Tswj Lub Siab Uas Ntshaw Mus Ua Phem

1. Peb txhua tus yeej raug dab tsi?

KOJ puas muaj ib lub siab ntshaw plias ua ib yam twg uas Yehauvas tsis pom zoo? Yog tias koj tau xav li ntawd dua los lawm, tsis txhob xav hais tias tej uas koj raug hnyav tshaj lwm tus li. Nyob hauv phau Vajlugkub hais tias: “Txhua yam kev sim siab uas nej raug tsuas yog tej uas sawv daws raug xwb.” (1 Kauleethaus 10:13) Nqe no qhia tau tias koj lub siab uas ntshaw plias mus ua phem tsis yog koj muaj xwb tiam sis lwm leej lwm tus yeej ntsib tib yam nkaus. Nco ntsoov tias yog muaj Yehauvas pab koj lawm ces koj yeej yuav kov yeej.

2. Tej kev sim siab uas ib txhia kwv tij nkauj muam thiab ib txhia uas kawm Vajlugkub raug yog dab tsi? (Saib cov duab.)

² Nyob hauv phau Vajlugkub kuj hais tias: “Tus uas ua txhaum, yeej yog nws lub siab uas nyiam ua phem coj nws mus ua txhaum.” (Yakaunpaus 1:14) Nqe no pab kom peb nkag siab hais tias peb ib leeg nyias yuav raug lawm nyias ib txoj kev sim siab, yuav tsis zoo sib thooj. Xws li ib co kwv tij nkauj muam yuav raug sim mus ua kev nkauj kev nraug los sis ib txhia yuav raug sim kom txiv neej nyiam txiv neej, poj niam nyiam poj niam. Hos cov uas tseg tsis saib duab liab qab kuj muaj lub siab ntshaw plias rov mus saib tej duab liab qab. Hos cov uas tseg tsis haus dej haus cawv los sis haus yeeb haus tshuaj yuav muaj lub siab khiav khawv khuav rov mus ua tej ntawd tib yam nkaus. Nov tsuas yog ob peb yam uas peb hais txog tias cov kwv tij nkauj muam los sis cov kawm Vajlugkub ib txhia raug xwb. Nyob hauv peb lub neej, peb yeej tau xav li tus tub txib Povlauj dua los lawm tias: “Thaum kuv xav ua qhov ncaj qhov yog los kuv tseem muaj ib nplooj siab xav ua qhov phem qhov nkhaus thiab.”​—Loos 7:21.

3. Yog koj pheej ntshaw plias ua tej yam tsis zoo, yuav txo tau koj li cas?

³ Yog koj muaj lub siab yuj xeeb lias ua tej yam tsis yog ces tej zaum yuav ua rau koj qaug zog zis thiab yam li koj twb tswj tsis tau tej kev sim siab koj raug. Tej zaud koj kuj yuav tag kev cia siab, thiab yam li Yehauvas rau txim rau koj vim koj lub siab pheej yuj xeeb lias ua tej yam tsis zoo. Nco ntsoov tias tej no tsuas yog koj lam xav xwb tsis muaj tseeb! Nyob rau hauv zaj kawm no yuav piav txog ob yam no: (1) Leej twg xav kom koj qaug zog zis thiab tag kev cia siab? (2) Yuav ua li cas koj thiaj tswj tau lub siab uas yuj xeeb lias ua phem?

“XATAS” XAV KOM PEB XAV LI CAS?

4. (1) Vim li cas Xatas xav kom peb xav tias peb yuav kov tsis yeej kev sim siab? (2) Vim li cas peb ho kov yeej tau tej kev sim siab uas peb raug?

⁴ Xatas xav kom peb ntseeg tias peb yeej kov tsis yeej thaum peb raug kev sim siab. Yexus yeej paub zoo txog qhov no nws thiaj li hais rau nws cov thwj tim kom cia li thov li no: “Tsis txhob cia peb qaug rau tej kev sim siab tiam sis thov cawm peb dim ntawm Xatas txhais tes.” (Mathais 6:13) Xatas nyiam sim seb neeg puas yeem mloog Yehauvas thaum lawv raug kev sim siab. (Yauj 2:4, 5) Tiam sis Xatas yog tus rov qaug rau tej uas nws lub siab ntshaw, nws thiaj li muab Yehauvas tso pov tseg. Nws xav hais tias peb yuav zoo thooj nkaus li nws es muab Yehauvas tso tseg thaum peb raug sim. Tsis tas li ntawd, Xatas xav hais tias Vajtswv tus Tub mas yuav yooj yim qaug rau kev sim siab heev! (Mathais 4:8, 9) Tiam sis puas yog peb kov tsis yeej tej uas peb lub siab ntshaw? Yeej tsis muaj tseeb li ntawd. Peb yeej xav ib yam li Povlauj xav tias: “Kuv thev taus tej no tib si vim Vajtswv pub dag pub zog rau kuv.”​—Filipis 4:13.

5. Ua li cas peb ho paub tias Yehauvas tso siab plhuav tias peb yuav kov yeej tej yam phem uas peb lub siab ntshaw plias xav ua?

