Yehauvas Pom Koj Tej Kua Muag Thiab Nws Hlub Koj Heev

1-2. Tej lub caij twg ua rau peb los kua muag?

PEB sawv daws puav leej txawj los kua muag. Thaum peb zoo siab heev ua rau peb los kua muag. Xws li thaum peb tau txais tej yam tshwj xeeb los sis tseem ceeb heev. Ob niam txiv kuj los kua muag thaum yug tau nkawd tus me nyuam. Los sis thaum koj nco dheev txog ib lub sij hawm dhau los uas ua rau koj zoo siab heev tej zaum koj kuj los kua muag thiab. Tej zaum thaum koj rov ntsib ib tug phooj ywg zoo uas sib ncaim tau ntev heev neb ob leeg yuav zoo siab thiab los kua muag.

² Tiam sis tu siab kawg li uas ntau zaus peb lub kua muag poob vim peb ntsib kev txom nyem siab. Yog ib tug uas peb hlub ua rau peb tu siab, yog peb muaj ib tug mob hnyav, thiab yog peb ntsib ib siab ob qig ua rau peb lub kua muag poob. Thaum peb ntsib tej yam zoo li no tej zaum peb yuav xav ib yam li Yelemis tus uas cev Vajtswv lus. Thaum nws pom cov Npanpiloos tuaj ntaus Yeluxalees, Yelemis hais tias, “Kuv cov kua muag ntws lug li tej dej ntws . . . Kuv tej kua muag ntws si laim tsis paub tas tsis paub tu.”​—Nkauj Quaj Ntsuag 3:48, 49, NW.

3. Thaum Yehauvas pom nws cov tub qhe ib tug raug kev txom nyem nws xav li cas? (Khiav Dim 3:7)

³ Hauv peb lub neej Yehauvas yeej paub txhua zaus uas peb ntsib kev nyuaj siab es peb quaj. Phau Vajlugkub hais tias Vajtswv yeej pom txhua zaus uas nws cov tub qhe ib tug ntsib kev txom nyem, thiab nws yeej hnov peb lub suab quaj thov nws. (Phau Ntawv Nkauj 34:15) Tiam sis Yehauvas tsis nyob ib cag ntsia peb quaj xwb. Nws zoo ib yam li leej niam leej txiv uas hlub nws tej me nyuam. Thaum Yehauvas hnov dheev peb lub suab quaj, nws cev loo tes los puag nkaus peb.​—Nyeem Khiav Dim 3:7.

4. Peb yuav kawm txog cov qauv twg hauv phau Vajlugkub thiab peb yuav kawm paub Yehauvas li cas ntxiv?

⁴ Hauv Vajtswv Txoj Lus peb pom tias thaum Yehauvas cov tub qhe quaj thov kev pab, nws ua li cas xwb. Cia peb mus kawm txog Hanas, Daviv thiab Vaj Ntxwv Hexekiyas. Vim li cas lawv thiaj quaj thov Yehauvas? Vajtswv Yehauvas tau pab lawv li cas? Peb kuj yuav kawm tias Yehauvas nplig peb li cas thaum peb ntsib kev txom nyem, kev tu siab, thiab thaum peb xav tias tsis muaj chaw cia siab li lawm.

LUB KUA MUAG IAB

5. Hanas muaj kev nyuaj siab li cas?

⁵ Hanas ntsib ntau yam kev ntxhov siab nws thiaj quaj lwj siab ntsuav. Nws tus txiv kuj muaj ib tug poj niam npe hu ua Peninas uas ntxub nws heev. Tsis tas li ntawd, Hanas tsis muaj ib tug me nyuam li tiam sis Peninas muaj coob tus. (1 Xamuyees 1:1, 2) Peninas pheej txob thuam Hanas vim Hanas xeeb tsis taus tub. Yog muaj tej no los raug koj ne, koj yuav ua li cas? Phau Vajlugkub qhia tias Hanas nyuaj siab kawg nkaus li nws pheej “quaj tsis xav noj mov,” thiab “lwj siab” ntsuav xwb.​—1 Xamuyees 1:6, 7, 10.

