Siv Phau “Pib Kawm Vajtswv Txojlus” Los Nrog Tibneeg Tham
1. Peb tau txais phau ntawv tshiab twg los pab peb mus qhia Vajlugkub?
1 Tsaib no thaum muaj lub rooj sib txoos 3 hnub, peb tau txais ib phau ntawv tshiab hu ua “Pib Kawm Vajtswv Txojlus.” Thaum peb npaj mus qhia Vajlugkub, peb siv tau phau ntawv tshiab no los pab peb li cas? Phau no muab faib ua tej lub ntsiab lus thiab muaj cov nqe Vajlugkub uas txhawb cov ntsiab lus ntawd zoo li phau Reasoning. Phau ntawv no zoo heev rau peb siv mus nrog tibneeg tham.
2. Thaum mus qhia Vajlugkub, peb yuav siv phau “Pib Kawm Vajtswv Txojlus” li cas?
2 Koj kuj siv los lus nug 8 es hais li no: “Hnub no wb tuaj xyuas cov kwvtij neej tsa uas nyob ib ncig ntawm no vim muaj coob tus xav paub tias, ‘Puas yog Vajtswv tsim kev txom nyem?’ [Muaj tej thaj chaw kuj zoo rau koj muab phau ntawv nthuav rau tus tswv tsev saib.] Koj xav li cas xwb? [Cia nws teb tas tso.] Phau Vajlugkub teb tau los lus nug no raug siab heev.” Nthuav phau Vajlugkub es nyeem thiab tham ib ob nqes uas nyob rau lub ntsiab ntawd. Yog tias tus tswv tsev nyiam, koj kuj muab 20 lo lus nug uas nyob rau sab 1 rau nws saib es cia nws xaiv ib los rau neb tham rau lwm zaus. Lossis muab ib phau ntawv uas tham ntxiv txog lub ntsiab neb nyuam qhuav tham rau nws.
3. Thaum tham nrog cov tibneeg uas tsis coj txojkev ntseeg Khixatia, peb siv tau phau “Pib Kawm Vajtswv Txojlus” li cas?
3 Lo lus nug 4 thiab lo 13 txog lo 17 zoo siv thaum mus ntsib cov tibneeg tsis coj txojkev ntseeg Khixatia. Koj kuj siv tau lo lus nug 17 es hais li no: “Hnub no wb tuaj xyuas cov kwvtij neej tsa uas nyob ib ncig ntawm no. Koj puas pom tias niaj hnub no muaj ntau yam kev nyuaj siab los raug lub cuab lub yig? [Cia nws teb tas tso.] Muaj ntau khub niam txiv pom tias cov lus no pab tau lawv: ‘[Tus] pojniam . . . yuav tsum hwm nws tus txiv.’ [Tsis tas yuav qhia tias cov lus no los ntawm Efexau 5:33 los. Yog koj nrog ib tug pojniam tham, koj kuj hais raws li cov lus hauv Efexau 5:28.] Koj xav, yog ob niam txiv coj raws li cov lus no, puas pab tau nkawd txojkev txij nkawm?”
4. Thaum koj nrog cov uas tsis coj txojkev ntseeg Khixatia tham tas, koj yuav ua li cas xwb?
4 Thaum tham tas, teem sijhawm rov mus tham rau lwm zaus. Koj kuj npaj siv cov lus uas nyob rau lwm nqe Vajlugkub hauv lo lus nug uas neb tau tham ntawd rov mus tham nrog tus tswv tsev. Thaum zoo sijhawm, qhia rau nws tias tej koj nrog nws tham txog yog los hauv phau Vajlugkub los. Yog koj pom tias nws nyiam tej uas neb tau tham uas phau Vajlugkub hais, kuj muab ib phau ntawv uas koj xav tias nws yuav nyiam nyeem rau nws.—Mus saib sab 3-6 hauv daim Tes Num Rau Lub Nceeg Vaj lub 12 Hlis xyoo 2013.