⁵ Yehauvas tsis zoo li Xatas. Yehauvas yeej tso siab plhuav tias peb yeej tswj tau lub siab ntshaw plias mus ua tej yam tsis yog. Peb paub li no vim Yehauvas tau faj lem tseg tias yuav muaj ib co tib neeg coob coob suav tsis txheeb dim txoj kev txom nyem loj kawg nkaus. Yehauvas tus uas tsis txawj dag, tau hais tias tsis yog qho leej xwb tiam sis yuav muaj neeg coob coob heev yuav tau nyob hauv lub qab ntuj tshiab vim “tus menyuam Yaj cov ntshav ntxhua lawv tej ris tsho thiab ntxuav lawv dawbhuv lawm.” Qhov no txhais tau tias Yehauvas saib lawv tsis muaj kev txhaum. (Tshwmsim 7:9, 13, 14) Yog li ntawd, Yehauvas paub ntsoov tias peb yeej kov yeej tau tej yam phem uas peb lub siab ntshaw.

6-7. Xatas xav kom peb ntseeg li cas?

⁶ Xatas xav kom peb ntseeg tias vim peb muaj lub siab uas ntshaw plias mus ua phem, Yehauvas yeej tsis pom zoo rau peb thiab peb tsis muaj kev vam kev cia siab dab tsi. Tiam sis Xatas yog tus uas tsis muaj kev vam kev cia siab, thiab Yehauvas tsis pom zoo rau nws thiab yuav tsis pub nws nyob mus ib txhis. (Chivkeeb 3:15; Tshwmsim 20:10) Yog li ntawd, Xatas thiaj li xav kom peb xav tias peb tag kev cia siab ib yam li nws. Nws yeej paub ntsoov tias peb yuav tau txais tej koob hmoov uas Yehauvas tsis pub rau nws ntxiv lawm. Yog li peb yeej muaj chaw tiag siab vim nyob hauv phau Vajlugkub qhia hais tias Yehauvas xav cawm kom peb dim. Nws “tsis xav cia ib tug twg puastsuaj mus, tiamsis nws xav kom txhua tus nyias muab nyias tej kev txhaum huv tibsi tso povtseg.”​—2 Petus 3:9.

⁷ Yog peb pheej xav hais tias peb kov tsis yeej peb lub siab uas ntshaw plias mus ua phem los sis yog peb tag kev vam kev cia siab tias peb yuav kov yeej ces twb yog peb tab tom qaug rau Xatas txoj kev xav lawm ntag. Thaum peb ras li no ces peb yuav hloov peb txoj kev xav thiab tawm tsam kom yeej Xatas.​—1 Petus 5:8, 9.

KEV TXHAUM UA TAU RAU PEB XAV LI CAS?

8. Dua li ntawm ua tau tej yam tsis zoo, kev txhaum ho txhais li cas ntxiv? (Phau Ntawv Nkauj 51:5) (Mus saib “Txhais Tawm.”)

⁸ Dua li ntawm Xatas, muaj dab tsi ntxiv ua rau peb xav tias peb tag kev cia siab thiab tswj tsis tau lub siab uas pheej khiav khawv khuav xav ua phem? Qhov ntawd yog peb qhov kev txaug kev txhaum uas saws tau los ntawm Adas thiab Evas.a​—Yauj 14:4; nyeem Phau Ntawv Nkauj 51:5.

9-10. (1) Tom qab Adas thiab Evas nkawd poob kev txhaum, muaj li cas los raug nkawd? (Saib daim duab.) (2) Kev txhaum ho raug rau peb li cas?

⁹ Cia peb ua zoo xav seb thaum Adas thiab Evas nkawd poob kev txhaum, nkawd ho xav li cas rau li cas. Tom qab nkawd tsis mloog Yehauvas lus, nkawd khiav mus nkaum thiab muab dab tsi los npog nkawd lub cev. Kev txhaum txawm ua rau nkawd lub siab rov qab nkaug nkawd, muaj kev ntxhov siab, tsis tso siab rau lub neej, thiab txaj muag. Nkawd txawm ua pes tsawg los nkawd yeej tsis dim kev txhaum, zoo yam nkaus li nkawd muab nkawd tus kheej xauv rau hauv ib lub tsev es tawm tsis tau.

¹⁰ Peb tsis zoo ib yam li Adas thiab Evas nkawd vim peb muaj tus nqi txhiv los mus theej peb lub txhoj, peb thiaj muaj kev sib raug zoo nrog Vajtswv. (1 Kauleethaus 6:11) Txawm li ntawd los peb haj tseem yog noob txaug neeg txhaum ces peb yeej muaj ib lub siab uas nkaug peb, muaj kev ntxhov siab, tsis tso siab rau lub neej, thiab txaj muag. Nyob hauv phau Vajlugkub qhia tias kev txhaum nplaum peb cuag li zia tab txawm peb “tsis tau ua txhaum li Adas.” (Loos 5:14) Txawm zoo li no los tsis txhob cia tej no txo tau peb. Peb yeej tswj tau tej kev xav uas dag ntxias peb ntawd. Cia peb mus kawm seb yuav tswj li cas.

