Xyaum Kom Txawj Thov Vajtswv

1-2. (1) Vim li cas tej thaud peb ho tsis qhib siab lug thov Yehauvas? (2) Ua li cas peb ho paub hais tias Yehauvas yeej qhib siab lug mloog peb tej lus thov?

QEE lub sij hawm puas zoo li koj pheej thov cov lus qub tas zog rau Yehauvas xwb? Tsis yog koj ib leeg xwb thiaj ua li no. Vim peb txhua tus yeej khwv khwv kawg li tsis muaj sij hawm, tej thaud peb thiaj li thov tsawg tsuag. Los sis tej thaud peb xav tias peb tsis tsim nyog thov Yehauvas ces thiaj nyuaj heev rau peb qhib siab lug thov nws.

² Nyob rau hauv phau Vajlugkub qhia rau peb tias Yehauvas tsis saib qhov uas peb thov muaj cag muaj ceg tiam sis nws saib seb peb puas txo hwj chim thov tawm plaws hauv nruab siab tuaj. Yehauvas mloog “cov neeg uas tsis muab hlob tej lus thov.” (Ntawv Nkauj 10:17) Nws qhib siab lug mloog peb tej lus thov vim nws yeej txhawj xeeb txog peb.​—Ntawv Nkauj 139:1-3.

3. Nyob rau zaj no peb yuav tham txog cov lus nug twg?

³ Tej zaud peb yuav nug li no tias: Vim li cas peb ho tso siab plhuav thov Yehauvas? Yuav ua li cas peb tej lus thov thiaj muaj kuab? Vim li cas qhov uas peb nyeem tej lus thov hauv phau Vajlugkub ho pab tau kom peb txawj thov? Peb yuav ua li cas yog peb ntxhov siab es ho thov tsis taus rau Yehauvas? Cia peb mam li muab cov lus no los tham ib qho zuj zus.

TSO SIAB PLHUAV THOV YEHAUVAS

4. Dab tsi thiaj li yuav pab tau kom peb tso siab lug thov Yehauvas? (Ntawv Nkauj 119:145)

⁴ Thaum peb nkag siab tias Yehauvas yog peb ib tug phooj ywg uas tsuas xav qhov zoo rau peb xwb ces peb yuav tso siab plhuav thov nws kev pab. Tus sau Ntawv Nkauj 119 yeej xav muaj ib txoj kev sib raug zoo nrog Yehauvas vim nyob rau hauv nws lub neej yeej muaj ib qho teeb meem tag ib qho teeb meem tuaj, thiab tib neeg kuj dag txog nws kawg nkaus li. (Ntawv Nkauj 119:23, 69, 78) Ntxiv ntawd, nws kuj yog noob txaug neeg txhaum ces nws kuj ua tau qho yam yuam kev. (Ntawv Nkauj 119:5) Txawm li ntawd los nws yeej qhib siab lug thov Yehauvas.​—Nyeem Ntawv Nkauj 119:145.

5. Piav seb vim li cas peb yuav tau tsis txhob cia qhov uas peb xav tsis zoo txog peb tus kheej ua rau peb tsis kam thov Vajtswv.

⁵ Yehauvas xav kom cov uas tau ua kev txhaum loj lawd thov nws. (Yaxayas 55:6, 7) Yog li ntawd peb tsis txhob cia tej yam uas peb xav tsis zoo txog peb tus kheej ua rau peb tsis kam thov Vajtswv. Zoo ib yam li tus kws tsav dav hlau, yog nws xav tau kev pab ces nws yeej hu tau mus rau ntawm lub hauv paus saib xyuas dav hlau kom qhia nws kev. Puas zoo rau nws xav tias poob ntsej muag dhau lawm es tsis tas yuav thov kev pab? Tsis zoo rau nws xav li ntawd. Zoo ib yam li ntawd tej lub sij hawm peb tsis pom qab tig rau tog twg los sis tau ua txhaum, tsis txhob ua siab deb, kav tsij tig mus cuag Yehauvas es thov nws pab.​—Ntawv Nkauj 119:25, 176.