6. Hanas ua li cas thiaj nplig tau nws siab?

⁶ Hanas ua li cas thiaj nplig tau nws siab? Ib qho uas pab tau Hanas yog thaum nws mus teev tiam Vajtswv Yehauvas ntawm lub tsev ntaub. Tej zaum nws mus ze ntawm lub qhov rooj uas yuav nkag mus rau hauv, nyob ntawd thov Vajtswv. ‘Nws thiaj thov Yehauvas thiab quaj ncia heev.’ Nws thov Yehauvas tias, “Thov koj pom kuv tej kev lwj siab thiab hlub kuv!” (1 Xamuyees 1:10, 11) Hanas qhib hlo nws lub siab qhia txhua yam rau Yehauvas. Thaum Yehauvas pom Hanas quaj ncia dhuj dhawv mas mob Nws siab kawg li. Yehauvas hlub Hanas heev thiab xav nplig Nws tus ntxhais lub siab!

7. Thaum Hanas qhia txhua yam rau Yehauvas, Nws nplig Hanas siab li cas?

⁷ Thaum Hanas thov Yehauvas thiab qhia txhua yam rau Nws tas, tus Pov Thawj Hlob Elis txawm hais rau Hanas tias Yehauvas yuav teb nws tej lus thov. Tej no pab tau Hanas li cas? Phau Vajlugkub hais tias, “Hanas txawm mus noj mov thiab tsis nyuaj siab lawm.” (1 Xamuyees 1:17, 18) Txawm Hanas tej teeb meem tsis ploj mus los nws kaj siab tuaj lawm. Nws muab nws tej kev nyuaj siab tso plhuav rau Yehauvas lawm. Yehauvas pom nws tej kev nyuaj siab, nws hnov Hanas lub suab quaj thov, thiab foom koob hmoov rau Hanas, nws thiaj xeeb tau tub.​—1 Xamuyees 1:19, 20; 2:21.

8-9. Raws li Henplais 10:24, 25, vim li cas peb yuav tau peem tiag mus koom tej kev sib txoos? (Saib daim duab.)

⁸ Peb kawm tau li cas? Tam sim no puas yog koj tab tom ntsib kev nyuaj siab quaj ntsuag? Tej zaum koj tsev neeg ib tug, los sis koj tej phooj ywg ib tug tau tas sim neej lawm. Thaum muaj li no tej zaum koj yuav tsis xav mus poo leej twg li. Tiam sis nco ntsoov Hanas. Nws tau kev nplig siab rau qhov nws mus rau ntawm Vajtswv lub tsev ntaub. Ib yam li ntawd, txawm koj tsis kaj siab li los xij, thaum koj mus tej kev sib txoos Vajtswv Yehauvas yuav nplig tau koj lub siab. (Nyeem Henplais 10:24, 25.) Thaum peb mus tej kev sib txoos peb yuav hnov tej nqe Vajlugkub uas nplig tau peb. Yehauvas Txoj Lus yuav pab kom peb muab tej yam zoo ntawd coj los xav xwb, es tsis txhob xav txog tej yam uas yuav txo tau peb lub zog. Txawm tej kev nyuaj siab tsis ploj mus tam sid los peb yuav tswj tau peb tus kheej kom tsis txhob nyuaj siab dhau lawm.

⁹ Thaum peb mus tej kev sib txoos peb kuj tau nrog cov kwv tij nkauj muam tham pem. Lawv tej lus txhawb zog yuav nplig tau peb lub siab thiab pab tau peb kaj siab tuaj. (1 Thexalaunikes 5:11, 14) Cia peb tham txog ib tug kwv tij uas yog ib tug thov kev tshwj xeeb. Nws tus poj niam tau nruam sim lawm, nws hais tias, “Kuv tseem niaj hnub quaj ntsuag. Muaj tej hnub kuv nyob ib leeg kuv teev tsis taus lub kua muag li. Tiam sis thaum kuv mus tej kev sib txoos, kuv tau kev txhawb zog heev. Thaum kuv hnov kuv cov kwv tij nkauj muam tsa tes teb, thiab tej uas lawv hais mas nplig tau kuv siab kawg li. Txawm kuv ntxhov siab, nyuaj siab npaum li cas los, thaum kuv mus txog kuv txawm ua taus siab tus lawm.” Thaum peb mus kev sib txoos Yehauvas yuav siv peb cov kwv tij nkauj muam los nplig peb.

