Nco Ntsoov Thov Vajtswv Pab Lwm Tus

1. Ua li cas peb ho paub hais tias peb tej lus thov tseem ceeb rau Yehauvas?

KEV thov yog ib yam kev sib txuas lus nrog Vajtswv uas zoo heev. Vim li cas peb ho hais li ntawd? Vim hais tias Yehauvas muab qho yam hauj lwm rau cov tub txib saum ntuj, nws kuj muab tej hauj lwm tseem ceeb rau nws tus Tub ua tiam sis qhov uas hnov tib neeg tej lus thov, Yehauvas tsuas tseg rau nws tib leeg nkaus nkaus xwb. (Ntawv Nkauj 91:11; Mathais 28:18) Yehauvas tus uas “teb peb tej lus thov” yeej mloog ntsoov peb ib leeg thov zuj zus.​—Ntawv Nkauj 65:2.

2. Tus tub txib Povlauj tso tau tus yam ntawv twg rau peb xyaum txog thov Vajtswv pab lwm tus?

² Txawm tias peb muaj qhov cij fim thov Yehauvas ywj siab txog peb tej kev txhawj xeeb los peb yuav tau nco ntsoov thov Yehauvas pab lwm tus thiab. Tus tub txib Povlauj kuj ua tib yam nkaus li ntawd. Xws li thaum nws sau ntawv mus rau lub koom txoos hauv Efexaus, nws hais tias: “Kuv niaj hnub thov Vajtswv rau nej.” (Efexaus 1:16) Tsis tas li ntawd, muaj tej tug Povlauj tuav npe thov Vajtswv pab tus ntawd. Xws li nws hais rau Timautes tias: “Kuv nco Vajtswv txiaj ntsig . . . Kuv thiaj nco ntsoov taij thov Vajtswv nruab hnub hmo ntuj pab koj.” (2 Timautes 1:3) Txawm Povlauj muaj ntau yam kev txhawj xeeb uas nws thov Vajtswv txog los nws kuj nco ntsoov thov Vajtswv pab lwm tus thiab.​—2 Kauleethaus 11:23; 12:7, 8.

3. Vim li cas tej thaud peb ho tsis nco qab thov Vajtswv pab lwm tus?

³ Tej zaud muaj tej lub sij hawm peb kuj tsis nco qab thov Vajtswv pab lwm tus lawm. Vim li cas ho hais li ntawd? Muaj ib tug muam npe hu ua Mima hais tias: “Ua neej nyob rau lub sim ceeb no mas tsis xyeej ib chim li. Peb muaj ntau yam los tab kaum peb mas peb tsuas nco qab thov txog tej uas peb raug xwb, peb tsis nco qab thov Vajtswv pab lwm tus li.” Tej thaum koj puas ua li Mim thiab? Yog koj tau ua lawm ces zaj kawm no yuav pab koj. Zaj no yuav piav (1) vim li cas ho tseem ceeb rau peb thov Vajtswv pab lwm tus thiab (2) koj ho ua tau li ntawd li cas.

VIM LI CAS PEB THOV VAJTSWV PAB LWM TUS?

4-5. Qhov uas peb thov Vajtswv pab lwm tus “muajzog heev” npaum li cas? (Yakaunpaus 5:16)

⁴ Thov Vajtswv pab lwm tus mas “muajzog heev.” (Nyeem Yakaunpaus 5:16.) Ua li thov Vajtswv pab lwm tus puas pab tau lawv tiag? Yeej pab tau kawg li. Yexus paub tias tus tub txib Petus yuav tsis lees nws, nws thiaj li hais tias: “Kuv twb taij thov Vajtswv pab kom koj tsis txhob tso kev ntseeg tseg.” (Lukas 22:32) Povlauj kuj paub zoo tias kev thov Vajtswv pab tau heev. Thaum nws raug kaw tsis ncaj nyob hauv Loos, nws sau ntawv mus rau Filemoos tias: “Kuv vam tias luag yuav tso kuv tawm raws li nej niaj hnub thov Vajtswv pab.” (Filemoos 22) Tsis ntev tom qab ntawd, luag kuj muab Povlauj tso tawm thiab nws kuj rov qab mus qhia txoj xov zoo li qub.

⁵ Ua li qhov no puas yog txhais hais tias peb yuam Yehauvas kom ua li peb tej lus thov? Tsis muaj tseeb li ntawd. Yehauvas pom nws cov tib neeg tej kev txhawj xeeb ces tej zaum nws kuj cev tes los pab thiab. Qhov uas peb paub li no pab tau kom peb kub siab lug thov Yehauvas thiab tso siab tias nws yeej yuav saib xyuas.​—Ntawv Nkauj 37:5; mus saib 2 Kauleethaus 1:11.

