj neeg los saib cov ntaub ntawv ces zoo rau tus tshaj tawm hais li no: “Koj puas tau xav dua tias phau Vajlugkub hais li cas txog lub ntsiab lus ko xwb?” Yog muaj coob tus mus, kom ib ob tug mus nyob tsis deb ntawm lub rooj lossis lub laub qhia rau cov dua kev.
2. Piav ib tug qauv tias thaum mus teeb rooj teeb laub qhia Vajlugkub yeej pab tau tibneeg tiag.
2 Vim muaj cov mus teeb rooj teeb laub thiaj li muaj coob tus los kawm Vajlugkub. Muaj ib tug ntxhais kawm ntawv qeb siab xav sau ib daim ntawv tshawb fawb txog Yehauvas Cov Timkhawv tiamsis nws nrhiav tsis tau ib lub Tsev Nceeg Vaj mus nug cov Timkhawv li. Ib lub lim tiam tom qab ntawd, nws pom Yehauvas Cov Timkhawv mus teeb rooj qhia Vajlugkub rau ntawm nws lub tsev kawm ntawv. Nws txawm pib kawm Vajlugkub ces tamsim no nws twb ua kevcai raus dej lawm. Tsis tas li ntawd xwb, nws kuj tau mus teeb rooj teeb laub qhia Vajlugkub lawm thiab.
3. Muaj ib txhia tshaj tawm hais li cas txog mus teeb rooj teeb laub qhia Vajlugkub?
3 Ib tug muam uas nyiam teeb rooj teeb laub qhia Vajlugkub hais tias: “Muaj ib txhia tibneeg niaj zaus los nqa Phau Tsom Faj thiab Awake! uas tawm tshiab. Tiamsis kuj muaj ib txhia tsis tau hnov txog Yehauvas Cov Timkhawv hlo li. Kuv pom tias yog mus qhia Vajlugkub li no yuav ntsib coob leej ntau tus.” Muaj dua ib tug muam hais ntxiv tias: “Txojkev tshaj tawm no yog ib txoj tshiab rau qhov tibneeg los ntawm yus thiab txawm lawv tsis nyiam los lawv xav paub seb yog ua dabtsi.”
4. Txhua lub lim tiam thaum peb mus teeb rooj teeb laub, vim li cas zoo rau peb mus teeb rau tib qho chaw, tib hnub, thiab tib lub sijhawm qub?
4 Txhua lub lim tiam thaum peb mus teeb rooj teeb laub, zoo rau peb mus teeb rau tib qho chaw, tib hnub, thiab tib lub sijhawm qub. Yog ua li no, tibneeg yuav swm peb ces lawv yuav tsis txaj muag los nrog peb tham thiab los nqa ntaub ntawv. Koj lub koom txoos puas tau mus teeb rooj teeb laub rau tej thaj chaw uas muaj neeg coob dua kev? Yog tau mus lawd, koj kuj nrog lawv mus thiab, kom koj nrog lawv zoo siab xyiv fab “tshaj tawm txog Vajtswv lub tebchaws.”—Luka 9:60.