10. Thaum peb txom nyem siab ntsuav peb yuav xyaum Hanas li cas?

¹⁰ Hanas kuj tau txais kev nplig siab thaum nws qhib siab hlo thov Yehauvas. Cia li muab koj “tej kev nyuaj siab huv tibsi tso plhuav rau Vajtswv [Yehauvas].” (1 Petus 5:7) Nws yeej hnov koj lub suab quaj thov, thiab nws yuav pab koj. Ib tug muam tau ntsib kev quaj ntsuag vim tub sab muab nws tus txiv tua lawm. Nws hais tias, “Hlais rhe kuv lub siab kuv tsis paub xyov puas muaj ib hnub kuv yuav rov zoo siab dua. Tiam sis thaum kuv thov kuv Leej Txiv Yehauvas nws thiaj nplig tau kuv lub siab xwb. Kuv paub tias nws yeej hlub kuv. Txawm kuv tsis pom qab yuav thov li cas los kuv paub tias nws yeej pom kuv tej kev ntxhov siab. Thaum kuv tswj tsis taus lawm kuv thov kom nws pub lub siab tus rau kuv. Thaum kuv thov li no, kuv mam mloog tau tias nws yeej pub kuv muaj lub siab tus tiag, kuv thiaj sawv taus mus ub mus no.” Thaum koj quaj thov Yehauvas nws yeej mob siab txog koj. Yehauvas nrog koj nyuaj siab thiab paub meej txog tej uas koj xav hauv nruab siab. Txawm koj tej kev nyuaj siab tsis ploj mus los, Yehauvas yeej nplig tau koj thiab yuav pub lub siab tus rau koj. (Phau Ntawv Nkauj 94:19; Filipis 4:6, 7) Nws pom qhov uas koj muab siab npuab nws, ces nws yuav foom koob hmoov rau koj.​—Henplais 11:6.

LUB KUA MUAG NTSHAV

11. Thaum luag tawm tsam Daviv nws nyuaj siab npaum li cas?

¹¹ Hauv Daviv lub neej nws tau tiv ntau yam kev ntxhov siab ua rau nws lub kua muag poob. Muaj coob tus ntxub nws. Txawm nws tej phooj ywg, thiab nws tsev neeg kiag los kuj ntxeev siab rau nws, thiab tseem nrhiav nrhw kev muab nws tua pov tseg. (1 Xamuyees 19:10, 11; 2 Xamuyees 15:10-14, 30) Muaj ib zaug Daviv hais tias, “Kuv qaug zog vim kuv txojkev tu siab; kuv quaj txhua hmo ua rau kuv lub txaj ntub kua muag tas, thiab kuv lub hauvncoo tsau tsawv kuv tej kua muag.” Vim li cas Daviv nyuaj siab ua luaj? Nws hais ntxiv tias, “Kuv quaj qhovmuag o tas vim kuv cov yeebncuab.” (Phau Ntawv Nkauj 6:6, 7) Tej uas luag ua rau Daviv mob nws siab kawg nkaus nws tej kua muag thiaj ntws tsis tu.

12. Raws li Phau Ntawv Nkauj 56:8, Daviv paub zoo txog Yehauvas li cas?

¹² Txawm Daviv lub neej nyuaj npaum li cas los nws nco ntsoov tias Yehauvas tseem hlub nws. Daviv sau tias, ‘Yehauvas twb hnov kuv tej lus thov lawm.’ (Phau Ntawv Nkauj 6:8) Daviv kuj sau cov lus uas peb nyeem hauv Phau Ntawv Nkauj 56:8, NWT. (Nyeem.)a Thaum peb nyeem nqe no peb pom tias Yehauvas hlub peb kawg li. Daviv hais tias zoo ib yam li Yehauvas teev nws tej kua muag cia thiab muab sau tseg rau hauv ib phau ntawv. Daviv paub tseeb tias Yehauvas nco ntsoov txhua zaus uas nws quaj. Tsis tas li ntawd xwb Daviv ntseeg ruaj nreeg tias nws Leej Txiv saum ntuj tsis yog pom nws tej teeb meem xwb, tiam sis Nws paub tias Daviv nyuaj siab npaum li cas tiag.

