Lub Caij Ua Kevcai Nco Txog Yexus Xyoo No, Koj Puas Yuav Xyaum Yehauvas Thiab Yexus Lub Siab Kub Lug Ua Yehauvas Tes Num?
1. Thaum txog lub caij ua kevcai nco txog Yexus, Yehauvas Cov Timkhawv yuav siv zog mus ua dabtsi?
1 Yehauvas kub siab lug ua kom muaj tiav raws li lub ntsiab uas nws tau npaj tseg. Yaxaya 9:7 hais li no txog tej koob hmoov uas yuav los ntawm Vajtswv lub Nceeg Vaj los: “[Yehauvas] uas muaj hwjchim loj kawg nkaus kub siab lug yuav ua tej haujlwm no kom tiav.” Thaum Vajtswv tus Tub tseem nyob hauv ntiajteb ua Nws tes num, nws yeej kub siab lug rau txojkev pe hawm tseeb ib yam li Yehauvas. (Yauhas 2:13-17; 4:34) Txhua xyoo thaum txog lub caij ua kevcai nco txog Yexus, muaj plhom plhom tus tshaj tawm thoob ntiajteb siv zog ua Vajstwv tes num kom ntau ntxiv. Lawv ua li no twb yog lawv xyaum kub siab ua Vajtswv tes num ib yam li Yehauvas thiab Yexus nkawd. Koj puas yuav nrog lawv ua thiab?
2. Pib lub 3 Hlis tim 7 peb yuav kub siab lug ua dabtsi?
2 Caw Tibneeg Tuaj Ua Kevcai Nco Txog Yexus: Xyoo no peb yuav mus pib caw tibneeg tuaj ua Kevcai Nco Txog Yexus rau Hnub 6 (Saturday), lub 3 Hlis tim 7. Npaj tamsim no koj thiaj npaj tau mus ua Vajtswv tes num kub siab lug rau lub caij ntawd. Cov koom txoos yuav zoo siab heev mus caw tibneeg kom thoob plaws txhua koog tuaj koom hmo ntawd. Peb yuav tau kub siab lug thiab rau siab ntso mus caw txhua tus uas peb paub, tsis hais cov uas peb kawm Vajlugkub nrog, cov uas peb rov mus xyuas, cov uas peb ua haujlwm nrog, cov uas txheeb ze peb, thiab cov uas peb kawm ntawv nrog. Zoo rau peb muab ib daim ntawv caw rau lawv lossis tso lub Vej xaij jw.org/hmn rau lawv saib.
3. Lub 3 Hlis thiab 4 Hlis peb yuav tau ua li cas kom ua tau Vajtswv tes num ntau ntxiv?
3 Ua Ib Tug Pab Tho Kev: Yog peb kub siab lug ua Vajtswv tes num ces peb yuav yimhuab xav ua ntau ntxiv. Lub 3 Hlis thiab 4 Hlis yog ob lub hlis uas zoo rau peb ua ib tug pab tho kev rau qhov yog koj xav qhia 30 teev xwb los yeej tau. Thaum koj tsev neeg pe hawm Vajtswv ua ke lossis thaum koj kawm Vajlugkub koj ib leeg xwb, thov Yehauvas pab seb koj yuav ua li cas koj thiaj ua tau ib tug pab tho kev. (Paj Lug 15:22) Thaum lwm tus pom koj kub siab lug npaj ua Vajtswv tes num rau lub 3 Hlis thiab 4 Hlis ces yuav txhawb kom lawv npaj ua thiab. Yog koj hloov koj lub neej kom mus qhia tau Vajlugkub ntau ntxiv ces twb yog koj kub siab ua Vajtswv tes num li Yexus.—Malakau 6:31-34.
4. Peb yuav tau tej nqe zog twg yog peb kub siab ua Yehauvas tes num li Yehauvas thiab Yexus nkawd?
4 Peb yuav tau xyaum Yehauvas thiab Yexus es kub siab ua Yehauvas tes num rau lub caij ua kevcai nco txog Yexus xyoo no. Yog peb ua li no, peb yuav tau nqe zog ntau heev. Peb yuav qhia tau Vajlugkub rau ntau tus hauv peb thaj tsam. Thaum peb ua Vajtswv tes num thiab siv sijhawm mus pab lwm tus li no, yuav ua rau peb zoo siab thiab txaus siab heev. (Tubtxib Tes Haujlwm 20:35) Tiamsis qhov tseem ceeb tshaj plaws ces yog qhov uas peb ua rau peb tus Vajtswv thiab nws tus Tub nkawd zoo siab.