Koj Puas Kam Mus Qhia Yav Tsaus Ntuj?
1. Muaj ib phau ntawv qhia tias, Povlauj mus tshaj tawm ib lub tsev rau ib lub, rau lub caij twg?
1 Phau ntawv hu ua Daily Life in Bible Times qhia tias, tus tubtxib Povlauj tau mus tshaj tawm txoj xov zoo ib lub tsev rau ib lub, “thaum 4 teev tsaus ntuj mus txog ib tag hmo.” Peb kuj tsis paub zoo xyov Povlauj mus qhia li cas tiag, tiamsis peb paub zoo tias Povlauj yeej “ua txhua yam vim yog saib rau txoj xov zoo.” (1Khl. 9:19-23) Povlauj yeej tsis cia ib yam dabtsi los tab kaum nws, rau lub caij uas zoo mus qhia ib lub tsev rau ib lub.
2. Vim li cas ho zoo rau peb mus qhia thaum yav tsaus ntuj thiab?
2 Nyob rau ntau lub tebchaws, Yehauvas cov Timkhawv feem coob mus qhia Vajlugkub ib lub tsev rau ib lub tsev, thaum yav sawv ntxov xwb. Tiamsis nyob hauv koj koog, tibneeg nyob tsev rau lub caij twg xwb? Tej zaum koj yuav tau mus tshaj tawm txoj xov zoo, thaum yuav tsaus ntuj thiaj ntsib tibneeg. Muaj ib tug tho kev tau hais tias: “Thaum nruab hnub tsis tshua ntsib tibneeg nyob hauv tsev, tiamsis thaum yuav tsaus ntuj yeej ntsib tibneeg dua.” Lub caij ntawd tibneeg kheev nrog yus tham dua, vim lawv los so lawm xwb. Yog li, zoo rau cov txwj laus teem caij sib txoos mus ua Vajtswv tes num, rau thaum yav tsaus ntuj thiab.
3. Yog peb mus qhia thaum yuav tsaus ntuj, peb yuav ua neeg thoob tsib li cas?
3 Ua Neeg Thoob Tsib: Thaum peb mus tshaj tawm rau lub caij uas yuav tsaus ntuj, peb yuav tsum ua neeg thoob tsib. Yog tias peb mus ntsib ib tug tswv tsev uas nws tabtom noj hmo, zoo rau peb qhia lawv tias lwm zaus peb mam li rov tuaj dua. Yog tias tsaus ntuj lawm, koj yuav tsum sawv rau ib qho chaw uas tus tswv tsev pom koj tseeb tseeb. Qhia koj lub npe rau nws, thiab qhia seb koj muaj haujlwm dabtsi nrog nws tham. Tsis tas li ntawd xwb, zoo rau koj coj ib tug nrog koj mus lossis mus ob peb leeg ua ke. Yuav tau xyuam xim, tsis txhob mus rau tej chaw tsaus ntuj nti uas tsis muaj neeg pom nej. Thov tsis txhob mus lig lig, tsam tus tswv tsev yuav mus pw. (2Khl. 6:3) Yog tias koog koj qhia, tsis zoo mus rau thaum tsaus ntuj, ces mus thaum tseem ntxov xwb.—P.L. 22:3.
4. Yog tias peb mus qhia thaum yav tsaus ntuj, peb yuav tau txais koob hmoov dabtsi?
4 Tej Koob Hmoov: Yog tias peb mus qhia rau lub caij uas ntsib tibneeg, peb yuav ua tau timkhawv rau coob leej, peb yuav muaj kev xyiv fab dua thiab tej zaum peb yuav pab tau lawv “txais kev dim thiab paub txojkev tseeb.” (1Tmt. 2:3, 4) Ua li koj puas kam teem ib lub sijhawm mus qhia Vajlugkub rau yav tsaus ntuj?