13. Thaum lwm tus ua rau peb tu siab peb yuav tau nco ntsoov li cas? (Saib daim duab.)

¹³ Peb kawm tau li cas? Puas yog koj tab tom nyuaj siab vim muaj neeg ntxeev siab rau koj? Koj tso siab plhuav rau koj tus txij nkawm tiam sis nws cia li khiav tso koj tseg lawm. Los sis ib tug uas neb twb npaj siab yuav sib sau ua neej tiam sis nws cia li hloov siab lawm. Los sis ib tug uas koj hlub tshua tsis kam teev tiam Yehauvas lawm. Muaj ib tug kwv tij tus poj niam mus tham hluas nraug es khiav lawm, nws hais tias, “Kuv tsis xav tias tej no yuav los raug kuv ib zaug li. Kuv tu siab chim siab kawg nkaus thiab kuv saib kuv tsis muaj nqis li lawm.” Yog koj tau ntsib tej teeb meem zoo li no, cia li nco ntsoov tias Yehauvas yuav tsis tso koj tseg li. Tus kwv tij hais ntxiv tias, “Tib neeg yeej ua rau yus tu siab, tiam sis Yehauvas yog yus lub Pob Zeb. Txawm peb yuav raug dab tsi los Nws yeej yuav nrog nraim peb. Nws yeej yuav tsis tso tus uas muab siab npuab nws tseg.” (Phau Ntawv Nkauj 37:28) Nco ntsoov tias tsis muaj ib tug poj niam txiv neej yuav hlub koj npaum li Yehauvas hlub. Thaum ib tug ntxeev siab rau koj yeej mob koj siab kawg li, tiam sis Yehauvas tseem hlub koj, nws saib koj muaj nqis heev. (Loos 8:38, 39) Nco ntsoov tias txawm tib neeg ua tsis ncaj rau koj los, koj Leej Txiv saum ntuj yeej hlub koj.

14. Phau Ntawv Nkauj 34:18 cog lus li cas?

¹⁴ Yog muaj neeg tau ntxeev siab rau koj lawm, tej uas Daviv hais hauv Phau Ntawv Nkauj 34:18 yuav nplig tau koj siab. (Nyeem.) Yehauvas yuav pab “cov neeg uas tsis muaj chaw vam khom” li cas? Yehauvas yeej nyob ntawm peb ib sab. Yehauvas zoo ib yam li leej niam leej txiv uas los puag nkaus nws tus me nyuam uas tab tom quaj. Thaum lwm tus ntxeev siab rau peb ua rau peb lwj siab ntsuav, Yehauvas mob siab peb thiab yuav pab peb tam sid. Nws xav nplig peb siab, thiab xav pab kom peb pom tias peb yeej muaj nqis heev. Nws xav kom peb muaj kev vam kev cia siab xwv peb thiaj thev dhau peb tej kev nyuaj siab tam sim no.​—Yaxayas 65:17.

LUB KUA MUAG TAS KEV CIA SIAB

15. Vim li cas Hexekiyas ho quaj ua luaj?

¹⁵ Thaum Vaj Ntxwv Hexekiyas uas kav teb chaws Yudas muaj li 39 xyoos nws cia li mob hnyav heev. Vajtswv tus cev lus Yaxayas mus hais rau Hexekiyas tias nws tus mob yuav tsis tso nws ces nws yuav tuag. (2 Vajntxwv 20:1) Hexekiyas tas kev cia siab kiag li lawm, nws thiaj quaj heev taij thov Yehauvas pab nws.​—2 Vajntxwv 20:2, 3.

16. Yehauvas teb Hexekiyas tej lus thov li cas?

¹⁶ Thaum Vajtswv Yehauvas hnov Hexekiyas tej lus thov thiab pom nws tej kua muag, Yehauvas hlub Hexekiyas heev thiab hais rau nws tias, “Kuv hnov koj tej lus thov thiab pom koj tej kua muag lawm. Kuv yuav kho koj kom zoo.” Yehauvas tau txib kom Yaxayas rov mus cev lus rau Vaj Ntxwv Hexekiyas tias nws yuav tsis tuag, thiab Yehauvas yuav cawm Yeluxalees dim ntawm cov Axilias txhais tes.​—2 Vajntxwv 20:4-6.