6. Thov Vajtswv pab lwm tus ho ua rau peb xav li cas txog tus uas peb thov rau? (1 Petus 3:8)

⁶ Thov Vajtswv pab lwm tus yog pab kom peb txawj “hmovtshua” lawv. (Nyeem 1 Petus 3:8.) Tus tib neeg uas muaj kev hmov tshua yeej toov tau thaum lwm tus muaj kev nyuaj siab ntxhov plawv thiab nws yeej muaj lub siab xav mus pab tus ntawd. (Malakaus 1:40, 41) Muaj ib tug txwj laus npe hu ua Vaj hais tias: “Thaum kuv thov Vajtswv pab lwm tus txog tej yam uas lawv raug mas ua rau kuv hlub tshua lawv heev. Tab txawm lawv tsis paub los kuv yeej ncawg lawv dua qhov qub.” Muaj dua lwm tus txwj laus npe hu ua Hawj hais tias: “Thaum peb thov Vajtswv pab ib tug twg ces peb yeej muaj lub siab xav mus pab nws. Thaum peb nqes tes pab kiag nws ces cuag li peb yog tus teb peb cov lus thov txog nws.”

7. Ua li cas thov Vajtswv pab lwm tus ho pab kom peb tsis txhob xav ntau ntau txog peb tej teeb meem? (Filipis 2:3, 4) (Saib cov duab.)

⁷ Thov Vajtswv pab lwm tus pab kom peb tsis txhob xav ntau ntau txog peb tej teeb meem. (Nyeem Filipis 2:3, 4.) Vim Xatas tseem kav lub qab ntuj no ces peb txhua tus yeej yuav ntsib teeb meem. (1 Yauhas 5:19; Tshwmsim 12:12) Thaum peb nco ntsoov thov Vajtswv pab lwm tus ces yuav pab kom peb nco ntsoov tias “cov kwvtij ntseeg uas nyob thoobplaws hauv qabntuj no, lawv tabtom raug kev tsimtxom ib yam li [peb] raug thiab.” (1 Petus 5:9) Muaj ib tug tho kev npe hu ua Kab hais tias: “Thov Vajtswv pab lwm tus qhia rau kuv tias lwm tus yeej muaj teeb meem hauv lawv lub neej thiab. Thaum kuv ua li no ces pab tau kom kuv tsis txhob xav ntau ntau txog kuv tej teeb meem.”

PEB YUAV TAU THOV VAJTSWV PAB LWM TUS

8. Piav seb peb thov tau kom Vajtswv pab leej twg.

⁸ Peb kuj thov tau Vajtswv mus pab ib pawg tib neeg xws li cov uas muaj mob muaj nkeeg, cov hluas uas raug thuam thiab yuam tom tsev kawm ntawv, los sis cov laus uas ua tsis taus dab tsi. Muaj coob leej ntau tus kwv tij nkauj muam raug lawv tsev neeg los sis nom tswv tawm tsam. (Mathais 10:18, 36; Tes Hauj Lwm 12:5) Muaj ib txhia kwv tij nkauj muam yuav tau tso vaj tso tsev tseg vim muaj kev kub ntxhov nyob rau ntawm lawv thaj tsam. Hos ib txhia kuj raug xwm txheej phem. Txawm peb tsis paub cov kwv tij nkauj muam no los thaum peb thov Vajtswv pab lawv, peb xyaum ib yam li cov lus Yexus sam hwm kom “ib leeg hlub ib leeg.”​—Yauhas 13:34.

