Pab Cov Uas Puas Siab Puas Ntsws

Nqe No Qhia Li Cas

Yog koj muaj ib tug phooj ywg uas puas siab puas ntsws, tej zaum koj tsis pom qab yuav ua li cas. Txawm li los, koj yeej pab tau nws.

Yuav Pab Li Cas

Yuav tsum kub siab lug mloog.​—YAKAUNPAUS 1:19.

Ib yam uas koj pab tau koj tus phooj ywg yog thaum nws hais dab tsi los ua zoo mloog nws thiab tsis txhob thuam nws. Qhia rau nws tias koj yeej hlub tshua txog nws. Nco ntsoov tias nws yuav tsis xav tom ntej tom qab ces yuav lam tau lam hais lus. Yog li, tsis txhob khaws tu siab.​—Yauj 6:2, 3.

Pab tus uas qaug zog.​—1 THEXALAUNIKES 5:14.

Tej zaum koj tus phooj ywg yuav muaj kev txhawj xeeb los sis nws xav tias nws tsis muaj nuj nqis. Txawm koj tsis paub yuav hais li cas rau nws los qhia rau nws paub tias koj hlub tshua nws. Qhov no twb txhawb thiab nplig tau nws lawm.

Tej phooj ywg twb txawj sib hlub txhua lub sij hawm.​—PAJLUG 17:17.

Nrog koj tus phooj ywg tham seb nws xav tau kev pab li cas. Yog nws tsis paub qhia rau koj los koj kuj npaj ib yam uas neb ua tau ua ke, xws li mus taug kev ua ke. Tsis li ces, koj kuj pab mus yuav zaub mov rau nws los sis pab tu vaj tu tsev rau nws.​—Kalatias 6:2.

Ua siab ntev.​—1 THEXALAUNIKES 5:14.

Yog koj tus phooj ywg tsis tau xav tham los qhia rau nws tias thaum twg nws xav tham koj yeej yuav mloog. Vim nws muaj tus mob puas siab puas ntsws ces nws yuav hais tau tej uas mob koj. Nws yuav lam tau lam chim thiab lam tau lam tsis xav nrog koj ua ub ua no. Txawm li los, ua siab ntev rau nws thiab pab txhawb nws.​—Pajlug 18:24.

Txhawb Koj Tus Phooj Ywg

Falas (Farrah)a muaj ib tug phooj ywg uas muaj kev txhawj xeeb thiab muaj tus mob nyuaj siab thiab tsis nqhis mov. Falas hais tias: “Kuv yeej qhia rau kuv tus phooj ywg tias nws xav nrog kuv tham thaum twg los yeej tau. Txawm kuv tsis paub pab nws li cas los, kuv yeej ua tib zoo mloog nws. Tej thaum, nws tsuas xav kom kuv mloog nws hais xwb ces nws twb zoo siab lawm.”

Hanas muaj tus mob nyuaj siab. Nws hais tias: “Kuv muaj ib tug phooj ywg uas siab zoo thiab txhawb kuv kawg. Nws ua mov qab qab caw kuv mus noj tom nws tsev. Qhov uas nws ua li no, yooj yim rau kuv qhia nws txog kuv tej kev nyuaj siab. Qhov no pab tau kuv kawg!”

Yakhauj tus poj niam muaj tus mob nyuaj siab. Yakhauj hais tias: “Kuv yuav tsum tau ua lub siab ntev. Thaum kuv tus poj niam ua tej yam uas ua rau kuv chim, kuv yuav tau nco ntsoov hais tias yog tim nws tus mob nyuaj siab nws thiaj ua li ntawd. Thaum kuv xav li no ces kuv ua tau siab ntev rau nws.”

Elikaus (Enrico) muaj tus mob txhawj xeeb ntshai rwg. Nws hais tias: “Kuv tus poj niam yeej txawj txhawb thiab nplig kuv. Thaum kuv muaj kev txhawj kev ntshai heev los nws yeej tsis yuam kom kuv ua ib yam dab tsi uas kuv tsis xav ua. Tab txawm yog tej yam uas nws nyiam ua los nws xum nrog kuv nyob. Kuv tus poj niam muaj lub siab dawb siab zoo thiab kuv yeej hlub nws kawg.”