Pab Cov Dig Muag Los Paub Yehauvas
1. Yexus tau ua li cas qhia tias nws hlub tshua cov dig muag?
1 Tshuav ob peb hnub xwb Yexus twb yuav raug tua. Thaum nws tawm hauv lub moos Yelikhau mus, txawm muaj 2 tug neeg thov khawv uas dig muag quaj thov tias: “Tus Tswv . . . thov khuvleej wb lauj!” Txawm Yexus nyuaj siab heev txog tej uas nws yuav raug los, nws tseem nres nkaus hu 2 tug los thiab kho nkawd zoo hlo. (Mth. 20:29-34) Yexus tus qauv no pab kom peb hlub tshua cov dig muag li cas?
2. Peb yuav ua li cas es thiaj qhia tau Vajlugkub rau ib tug neeg dig muag uas peb ntsib?
2 Zoo Siab Hlo Pab: Yog koj ntsib ib tug neeg dig muag, koj kuj qhia koj lub npe rau nws thiab nug seb nws puas cheem tsum koj pab dabtsi. Vim tibneeg pheej ua limhiam rau cov dig muag, thaum thawj tej zaum nws yuav tsis kam koj pab nws. Tiamsis yog nws pom tias koj xav pab nws tiag tiag, tej zaum nws yuav cia koj pab nws. Nco ntsoov tias tej tug dig muag yeej tseem pom kev me me. Qhov no yuav pab tau koj paub seb nws cheem tsum kev pab npaum li cas. Tom qab koj pab nws tas, yog tias zoo, qhia rau nws tias koj kuj pab tibneeg kawm Vajlugkub thiab. Nug nws seb koj nyeem ib nqes Vajlugkub, xws li Ntawv Nkauj 146:8 lossis Yaxaya 35:5, 6, rau nws mloog puas tau. Yog nws nyeem tau ntawv Braille, uas yog cov ntawv rau cov uas tsis pom kev xuas tes nyeem, ces nug nws seb nws puas xav tau ib phau ntawv Braille los pab nws kawm Vajlugkub. Koj kuj pab theej tawm cov suab kaw uas muaj nyob hauv jw.org rau nws mloog. Yog nws lub koos pis tawj (computer) muaj qhov uas nyeem tau ntawv rau nws mloog ces tej zaum nws yuav nyiam cov ntaub ntawv hauv jw.org uas theej tawm ua RTF (Rich Text Format).—Mus saib lub ntsiab me “Thaum Pab Ib Tug Dig Muag . . .”
3. Peb yuav mus nrhiav li cas thiaj nrhiav tau cov dig muag uas nyob hauv peb thaj tsam?
3 Mus Nhriav Cov Dig Muag: Thaum peb mus qhia Vajlugkub ib lub tsev rau tsev, peb tsis tshua ntsib cov dig muag rau qhov coob tus dig muag txaj muag nrog cov uas lawv tsis paub tham. Yog li ntawd, peb yuav tau kub siab mus nrhiav cov dig muag xwv peb thiaj qhia tau Vajlugkub rau lawv. (Mth. 10:11) Puas muaj cov dig muag uas nrog koj ua haujlwm lossis nrog koj kawm ntawv? Yog muaj, zoo rau koj xub mus nrog nws tham. Yog koj thaj tsam muaj ib lub tsev kawm ntawv rau cov uas dig muag, mus nug seb lawv puas xav tau tej ntaub ntawv Braille rau hauv lawv chav rau ntawv. Koj puas paub ib tse neeg twg uas muaj ib tug dig muag? Nyob hauv koj thaj tsam, puas muaj tej koom haum uas pab cov dig muag lossis tej tsev laus uas muaj cov dig muag nyob? Yog muaj, qhia rau tus tswv tsev, tus tos txais qhua, lossis tus thawj coj hauv cov tsev ntawd paub tias Yehauvas Cov Timkhawv xav pab cov dig muag. Nug seb lawv puas kam koj nqa tej ntaub ntawv Braille lossis tej suab kaw rau cov dig muag tau nyeem thiab mloog. Muab Vajtswv tej lus cog tseg hauv phau Vajlugkub, uas qhia tias tsis ntev yuav tsis muaj ib tug twg uas yuav dig muag ib zaug li lawm, qhia rau nws. Koj kuj tso daim yeeb yaj kiab “Without It, I Would Feel Lost” hauv jw.org rau nws saib. Daim yeeb yaj kiab ua txog ib tug txivneej dig muag uas muaj kev ntseeg heev vim nws muaj ib phau Vajlugkub Braille los pab nws. Yog koj qhia rau lawv tias vim li cas koj thiaj tuaj nrhiav cov dig muag, tej zaum lawv yuav qhia koj seb cov dig muag nyob rau qhov twg xwv koj thiaj paub mus nrhiav lawv.
4. Janet tus qauv qhia li cas rau peb?
4 Muaj ib tug muam dig muag hu ua Janet tau mus xyuas ib koog tsev uas muaj cov dig muag nyob. Nws txawm nrog ib tug ntxhais hluas tham. Janet qhia rau nws tias, “Yexus tau kho cov dig muag los qhia rau sawvdaws tias yav tom hauv ntej nws yuav ua ib yam li ntawd rau txhua tus uas dig muag thiab.” Nkawd txawm mus nyeem Qhia Tshwm 21:3, 4, thiab Janet thiaj qhia tias Vajtswv lub Nceeg Vaj yuav ua kom muaj tiav raws li cov lus no. Tus ntxhais txawm ntsiag ib pliag ces nws mam teb tias: “Kuv tsis tau hnov qhov no los ntawm ib tug dig muag los dua li. Cov neeg pom kev feem coob ntseeg tias tibneeg dig muag vim tej uas lawv lossis lawv tej poj koob yawm txwv tau ua yav tas los.” Janet thiaj xa lub Vej xaij (Web site) uas muaj phau Vajlugkub Qhia hauv e-mail mus rau tus ntxhais ces tamsim no nkawd thiaj kawm Vajlugkub ib lub liam tiam twg 2 zaug.
5. Txawm peb kho tsis tau cov dig muag li Yexus kho thaum ub los, peb yuav tau txais tej koob hmoov twg yog peb khuvleej cov dig muag?
5 Niaj hnub no peb kho tsis tau cov dig muag rov pom kev li Yexus kho thaum ub, tiamsis peb yeej pab tau cov uas “txojkev xav tsaus ntuj nti” vim raug tus dab uas kav tiam no npog, tsis hais cov pom kev lossis dig muag, los paub qhov tseeb uas yog Vajtswv Txojlus. (2Khl. 4:4) Yexus tau kho 2 tug txivneej uas nyob ze lub moos Yelikhau rau qhov nws “khuvleej” nkawd. (Mth. 20:34) Yog peb khuvleej cov dig muag thiab ces peb yuav pab tau lawv ib txhia los paub Yehauvas, uas yog tus uas yuav tshem kev dig muag mus ib txhis.