THOV KOM MUAJ KUAB

6-7. Piav seb dab tsi pab tau peb thov Vajtswv tawm plaws hauv nruab siab tuaj.

⁶ Thaum peb qhib siab hlo thov Yehauvas ces peb cov lus thov yuav ua rau peb yim huab nrog Yehauvas sib raug zoo. Yuav ua li cas peb thiaj thov tau li no?

⁷ Cia li zaum tsaws xav seb Yehauvas zoo li cas. Yog peb yim xav seb Yehauvas coj li cas ces peb yuav paub qhib siab rau nws. (Ntawv Nkauj 145:8, 9, 18) Cia peb mus tham txog ib tug muam npe hu ua Khitis (Kristine). Nws txiv tsiv tsaim kawg li mas nws piav hais tias: “Nrog Yehauvas tham li ib Leej Txiv mas nyuaj kawg li rau kuv. Kuv xav tias kuv tej kev txaug kev txhaum yuav ua rau Yehauvas muab kuv tso pov tseg.” Ua li dab tsi thiaj pab tau nws? Nws hais tias: “Yehauvas txoj kev hlub uas nyob mus ib txhis ua rau kuv sov siab heev vim kuv paub ntsoov tias nws yuav tsis tso kuv tseg. Txawm kuv ua tau yuam kev los nws yeej yuav pab kuv. Qhov kuv xav li no pab tau kom kuv qhia siab rau nws thaum kuv kaj siab thiab thaum kuv tu siab.”

8-9. Piav seb vim li cas zoo rau peb xav ua ntej peb thov Vajtswv.

⁸ Xav seb koj yuav hais li cas. Ua ntej koj yuav thov Vajtswv, tej zaum koj yuav xav txog ntau ntau yam uas koj yuav hais rau nws. Xws li: ‘Tej teeb meem uas kuv tab tom raug tam sim no yog dab tsi? Puas muaj leej twg uas kuv yuav tau zam txim rau nws? Puas muaj ib yam twg txawv txav hauv kuv lub neej uas kuv yuav tau thov Yehauvas pab?’ (2 Vajntxwv 19:15-19) Peb kuj xav txog zaj lus thov uas Yexus qhia kom thov txog Vajtswv lub npe, Vajtswv lub Nceeg Vaj, thiab kom muaj raws li Vajtswv lub siab nyiam.​—Mathais 6:9, 10.

⁹ Thaum ib tug muam npe hu ua Alikas (Aliska) tus txiv mob qog noj ntshav mas nyuaj kawg li rau Alikas thov Vajtswv. Nws hais tias: “Kuv ntxhov ntxhov siab mas kuv xav tsis tawm lus los thov Vajtswv li.” Ua li dab tsi thiaj pab tau nws? Nws hais tias: “Ua ntej kuv yuav thov ntawd, kuv xav seb kuv yuav thov txog dab tsi. Ua li no pab kom kuv tsis txhob thov rau kuv tus kheej nkaus nkaus xwb. Ntxiv ntawd, pab kom kuv muaj lub siab tus thiab kuv thiaj paub thov rau lwm yam.

10. Vim li cas peb yuav tau thov Vajtswv ntev loo? (Saib cov duab.)

¹⁰ Siv sij hawm thov. Txawm tias thov sai sai zoo los yog peb siv sij hawm thov kom ntev zog ces peb yuav qhia tau tej yam nyob nraim nkoos hauv peb lub siab rau Yehauvas.a Alikas tus txiv hu ua Elintsas (Elijah) hais tias: “Kuv thov Vajtswv ib hnub ob peb zaug. Qhov uas kuv thov ntev zog ntawd pab tau kom kuv yim huab nrog Yehauvas sib raug zoo. Yehauvas yeej tsis txhib kom kuv thov tsawg tsuag ces kuv maj mam laug sij hawm thov nws.” Yog ib qho zoo rau koj xyaum nrhiav caij nyoog thiab ib qho chaw nyob ntsiag to kom koj zoo thov Vajtswv thiab maj mam siv sij hawm thov Vajtswv kom ntev loo.

