Cov Twj Peb Siv Ua Vajtswv Tes Num
1. Vim li cas cov Khixatia uas ua Vajtswv tes num ho zoo li cov ua liaj ua teb?
1 Tus neeg ua liaj ua teb yeej siv ntau yam twj. Muaj tej txhia twj tsuas siv rau thaum luaj teb ntov ntoo lossis rau thaum cog nplej hlais nplej xwb, tiamsis muaj tej txhia twj tus neeg ua liaj ua teb yeej siv tas mus li. Cov uas txawj ua liaj ua teb nqa rawv tej twj uas lawv kheev siv no nrog lawv thiab cov twj no yog cov uas lawv paub siv tshaj. Phau Vajlugkub txhawb txhua tus Khixatia kom rau siab ntso ua Vajtswv tes num thiab ua “ib tug tub zog uas tsis txaj muag.” (2Tmt. 2:15) Rab twj twg yog rab uas tseem ceeb tshaj rau peb siv ua Vajtswv tes num? Rab twj ntawd yog Vajtswv Txojlus, yog rab uas peb siv mus coj tibneeg los ua Yexus cov thwjtim. (Mth. 28:19, 20) Yog li ntawd, peb yuav tsum kub siab kom peb txawj “qhia Vajtswv txojlus tseeb raug cai.” Tiamsis tseem muaj lwm yam twj uas peb kheev siv thiab, uas txhua tus Khixatia yuav tau xyaum kom txawj siv xwv thiaj qhia tau qhov tseeb rau tibneeg.—P.L. 22:29.
2. Cov twj twg yog cov uas peb kheev siv?
2 Cov Twj Uas Peb Kheev Siv: Phau Vajlugkub tsis yog tib yam twj uas peb siv xwb, kuj muaj lwm yam twj uas peb yuav tsum siv thiab. Cov twj ntawd yog cov twj twg? Yam twj uas peb siv tshaj plaws los qhia qhov tseeb yog Phau Vajlugkub Qhia Txog Dabtsi Tiag? Tom qab kawm phau no tas, peb siv phau “Nyob Hauv Vajtswv Txojkev Hlub” los qhia kom lawv paub siv phau Vajlugkub tej hauv paus ntsiab lus los ua lawv lub neej. Yog li ntawd, peb yuav tsum txawj siv 2 phau ntawv no los qhia tibneeg. Peb yuav tsum siv tej ntawv me uas peb muaj los qhia tibneeg thiab. Phau Vajtswv Muaj Xov Zoo Rau Peb! yog ib phau uas peb kuj kheev siv los pib kawm Vajlugkub nrog tibneeg thiab. Yog tias nyob hauv peb thaj tsam muaj cov uas tsis tshua paub nyeem ntawv ces peb kuj siv phau Mloog Vajtswv Lus lossis phau Mloog Vajtswv Lus koj thiaj Muaj Sia Nyob Mus Ib Txhis los qhia lawv. Ib yam twj uas peb siv los qhia cov kawm Vajlugkub txog lub koom haum yog phau Leejtwg Thiaj Ua Li Yehauvas Siab Nyiam? Cov yeeb yaj kiab xws li Kawm Vajlugkub Ua Dabtsi?, Mus Ua Dabtsi Tom Tsev Nceeg Vaj?, thiab Kev Kawm Vajlugkub Zoo Li Cas? yog ib co twj uas zoo rau peb siv mus coj tibneeg los ua Yexus cov thwjtim thiab. Yog li ntawd, peb yuav tsum paub siv cov twj no kom zoo.
3. Lwm daim Tes Num Rau Lub Nceeg Vaj uas yuav tawm tom ntej yuav pab peb li cas?
3 Lwm daim Tes Num Rau Lub Nceeg Vaj uas yuav tawm tom ntej yuav pab kom peb txawj siv tej twj uas peb muaj. Yog peb rau siab ntso xyaum kom txawj siv tej twj ntawd ces kuj yog peb ua raws li cov lus no: “Cia li ua tib zoo saib koj tus kheej thiab tej uas koj qhia. Cia li xyaum raws li tej no tsis tu li, rau qhov yog koj ua li no koj yuav cawm tau koj tus kheej thiab cov uas mloog koj qhia.”—1Tmt. 4:16.