Cov Nkauj Tshiab Pe Hawm Yehauvas!
1 Lub 10 Hli tim 4 xyoo 2014 thaum muaj kev sib txoos txwm xyoo, lub Watch Tower Bible and Tract Society of Pennsylvania tau tshaj tawm tias yuav muab phau ntawv nkauj uas siv tamsim no kho dua tshiab. Cov lus tshaj tawm no yeej ua rau peb zoo siab kawg li! Hnub ntawd cov kwvtij pab sawvdaws nco ntsoov tias kev hu nkauj tseem ceeb npaum li cas hauv peb txojkev pe hawm Vajtswv.—Nt.Nk. 96:2.
2 Tej zaum koj yuav xav tias ua li cas ho muab cov nkauj kho dua tshiab. Muab cov nkauj kho dua tshiab rau qhov peb to taub phau Vajlugkub zoo zuj zus tuaj lawm. Yog li ntawd, yuav tau muab cov nkauj hloov kom phim tej uas peb to taub tshiab ntawd. (P.L. 4:18) Tsis tas li ntawd xwb, cov nkauj tamsim no tej lo yog rho los ntawm phau New World Translation yav tas los. Yog li yuav tau muab tej lo ntawd kho thiaj raws li phau New World Translation tamsim no. Vim yuav tau siv sijhawm ntau los kho cov nkauj, lub koom haum thiaj txiav txim siab sau ib co nkauj tshiab ntxiv rau hauv phau ntawv nkauj thiab.
3 Peb puas yuav tau tos thaum tawm ib phau nkauj tshiab es mam hu tau cov nkauj no? Peb tsis tau tos. Peb zoo siab qhia rau nej paub tias yuav muab cov nkauj tshiab tso ua ntu zus hauv lub Vej xaij, jw.org plaub tsib lub hlis tom ntej no. Thaum twg tawm ib zaj nkauj tshiab, yuav muab tso rau hauv daim kom tswj tias yog “zaj nkauj tshiab” hu thaum xaus Kev Kawm Ua Vajtswv Tes Num.
4 Xyaum Hu Cov Nkauj Tshiab: Yeej nyuaj heev los kawm ib zaj nkauj tshiab. Txawm li ntawd los, zoo rau peb hu nkauj thaum mus tej kev sib txoos es “tsis txhob nyob twjywm” xwb. (Nt.Nk. 30:12) Xyaum li nram no thiaj paub hu cov nkauj tshiab.
Mloog cov suab nkauj uas tau muab tso rau hauv peb lub Vej xaij. Yog koj yimhuab mloog cov suab nkauj ntawd ces koj yuav yimhuab cim tau lub suab.
Kawm cov lus hauv zaj nkauj thiab cim kom tau cov lus ntawd.
Hu raws cov suab nkauj. Xyaum tas xyaum thiab txog thaum hu kiag tau zaj nkauj.
Xyaum cov nkauj tshiab thaum koj tsev neeg pe hawm Vajtswv ua ke. Txhua lub lim tiam xyaum ob peb lwm txog thaum sawvdaws hu tau lawd.
5 Yav tom ntej, thaum yuav hu ib zaj nkauj tshiab xaus Kev Kawm Ua Vajtswv Tes Num, tso cov suab nkauj rau lub koom txoos mloog ib lwm ua ntej. Tom qab ntawd sawvdaws mam li hu zaj nkauj ua ke li ib txwm hu.
6 Thaum peb hu nkauj tom tej kev sib txoos, yog lub caij zoo siab tsa suab qhuas Yehauvas ua ke. Yog li ntawd, thaum yuav hu nkauj peb yuav tsum tsis txhob sawv mus ub mus no.
7 Yog peb zaum mloog tej suab nkauj uas tso ua ntej pib cov rooj sib txoos 1 hnub thiab 3 hnub, yuav qhia tau tias peb nco Yehauvas txiaj ntsig rau tej nkauj thiab. Muaj ib co kwvtij nkauj muam nyob ntau lub tebchaws tuaj rau hauv lub nroog Patterson xeev New York, 1 xyoos twg lawv tuaj 2 zaug, tuaj kaw cov suab nkauj no. Lawv siv lawv nyiaj lawv txiaj tuaj kaw peb thiaj tau tej nkauj pe hawm Yehauvas. Yog li ntawd, thaum tus kwvtij uas coj lub rooj sib txoos hais kom peb zaum mloog cov nkauj, peb yuav tau ua raws li nws hais. Yog peb ua li no, peb kuj yuav npaj tau peb lub siab los mloog tej lus qhuab qhia rau hnub ntawd.—Exl. 7:10.
8 Peb yuav hu ib zaj nkauj tshiab xaus txojkev sib txoos hmo no. Zaj nkauj ntawd hu ua “Lub Nceeg Vaj Twb Kav Lawm—Cia Li Los!” Zaj nkauj no, uas twb muab tso mloog rau rooj sib txoos txwm xyoo lawm, yog txhob txwm sau los qhia tias lub Nceeg Vaj twb sawv kav tau 100 xyoo lawm.
9 Cov nkauj tshiab no yeej yog tej “yam zoo” uas Yehauvas tau muab rau peb. (Mth. 12:35) Cia peb rau siab kawm kom hu tau cov nkauj tshiab no tawm hauv lub siab tuaj xwv thiaj qhuas tau peb tus Vajtswv uas peb hwm!—Nt.Nk. 147:1.