TEJ LUS THOV HAUV PHAU VAJLUGKUB

11. Tej lus thov uas sau rau hauv phau Vajlugkub pab kom koj txawj thov li cas? (Saib lub ntsiab “Koj Puas Xav Ib Yam Li Lawv?”)

¹¹ Tej zaud zoo rau koj mus nyeem cov lus thov thiab tej zaj nkauj uas sau tseg hauv phau Vajlugkub. Thaum koj hnov Vajtswv cov tib neeg hais txog tej yam nyob nraim nkoos hauv lawv nruab siab rau Vajtswv ces yuav txhawb tau kom koj qhib siab lug rau Vajtswv tib yam nkaus. Ntxiv ntawd, tej zaum koj ho yuav nrhiav tau tej sob lus uas koj siv tau los mus thov Vajtswv thiab. Tsis tas li ntawd, koj kuj nrhiav tau tej lus thov txog tej tug uas raug ib yam li koj raug.

12. Peb yuav tau rov nug peb tus kheej li cas thaum peb nyeem txog ib zaj lus thov twg hauv phau Vajlugkub?

¹² Thaum koj nyeem ib zaj lus thov hauv phau Vajlugkub, zoo rau koj rov nug koj tus kheej li no tias: ‘Leej twg yog tus hais cov lus no thiab vim li cas nws ho hais li nws hais? Kuv puas xav ib yam li nws cov lus thov thiab? Kuv khaws tau dab tsi los ntawm nws zaj lus thov?’ Tej zaud koj yuav tau mus tshawb nrhiav ntxiv kom koj thiaj paub teb cov lus nug no. Yeej tsis nkim koj lub dag zog li yog koj ua li ntawd. Cia peb mus saib plaub zaj lus thov uas sau rau hauv phau Vajlugkub ua ke.

13. Peb khaws tau dab tsi ntawm Hanas txog kev thov? (1 Xamuyees 1:10, 11) (Saib daim duab ntawm lub khaum.)

¹³ Nyeem 1 Xamuyees 1:9-11. Thaum Hanas hais zaj lus thov no nws muaj ob qho teeb meem loj heev. Nws lub cev mooj muaj tsis taus tub thiab nws tus txiv tus niam yau hais lus los txob thuam nws. (1 Xamuyees 1:4-7) Yog koj raug ib qho teeb meem ua rau koj puas siab puas ntsws tas, ua li koj khaws tau dab tsi los ntawm Hanas zaj lus thov los pab koj? Hanas lauj sij hawm los thov Yehauvas ntev loo thiab phua hlo tej yam nyob hauv nws nruab siab rau Yehauvas. (1 Xamuyees 1:12, 18) Yog peb muab peb “tej kev nyuajsiab tso rau [Yehauvas]” thiab qhia peb tej kev nyuaj siab rau nws paub ces peb lub siab yuav kaj lawm hov ntau tuaj.​—Ntawv Nkauj 55:22.

14. (1) Peb khaws tau dab tsi ntxiv los ntawm Hanas? (2) Vim li cas nyeem thiab xav txog Vajtswv Txoj Lus ho pab tau kom peb txawj thov Vajtswv? (Saib cov taw ntawv.)

¹⁴ Ob peb xyoos tom qab Hanas yug Xamuyees, nws coj nws tus me tub mus cuag tus Pov Thawj Hlob Elis. (1 Xamuyees 1:24-28) Hanas thov thiab ris Yehauvas txiaj ntsig kawg li vim Yehauvas yeej tiv thaiv thiab saib xyuas cov uas muab siab npuab Nws.b (1 Xamuyees 2:1, 8, 9) Txawm Hanas cov teeb meem hauv tsev tsis ploj los nws tsuas xav txog qhov uas Yehauvas foom koob hmoov rau nws. Peb khaws tau li cas los ntawm qhov no? Yog peb xav ntsoov txog qhov Yehauvas txhawb nqa peb los txog tam sim no ces yuav pab kom peb thev taus tej yam uas peb raug.

