Mus Tshawb Nrhiav

Cim Tej Nkauj

Nyob hauv teb chaws Yunaithim Xatej (United States), muaj ib tug npe hu ua Laulees (Lorraine) hais tias, “Thaum kuv nyob ib leeg mluas mlob, kuv muab cov nkauj hauv JW Tshooj TV coj los mloog mas Yehauvas txhawb tau kuv lub zog kawg li.”

Yehauvas cov tib neeg yeej ib txwm hu nkauj qhuas nws. (Kaulauxais 3:16) Yog koj cim tau cov nkauj rau nruab siab lawm ces thaum koj tsis muaj phau ntawv los koj thiaj li hu tau nkauj. Xyaum li nram qab no xwv thiaj pab tau koj cim nkauj.

● Ua tib zoo nyeem kom nkag siab cov lus. Yog koj paub lub ntsiab rau ib yam twg ces yuav yooj yim rau koj nco tau. Cov lus sau rau ib zaj nkauj twg, tsis hais cov nkauj txhawb siab thiab cov nkauj rau cov me nyuam puav leej muaj nyob rau hauv lub vej xaij jw.org/hmn. Mus rau Peb Tej Ntaub Ntawv ces mam li mus rau Nkauj.

● Muab cov nkauj sau rau ib daim ntawv. Ua li no yuav pab tau kom koj cim tau zaj nkauj rau nruab siab.​—2 Kevcai 17:18.

● Muab nyeem los sis hu kom nrov. Nyeem los sis hu zaj nkauj tas zaj tas zog.

● Sim seb koj nco tau npaum li cas. Cia li hu es tsis txhob saib cov lus seb koj nco tau li cas rau li cas.