9. Vim li cas zoo rau peb thov Vajtswv pab cov uas saib xyuas Yehauvas lub koom haum thiab lawv cov poj niam?

⁹ Peb kuj thov tau Vajtswv pab cov uas saib xyuas Yehauvas lub koom haum. Xws li Pab Uas Ntaus Thawj, cov pab cuam Pab Uas Ntaus Thawj, Pab Uas Saib Xyuas Ib Ceg, cov uas saib xyuas tej ceg Npe-ee, cov saib xyuas thaj tsam, cov txwj laus, thiab cov tub leg num. Cov kwv tij no nyias muaj nyias teeb meem los lawv haj tseem kub siab lug ua hauj lwm los pab peb. (2 Kauleethaus 12:15) Xws li muaj ib tug saib xyuas thaj tsam npe hu ua Lis hais tias: “Ib qho uas nyuaj heev rau kuv yog nyob deb deb ntawm kuv niam thiab kuv txiv nkawd vim nkawd laus thiab muaj mob. Txawm tias kuv tus muam thiab yawm yij nkawd pab saib xyuas los yeej ua rau kuv ntxhov siab hnyo tias kuv nyob tsis tau rau ntawd pab nkawd.” Txawm peb paub thiab tsis paub tej uas cov kwv tij raug los cia peb rau siab ntso thov Vajtswv pab lawv. (1 Thexalaunikas 5:12, 13) Tsis tas li ntawd, peb kuj nco ntsoov thov Vajtswv pab cov kwv tij no cov poj niam vim lawv txhawb nqa lawv tus txiv lawv tus txiv thiaj ua tau lawv tes hauj lwm.

10-11. Piav seb qhov uas peb ua tib zaug thov Vajtswv pab ib pawg ho haum Yehauvas siab li cas.

¹⁰ Peb yeej thov tau Vajtswv pab ib pawg tib neeg. Xws li peb tsis thov tsi ntsees rau ib tug twg thaum peb thov mus pab rau cov kwv tij nkauj muam uas raug kaw los sis cov uas muaj ib tug hlub tshua tau tag sim neej lawm. Muaj ib tug txwj laus npe hu ua Ntaj hais tias, “Peb muaj cov kwv tij nkauj muam coob heev uas raug kev nyuaj siab ntxhov plawv ces ntau zaus peb yeej ua tib zaug thov rau txhua tus.”

¹¹ Yehauvas yeej txaus siab rau tej lus thov no heev! Rau qhov peb tsis paub tias tus kwv tij nkauj muam twg raug dab tsi rau dab tsi, yog li ntawd zoo rau peb ua ib teg thov rau sawv daws huv tib si. (Yauhas 17:20; Efexaus 6:18) Cov lus thov no qhia tau tias peb “hlub cov ntseeg” uas yog peb cov kwv tij nkauj muam thoob qab ntuj.​—1 Petus 2:17.

THOV VAJTSWV RAU IB TUG DHAU IB TUG

12. Vim li cas thaum peb ua tib zoo tshuaj cov kwv tij nkauj muam ho pab kom peb txawj thov Vajtswv pab lawv ib tug dhau ib tug?

¹² Ua zoo tshuaj. Dua li qhov uas thov Vajtswv pab ib pawg tib neeg, cia peb thov Vajtswv pab ib tug dhau ib tug thiab. Puas muaj ib tug twg nyob hauv koj lub koom txoos niaj hnub nyiaj mob? Puas muaj ib tug hluas twg nyob hauv koj lub koom txoos uas raug nws tej npoj txw kom ua tej yam tsis zoo? Puas muaj ib txhais yim neeg twg sib zog pab kom nws cov me nyuam ua “raws li Vajtswv Yehauvas tej lus qhuab ntuas thiab lub tswv yim”? (Efexaus 6:4) Yog peb ua tib zoo tshuaj ces peb yuav yim huab txawj thov Vajtswv pab peb cov kwv tij nkauj muam ib tug dhau ib tug vim peb hlub thiab xav txog lawv.b​—Loos 12:15.

13. Yuav ua li cas peb thiaj thov tau rau ib tug uas peb twb tsis tau ntsib nws dua?

¹³ Tuav npe thov Vajtswv pab tus uas koj thov rau. Peb yeej thov tau li no rau tej tug uas peb twb tsis tau ntsib dua. Xws li cov kwv tij nkauj muam uas raug kaw nyob rau hauv thaj tsam Khaimias (Crimea), teb chaws Elerhiyas (Eritrea), Lav Xias, thiab Xeekapos (Singapore). Yog koj xav paub cov kwv tij nkauj muam hu li cas ces koj mus tshawb tau rau hauv lub vej xaij jw.org.c Muaj ib tug saib xyuas thaj tsam npe hu ua Tsawb hais tias: “Thaum kuv muab ib tug kwv tij nkauj muam uas raug kaw lub npe sau tseg thiab hais nws lub npe nrov nrov ces yuav ua rau kuv cim tau nws lub npe zoo dua thaum kuv thov Vajtswv pab nws.”

14-15. Ua li cas peb thiaj txawj thov tsi ntsees pab lwm tus?