15. Thaum peb raug kev tsis ncaj ncees, peb khaws tau dab tsi los ntawm Yelemis tej lus thov? (Yelemis 12:1)

¹⁵ Nyeem Yelemis 12:1. Muaj ib zaug Yelemis ntxhov siab heev thaum nws pom cov neeg lim hiam vam meej. Ntxiv ntawd, nws kuj tu siab heev thaum nws pom lwm cov Ixayees ua saib tsis taus nws. (Yelemis 20:7, 8) Peb yeej to taub txog tej uas nws raug ntawd vim peb yeej pom cov tib neeg coj tsis ncaj vam meej los sis peb ho raug luag thuam. Txawm Yelemis qhia nws tej kev chim rau Yehauvas los nws yeej tsis cem tias Yehauvas coj tsis ncaj. Thaum Yelemis pom Yehauvas rau txim rau Nws cov tib neeg mas ntshe yuav txhawb Yelemis lub zog lawm hov ntau. (Yelemis 32:19) Zoo tib yam li ntawd, peb kuj qhia tau peb tej kev ntxhov siab rau Yehauvas thiab tso siab tias Yehauvas yeej yuav kho tej kev tsis ncaj ncees thaum txog nws lub caij kho.

16. Peb khaws tau dab tsi los ntawm tus Levis zaj lus thov? (Ntawv Nkauj 42:1-4) (Saib cov duab.)

¹⁶ Nyeem Ntawv Nkauj 42:1-4. Zaj lus thov no yog ib tug Levis ua tus sau thiab nws nrog tsis tau lwm cov Ixayees pe hawm Yehauvas ua ke. Nws zaj lus thov qhia txog tej nyob nraim nkoos hauv nws nruab siab. Tej zaud peb kuj yuav nkag siab nws yog tias peb tawm tsis tau qhov twg hauv peb lub tsev los sis raug kaw hauv tsev loj cuj vim peb txoj kev ntseeg. Txawm qho hnub peb zoo siab los sis qho hnub peb chim siab los cia peb muab qhia rau Yehauvas paub. Ua li no yuav pab kom peb muab tej uas peb lub siab xav coj los tshuaj thiab peb thiaj paub tias yam twg tseem ceeb dua ntais. Xws li tus Levis xam pom tias nws yeej muaj dua lwm lub cij fim los qhuas Yehauvas. (Ntawv Nkauj 42:5) Nws kuj xav txog tej uas Yehauvas tau ua los saib xyuas nws. (Ntawv Nkauj 42:8) Cia peb kub siab lug thov Vajtswv, peb thiaj yuav paub vim li cas peb ho xav li peb xav, peb yuav muaj lub siab tus, thiab muaj lub zog thev kam tiag.

17. (1) Yaunas zaj lus thov pab tau peb li cas? (Yaunas 2:1, 2) (2) Cov lus nyob hauv Ntawv Nkauj pab tau peb li cas thaum raug kev nyuaj siab? (Saib cov taw ntawv.)

¹⁷ Nyeem Yaunas 2:1, 2.c Yaunas tus uas cev Vajtswv lus hais cov lus thov no thaum nws nyob hauv tus ntses loj loj lub plab. Txawm Yaunas tsis mloog li Yehauvas hais los nws yeej tso siab tias Yehauvas yeej hnov nws tej lus thov. Thaum Yaunas thov, nws kuj siv cov lus thooj li hais nyob hauv Ntawv Nkauj thiab.d Tej zaum Yaunas kuj paub zoo txog cov lus hauv Ntawv Nkauj heev. Qhov uas nws xav txog cov nqe no pab tau kom nws nco ntsoov tias Yehauvas yeej yuav pab nws. Zoo tib yam li ntawd yog peb cim cov nqe Vajlugkub cia ces thaum peb muaj kev nyuaj siab, peb yuav nco txog cov nqe Vajlugkub ntawd thaum peb thov Yehauvas.