17. Yehauvas pab peb li cas thaum peb muaj mob muaj nkeeg? (Phau Ntawv Nkauj 41:3) (Saib daib duab.)

¹⁷ Peb kawm tau li cas? Puas yog koj tab tom muaj ib tug mob hnyav heev? Cia li quaj thov Yehauvas. Phau Vajlugkub cog lus tias, “Leej Txiv tus uas yog Vajtswv, nws hlub peb thiab txhawb peb lub zog” thaum peb ntsib kev txom nyem. (2 Kauleethaus 1:3, 4) Niaj hnub no Yehauvas yuav tsis ua txuj ci tshem tag nrho peb tej kev txom nyem mus. Tiam sis Yehauvas yeej yuav nplig peb siab. (Nyeem Phau Ntawv Nkauj 41:3) Nws yuav pub lub hwj huam dawb huv rau peb kom peb muaj zog, muaj tswv yim, thiab muaj lub siab tus peb thiaj nyiaj taus. (Pajlug 18:14; Filipis 4:13) Nws muab kev vam kev cia siab los nplig peb tias yav tom hauv ntej nws yuav tshem tawm kev mob kev nkeeg mus ib txhis.​—Yaxayas 33:24.

18. Thaum koj ntsib tej kev txom nyem, nqe Vajlugkub twg txhawb tau koj lub zog? (Mus saib lub ntsiab me, “Tej Nqe Uas So Peb Tej Kua Muag.”)

¹⁸ Tej uas Yehauvas hais rau Hexekiyas nplig tau nws heev. Ib yam li ntawd, Vajtswv Txoj Lus yeej nplig tau peb heev. Thaum peb ntsib tej kev nyuaj siab Yehauvas tej lus hauv phau Vajlugkub yuav pab tau peb muaj lub siab tus thiab nplig tau peb siab tas nrho. (Loos 15:4) Ib tug muam nyob Afika sab hnub poob tau mob kheeb xawm, mas nws quaj heev. Nws hais tias, “Nqe Vajlugkub uas nplig tau kuv tshaj plaws yog Yaxayas 26:3. Txawm peb tshem tsis tau tej yam uas los raug peb los Yehauvas yuav pab kom peb tswj taus peb lub siab, thiab yuav pub lub siab tus rau peb xwv peb thiaj thev taus txhua yam.” Thaum koj ntsib kev nyuaj siab ua rau koj tas kev cia siab kiag, puas muaj ib nqe Vajlugkub uas tau txhawb koj zog thiab?

19. Peb tos ntsoov dab tsi?

¹⁹ Vim peb nyob rau tiam kawg lawm tseem yuav haj yam muaj kev txom nyem los raug peb, ua rau peb los kua muag. Tiam sis zoo li peb twb kawm txog Hanas, Daviv, thiab Vaj Ntxwv Hexekiyas, Yehauvas yeej pom peb tej kua muag mas nws yeej mob siab peb kawg li. Yehauvas hlub peb heev rau qhov peb ntsib kev nyuaj siab ntau yam los peb tseem muab siab npuab nws. Yog li ntawd, thaum peb ntsib kev txom nyem, cia li qhia txhua yam rau Yehauvas paub. Tsis txhob ua twm zeej tiam sis nrog nraim peb cov kwv tij nkauj muam hauv lub koom txoos uas hlub tshua peb. Thiab nyeem phau Vajlugkub, Yehauvas thiaj nplig tau peb lub siab. Peb paub tias yog peb ua siab ntev thev, Yehauvas yeej yuav foom koob hmoov rau peb. Nws cog lus tias yav tom ntej nws yuav so peb txhua ncos kua muag. Yuav tsis muaj ib yam dab tsi ua rau peb txom nyem li lawm. (Tshwmsim 21:4) Thaum ntawd peb tej kua muag yuav yog kua muag zoo siab xyiv fab lawm xwb.