¹⁴ Thov tsi ntsees rau tej yam uas lwm tus xav tau. Vaj hais tias: “Thaum kuv nyeem tej zaj hauv lub vej xaij jw.org txog cov kwv tij uas raug kaw, kuv xav txog tej yam uas lawv xav tau. Kuv paub tias ua ib tug txiv tsev yus yeej txhawj txog yus tus poj niam thiab xav kom nws noj qab nyob zoo. Xav li no pab tau kom kuv thov tsi ntsees rau cov kwv tij muaj txwj nkawm uas raug kaw.”​—Henplais 13:3.

¹⁵ Yog peb zaum tsaws xav txog cov kwv tij ntawd seb lawv ua dab tsi ib hnub dhau ib hnub, ces yuav pab tau kom peb xav tias yuav thov dab tsi los pab lawv. Xws li peb kuj thov tau kom cov tub ceev xwm uas zov tsev loj cuj ua zoo rau lawv thiab tej nom tswv tso cai rau lawv teev tiam Yehauvas ywj pheej hauv lawv lub teb chaws. (1 Timautes 2:1, 2) Ntxiv ntawd, peb kuj thov tau kom tus kwv tij los sis nkauj muam uas raug kaw tso tau ib tug yam ntxwv zoo los mus txhawb lub koom txoos uas nyob ze nws los sis cov uas tsis ntseeg Yehauvas yuav pom nws tus cwj pwm zoo thiab xav mloog txoj xov zoo. (1 Petus 2:12) Tsis tas li ntawd, peb kuj thov tau tib yam nkaus rau cov kwv tij nkauj muam uas raug kev sim siab. Yog tias peb ua zoo tshuaj, tuav npe thov Vajtswv pab tus uas peb thov rau, thiab thov tsi ntsees rau tej yam uas lwm tus xav tau, ces twb yog peb qhia tias peb “txawj sib hlub.”​—1 Thexalaunikas 3:12.

THOV VAJTSWV LI TSIM NYOG THOV

16. Vim li cas peb thiaj li thov tau Vajtswv li tsim nyog? (Mathais 6:8)

¹⁶ Thaum peb thov Vajtswv peb tej lus thov yeej pab tau tiag tiag li. Kev thov Vajtswv tsis yog peb ceeb toom Vajtswv txog tej ub tej no uas Vajtswv tseem tsis tau paub los sis peb ho tsav tswv yim rau Vajtswv tias qhov twg rau qhov twg zoo dua. Yehauvas yeej paub tias nws cov tib neeg cheem tsum dab tsi rau dab tsi ua ntej nws cov tib neeg paub los sis peb paub. (Nyeem Mathais 6:8.) Yog li ntawd peb haj tseem thov Vajtswv ua dab tsi? Dua li tej uas peb tham tag los lawd, kev thov Vajtswv pab lwm tus qhia tias peb yeej hlub tshua txog lawv. Kev hlub pab kom peb ib leeg thov Vajtswv pab ib leeg. Yehauvas yeej zoo siab heev thaum nws pom nws cov tib neeg xyaum nws txoj kev hlub.

17-18. Piav seb peb cov lus thov pab tau peb cov kwv tij nkauj muam li cas?

¹⁷ Txawm peb cov lus thov zoo yam li pab tsis tau qhov teeb meem los qhov peb thov qhia tau tias peb hlub tshua peb cov kwv tij nkauj muam thiab Yehauvas yeej pom tej no. Cia peb muab ua piv txwv li no tias muaj ib tse tib neeg uas muaj ib tug tub thiab ib tug ntxhais. Tus tub ua npaws pw saum txaj. Ces tus me ntxhais thov nws leej txiv tias: “Txiv thov pab nws kom zoo. Nws mob heev li!” Leej txiv twb yeej pab tus tub lawm vim nws hlub tus tub heev. Qhov uas tus me ntxhais thov kom leej txiv pab tus tub ua rau leej txiv zoo siab heev vim qhov no qhia tias tus me ntxhais hlub nws tus nus kawg.

¹⁸ Zoo ib yam li ntawd Yehauvas txhawb thiab xav kom peb ib leeg nco ntsoov hlub ib leeg thiab thov Vajtswv pab ib leeg. Yog peb ua li no ces peb tej lus thov yuav qhia tau tias peb hlub tshua txog cov kwv tij nkauj muam tiag tiag thiab Yehauvas yeej pom tej no huv tib si. (2 Thexalaunikas 1:3; Henplais 6:10) Zoo li peb tau kawm tag los lawm hauv zaj no, muaj qee zaug peb cov lus thov kuj mus pab tau rau lwm tus lub neej thiab. Yog li ntawd, cia peb kub siab lug thov Vajtswv pab ib tug dhau ib tug kam tiag.