KEV THOV PAB PEB NROG YEHAUVAS SIB RAUG ZOO

18-19. Piav seb thaum peb xav tsis tawm lus los mus thov Yehauvas, Loos 8:26, 27 pab tau peb li cas.

¹⁸ Nyeem Loos 8:26, 27. Muaj tej lub sij hawm peb ntxhov siab dhau ces ua rau peb twb xav tsis tawm lus los thov Vajtswv li. Tej ntwb ntu zoo li no los txhob tag kev cia siab vim Vajtswv lub hwj huam dawb huv kuj “pab peb.” Ua li cas ho pab tau peb? Yehauvas tau siv nws lub hwj huam dawb huv los tshoov tib neeg sau lawv tej lus thov hauv phau Vajlugkub. Thaum peb xav tsis tawm dab tsi, Yehauvas nco ntsoov cov lus thov uas muab sau tseg hauv phau Vajlugkub ces thaum koj raug tej yam muaj ntsis zoo thooj li lawv raug, Yehauvas paub tias koj xav ib yam li lawv xav thiab tej zaum nws yuav teb koj ib yam li nws teb lawv.

¹⁹ Muaj ib tug muam uas yog neeg Lav Xias npe hu ua Yelena raug ntes coj mus kaw vim nws thov Vajtswv thiab nyeem Vajlugkub. Yelena nyuaj siab heev ua rau nws xav tsis tawm lus los mus thov Vajtswv li. Nws hais tias: “Kuv nco ntsoov tias thaum kuv xav tsis tawm lus los mus thov Yehauvas ces nws kuj pab kuv raws li nws cov tib neeg yav thaum ub tej lus thov. Qhov no pab rau kuv tuaj zog kawg li rau lub caij uas muaj kev nyuaj siab ntxhov plawv.”

20. Thaum peb nyuaj siab, peb ua tau dab tsi los mus pab kom peb lub siab tus ua ntej thov Vajtswv?

²⁰ Thaum peb muaj kev nyuaj siab, peb pib thov Vajtswv tiam sis peb lub siab cia li mus xav dua lwm yam. Yog muaj li no rau peb, peb yuav ua li cas? Zoo rau peb mus nyeem Ntawv Nkauj ua ntej tso ces peb mam li thov Vajtswv. Ntxiv ntawd, kuj zoo rau muab tej uas nyob nraim nkoos hauv peb nruab siab sau ib yam li Vaj Ntxwv Daviv tau ua thaum ub. (Ntawv Nkauj 18, 34, 142) Tsis muaj ib txog cai los qhia tias yuav npaj li cas ua ntej thov Vajtswv. (Ntawv Nkauj 141:2) Ua raws li qhov uas yuav pab tau koj.

21. Vim li cas zoo rau peb qhib siab lug thov Vajtswv?

²¹ Yeej txhawb tau peb kawg li thaum peb paub tias Yehauvas yeej nkag siab tej uas peb xav hauv nruab siab ua ntej peb thov nws. (Ntawv Nkauj 139:4) Txawm li ntawd los nws yeej xav kom peb thov nws thiab qhia tias peb cia siab rau nws. Yog li ntawd tsis txhob ua siab deb, kav tsij thov Yehauvas. Nco ntsoov xyaum cov lus thov uas muab sau hauv nws Txoj Lus. Cia li thov tawm plaws hauv nruab siab tuaj. Qhia rau nws thaum koj muaj kev zoo siab thiab thaum koj ntsib kev tu siab. Nws yeej yog koj ib tug Phooj Ywg zoo thiab yuav cug ncuv pob ntseg mloog koj thov!