Yog Peb Ua Neeg Zoo Peb Puas Yuav Tau Qhov Zoo?

Tibneeg yeej ib txwm piv txojlus tias yog yus ua zoo ces tau ntuj ntoo. Tsis tag li ntawd cov neeg Axias feem coob kuj ntseeg tej lus uas ib tug tub txawg tub ntse hu ua Khafusam (Confucius) tau hais. Nws hais tias: “Yog yus tsis xav kom luag ua phem rau yus ces txhob ua phem rau luag.”

FEEM COOB UA LI NO

Coob tus xav tias yog lawv ua qhov zoo ces lawv tsuas yuav tau qhov zoo rov qab xwb. Yog li lawv thiaj hwm txhua tus, ua neeg paub cai, saib taus lwm tus thiab coj zoo kom lawv lub siab txhob nkaug lawv. Ib tug pojniam hu ua Lees (Linh) uas nyob Nyab Laj teb tau hais tias, “Kuv yeej ib txwm coj ncaj thiab hais dabtsi los hais tiag tiag xwb. Yog li kuv xav tias muaj ib hnub kuv yuav tau txais koob hmoov.”

Tib tug pojniam qub hais zaub mov rau cov neeg txom nyem noj.

Tej txhia coj zoo vim lawv txojkev ntseeg qhia kom lawv ua neeg zoo. Ib tug txivneej hu ua Suv Yeem (Hsu-Yun) nyob Tais Vam hais li no tias, “Kuv txojkev ntseeg qhia tias yog yus ua zoo thaum yus tseem ua neej nyob ces thaum yus tuag lawm yus thiaj yuav tsis txom nyem thiab tsis raug tsim txom.”

THAUM KAWG ZOO LI CAS?

Tus pojniam nyob ntshaus ntsho puag nws tus menyuam.

Yeej muaj tseeb tias thaum yus ua zoo rau lwm tus lawv yuav ua zoo pauj yus, tiamsis yuav tsis zoo li ntawd tas li. Tej tug txawm yus ua zoo npaum li cas rau los yeej tsis ris yus txiaj. Ib tug pojniam hu ua Suv Phees (Shiu Ping) nyob Hooj Koo tau hais tias, “Kuv yeej pom kiag ntawm qhov muag tias txawm yus ua zoo npaum li cas rau lwm tus los tej thaud tsuas tas dawb tas do xwb. Kuv twb ua ib tug niam tsev zoo kawg li, los thaum kawg kuv tus txiv tseem tso wb ob niam tub tseg lawm thiab.”

Feem coob kuj pom tias txawm tibneeg muaj ib txojkev ntseeg los yeej pab tsis tau lawv ua neeg zoo. Ib tug pojniam hu ua Exukaus (Etsuko) uas nyob Nyiv Pooj teb tau hais tias, “Kuv mus koom ib pawg ntseeg thiab ua tus coj cov hluas tiamsis tej uas kuv pom ua rau kuv xav tsis thoob li. Tibneeg sib daj sib dee, sib txeeb ua tus loj, thiab muab tej nyiaj uas lawv sau tau coj mus siv ua dog ua dig.”

“Kuv twb ua ib tug niam tsev zoo kawg li, los thaum kawg kuv tus txiv tseem tso wb ob niam tub tseg lawm thiab.”—SUV PHEES UAS NYOB HOOJ KOO

Ib txhia twb kub siab lug rau lawv txojkev ntseeg los thaum kawg lawv tseem ntsib kev txom nyem thiab. Tau muaj li no rau ib tug pojniam hu ua Vees (Van) nyob Nyab Laj teb. Nws hais tias, “Tau ntau lub xyoo, kuv niaj hnub nqa zaub nqa mov nqa paj thiab txiv hmab txiv ntoo mus fij rau poj koob yawm txwv kom lawv foom koob hmoov rau kuv. Tiamsis thaum kawg kuv tus txiv tseem tau ib tug mob phem heev thiab kuv tus ntxhais uas mus kawm ntawv txawv tebchaws tseem tag sim neej lawm thiab.”

QHOV UAS PEB UA NEEG ZOO XWB PAB PUAS TAU PEB

Vim li cas qhov uas peb ua ib tug neeg zoo xwb yuav pab tsis tau peb nyob tso siab plhuav? Vim phau Vajlugkub qhia li no.

TSIS YOG TXHUA TUS YUAV KAM COJ ZOO

“Ib tug neeg txhaum muaj txim ua rau ntau yam kev zoo piam tag.”—TEJ LUS QHIA 9:18, TT.

Txawm yus ua zoo npaum cas los yog lwm tus tsis ua qhov zoo ces yeej yuav raug yus thiab. Zoo li thaum muaj tus kab mob COVID-19. Txawm tej nom tswv kom txhua tus nyob sib nrug deb los yog ib txhia tsis kam mloog ces yuav ua rau lwm tus mob thiab.

TIBNEEG YUAM KEV LAWM LOS LAWV TWB TSIS PAUB

“Muaj ib txojkev uas neeg xav hais tias yog txoj zoo, tiamsis txoj ntawd coj mus raug kev ploj kev tuag.”—PAJLUG 14:12.

Tibneeg coob tus xav tias txojkev uas lawv taug twb yog txoj yog lawm tiamsis thaum kawg lawv tseem yuam kev thiab ntsib teeb meem.

TSIS PAUB XYOV LUB NEEJ YUAV ZOO LI CAS

“Nej twb tsis paub hais tias xyov tagkis nej txojsia yuav zoo li cas. Nej txojsia zoo li tej huab uas nyob ib pliag xwb ces twb yaj tas lawm.”—YAKAUNPAUS 4:14.

Txawm ib tug neeg yuav coj zoo npaum cas los tib ntsais muag xwb nws txojsia yeej yaj ntshis tau. Zoo li thaum muaj tus kab mob COVID-19. Cov uas muaj lub siab dawb siab zoo xav pab lwm tus kuj tau kis kab mob thiab tag sim neej lawm. Dua li ntawd kuj muaj lwm yam los raug cov neeg siab zoo thiab. Nyob rau Suav teb muaj ib tug pojniam hu ua Lis Tees (Liting). Nws txiv tau ua tsheb sib nraus thiab tuag lawm. Nws hais tias, “Kuv yeej ntseeg tsis tau tias ib tug neeg uas muaj lub siab dawb siab zoo npaum li kuv txiv txojsia yuav cia li tu nrho. Kuv txiv twb yog ib tug neeg nquag thiab txo hwjchim kawg nkaus li los thaum lawv ua tsheb sib nraus nws tseem yog tus uas tag sim neej.”

Yog qhov uas peb ua ib tug neeg zoo pab tsis tau peb ua lub neej nyob tso siab plhuav ces dabtsi thiaj yuav pab tau peb? Peb yuav tsum muaj ib yam uas peb tso siab tau rau. Ua li yam ntawd yog dabtsi?