Siv Koj Lub Sijhawm Kom Muaj Nuj Nqes Thaum Ua Vajtswv Tes Num
Xyoo 2014, Yehauvas Cov Timkhawv tau siv 1,945,487,604 txoos teev mus qhia Vajlugkub. Qhov no qhia tseeb tias peb yeej rau siab ntso ua Yehauvas tes num tsis tseg! (Nt.Nk. 110:3; 1Khl. 15:58) Vim “lub sijhawm uas teem cia twb tag zuj zus lawm,” peb puas siv lub sijhawm ua Vajtswv tes num mus nrhiav kom tau ntau tus neeg ntxiv?—1Khl. 7:29.
Yuav kom lub sijhawm mus ua Vajtswv tes num muaj nuj nqes, peb yuav tsum paub hloov kev qhia Vajlugkub. Xws li yog koj ib txwm siv ib ob txoos teev mus qhia Vajlugkub ib lub tsev rau tsev tiamsis tsis ntsib leejtwg li, koj puas kam hloov mus teeb rooj teeb laub seb puas ntsib tau tibneeg? Tej chaw ib thaj yeej zoo tsis thooj ib thaj. Txawm li ntawd los, yog koj ua raws li hais nram no tej zaum yuav pab koj siv tau koj lub sijhawm kom muaj nuj nqes es thiaj tsis “ntaus cua xwb.”—1Khl. 9:26.
Qhia Ib Lub Tsev Rau Tsev: Tau ntau xyoo, thaum sawv ntxov, cov tshaj tawm kheev mus qhia Vajlugkub ib lub tsev rau tsev ua ntej. Tiamsis vim muaj coob tus ua haujlwm nruab hnub, koj puas kam mus qhia ib lub tsev rau tsev rau yav tav su lossis yav lig thaum tibneeg los tsev los so lawd? Thaum nruab hnub, tej zaum yuav ntsib tibneeg coob dua yog mus qhia Vajlugkub rau tom tej kiab tej khw lossis tom tej kev uas muaj neeg coob dua kev.
Qhia Rau Tej Chaw Uas Muaj Neeg Coob Dua Kev: Thaum mus teeb rooj teeb laub qhia Vajlugkub, yuav tsum mus teeb rau tej chaw uas muaj neeg coob dua kev hauv lub koom txoos thaj tsam. (Mus saib daim Tes Num Rau Lub Nceeg Vaj, lub 7 Hli 2013, sab 5.) Yog ib thaj chaw uas tau hom tseg mus teeb rooj teeb laub rau ho tsis muaj neeg coob dua kev lawm ces Pab Kwvtij Uas Sawv Cev Cov Txwj Laus mam saib xyuas seb qhov chaw twg muaj neeg coob dua kev es mam mus teeb rau qhov ntawd.
Cov Rov Mus Xyuas Thiab Cov Kawm Vajlugkub: Koj puas kam teem sijhawm rov mus xyuas cov koj tau ntsib lossis cov koj kawm Vajlugkub nrog rau lub sijhawm uas mus ib lub tsev rau tsev lossis mus teeb rooj teeb laub es tsis tshua ntsib tibneeg? Xws li yog koj mus qhia Vajlugkub ib lub tsev rau tsev rau Hnub 6 sawv ntxov es ntsib neeg dua, koj puas kam muab cov koj qhia Vajlugkub rau teem rau yav tav su lossis yav lig? Thaum rov mus xyuas cov ntsib dua lawd, puas tsim nyog ib lub tsheb mus ob peb leeg xwb xwv thiaj ua tas haujlwm ntau dua?
Txhua zaus peb mus qhia Vajlugkub peb yeej suav tau sijhawm, tiamsis yog peb mus ntsib tibneeg peb yuav zoo siab xyiv fab dua. Yog koj kheev siv koj lub sijhawm mus qhia Vajlugkub ib lub tsev rau tsev tiamsis tsis ntsib tibneeg li, koj kuj siv lub sijhawm ntawd mus teeb rooj teeb laub seb puas yuav ntsib tibneeg dua. Thov Yehauvas uas yog “tus tswv teb,” kom pab coj koj txoj hauv kev xwv koj thiaj paub siv koj lub sijhawm kom muaj nuj nqes thaum mus ua nws tes num!—Mth. 9:38.