1 | Thov Vajtswv ‘Muab Txhua Yam Tso Plhuav Rau Nws’

PHAU VAJLUGKUB HAIS TIAS: Muab txhua yam kev txhawj xeeb tso plhuav rau Vajtswv, vim nws mob siab nej.—1 PETUS 5:7.

Nqe No Qhia Li Cas

Vajtswv Yehauvas xav kom peb qhia peb tej kev nyuaj siab rau nws, tsis hais yuav loj los me. (Phau Ntawv Nkauj 55:22) Nws mob siab txog peb ces tej yam uas peb txhawj los Vajtswv yeej nrog peb txhawj thiab. Yog peb thov Vajtswv ces yuav pab kom peb muaj lub siab tus.—Filipis 4:6, 7.

Nqe No Pab Peb Li Cas

Thaum peb muaj tus mob puas siab puas ntsws peb yuav xav tias ntshe muaj peb tib leeg xwb, lwm tus yuav tsis to taub peb. (Pajlug 14:10) Tiam sis tsis yog li ntawd, Vajtswv pom peb, nws paub tej uas mob peb siab, thiab nws xav kom peb mus cuag nws txog txhua yam uas peb txhawj txog.—2 Xwmtxheej Vajntxwv 6:29, 30.

Thaum peb thov Vajtswv Yehauvas, yim huab pab peb tso siab tias nws mob siab txog peb. Tej zaum peb yuav xav li Vajtswv ib tug tub qhe uas hais tias: ‘Koj pom kuv tej kev txom nyem, koj paub kuv tej kev ntxhov siab huv tib si.’ (Phau Ntawv Nkauj 31:7) Qhov uas peb paub tias Yehauvas pom peb tej kev ntxhov siab yeej pab tau kom peb thev kam tiag. Tiam sis nws tsis yog pom peb tej kev ntxhov siab xwb, nws tseem nrhiav kev pab rau peb thiab. Nws to taub vim li cas peb nyuaj siab ntxhov plawv thiab nws pab kom peb nrhiav tau kev txhawb zog hauv phau Vajlugkub.

Phau Vajlugkub Pab Tau Ntsuliam (Julian)

Kuv Tus Mob Txhawj Xeeb Ntshai Rwg

“Kuv muaj tus mob txhawj xeeb thiab tus mob xav nraim yuav tsum ua ib yam dab tsi tas li xwb (OCD). Tej thaum kuv kuj nyob kuv, tab sis tib pliag ntshis xwb, kuv cia li pib txhawj thiab ntshai heev. Thaum kuv nrog lwm tus ua ke, ua rau kuv txhawj thiab ntshai tshaj. Kuv pheej txhawj tas zaj tas zog tias tsam lawv xav li cas txog kuv.

“Kuv cov phooj ywg uas paub tias kuv muaj tus mob no, lawv yeej ua npaum li lawv ua tau los pab kuv. Txawm tias tej thaum lawv cov lus pab tsis tau kuv li los, kuv yeej ris lawv txiaj ntsig kawg nkaus.

“Tej lub sij hawm, kuv tus mob ua nyuaj rau kuv thov Vajtswv. Yog kuv yuav thov Vajtswv Yehauvas, kuv yuav tau siv siv zog xav, vim kuv lub hlwb pheej xav ntau tsav ntau yam, xav ib yam tag ib yam tuaj, ua rau kuv tsis pom qab yuav hais lo twg rau Vajtswv.”

Phau Vajlugkub Pab Tau Kuv

“Kev kawm Vajlugkub pab tau kuv tias thaum kuv thov Vajtswv, kuv tsis tas yuav hais ntev hais ntau. Txawm kuv hais tsis tau ib lo tawm los, kuv tsuas hais tias: ‘Yehauvas, thov pab kuv.’ Yehauvas yeej to taub kuv thiab nws yeej pab kuv rau lub sij hawm ntawd. Muaj Yehauvas pab, kuv thiaj li rau siab thov nws kam tiag. Ntxiv qhov uas thov Vajtswv, kuv kuj mus cuag kws kho mob thiab. Kuv zoo siab tias muaj Vajtswv Yehauvas thiab kws kho mob pab kuv, kuv tus mob thiaj li khees lawm hov ntau.”