11. Peb yuav ua li cas xwb thaum peb xav tias peb kov tsis yeej lub siab uas xav mus ua phem, thiab yog vim li cas? (Loos 6:12)

¹¹ Thaum peb xav tias peb kov tsis yeej lub siab uas ntshaw plias mus ua tej yam phem, cia peb muab xav tias yog peb txoj kev txaug kev txhaum tswj kom peb ua ces peb yuav tau tsis txhob mloog. Vim nyob hauv phau Vajlugkub qhia kom peb tsis txhob cia kev txhaum “kav” peb kom ua tej yam tsis yog. (Nyeem Loos 6:12.) Qhov no qhia tau tias peb yeej tswj tau lub siab uas khiav khawv khuav mus ua phem. (Kalatias 5:16) Yehauvas tso siab plhuav tias peb yeej tswj tau tej kev sim siab, nws thiaj li qhia kom peb tswj kam tiag. (2 Kevcai 30:11-14; Loos 6:6; 1 Thexalaunikes 4:3) Yog li ntawd, qhov no qhia tau tias peb yeej kov yeej tau lub siab uas ntshaw plias mus ua phem.

12. Peb yuav coj li xwb yog peb pheej tag kev cia siab thiab yog vim li cas?

¹² Yog peb pheej tas kev cia siab es xav hais tias Yehauvas yuav rau txim rau peb vim peb pheej xav txog qhov tsis zoo ces cia peb muab xav tias yog peb txoj kev txaug kev txhaum tswj kom peb xav li ntawd ces peb yuav tau tsis txhob mloog. Vim nyob hauv phau Vajlugkub qhia tias Yehauvas yeej xam pom tias peb yog noob txaug neeg txhaum. (Phau Ntawv Nkauj 103:13, 14) Nws yeej paub txhua yam txog peb, nws thiaj li tsis suav txim rau peb vim nws paub tias kev txaug kev txhaum ua rau peb xav li ntawd xwb. (1 Yauhas 3:19, 20) Yog peb pheej tswj lub siab uas ntshaw plias ua phem thiab tsis mus ua tej ntawd ces Yehauvas haj tseem suav tias peb yog neeg dawb neeg huv ntawm nws lub zeem muag. Ua cas peb ho paub li ntawd?

13-14. Piav seb thaum peb lub siab pheej xav txog tej yam tsis zoo, puas yog peb ua txhaum Yehauvas lawm.

¹³ Nyob hauv phau Vajlugkub qhia tseeb tseeb tias qhov uas yus pheej xav txog tej yam tsis zoo thiab qhov uas yus mus ua tej yam tsis zoo ntawd yeej sib txawv. Peb tswj tsis tau tias thaum twg peb yuav xav txog qhov tsis zoo tiam sis peb yeej tswj tau qhov uas peb mus ua tsis zoo. Xws li nyob rau thaum thawj 100 xyoo, ua ntej ib co Khixatias hauv Kauleethaus los ntseeg, lawv coj lub neej uas txiv neej nyiam txiv neej thiab poj niam nyiam poj niam. Povlauj thiaj sau li no tias: “Yav nram ntej nej ib txhia tau coj li no ntag.” Ua li puas yog tom qab lawv los ntseeg lawd, lawv tsis muaj lub siab xib rov qab mus ua dua lawm? Tej zaud yuav nyuaj rau lawv vim tej ntawd twb siav tag rau hauv lawv lub siab lub ntsws lawm. Tiam sis cov uas tswj tau lawv lub siab kom tsis txhob rov mus ua dua yeej ua haum Yehauvas siab. Yehauvas twb suav tam li muab lawv ntxuav dawb huv lawm. (1 Kauleethaus 6:9-11) Yog koj muaj lub siab xav li ntawd koj yeej tswj tau ib yam nkaus li lawv thiab.

¹⁴ Txawm koj lub siab pheej khiav khawv khuav ua tej yam tsis zoo los koj yeej tswj tau lub siab ntawd. Txawm koj muab hlais tsis tau pov tseg los koj yeej tswj tau kom tsis txhob mus ua “raws li [koj] lub cev thiab [koj] lub siab” yuam kom koj ua. (Efexus 2:3) Yog li ntawd, dab tsi thiaj yuav pab tau kom koj tswj lub siab ntawd nrees?

KOV YEEJ KEV SIM SIAB

15. Yuav kom peb kov yeej peb lub siab uas ntshaw plias ua tsis zoo, peb yuav tau xam pom li cas txog peb tus kheej?

¹⁵ Yuav kom koj kov yeej lub siab uas ntshaw plias mus ua tej yam tsis zoo, koj yuav tsum xam pom tias tseem tshuav qho yam koj yuav tau hloov. Koj yuav tau ua tib zoo ceev faj tsis txhob rov dag koj tus kheej. (Yakaunpaus 1:22) Muab ua piv txwv li no tias yog ib tug neeg nyiam haus cawv ntau ntau, tej zaum nws yuav hais tias, ‘Lwm tus tseem haus ntau tshaj kuv,’ kom nws thiaj tau zoo haus ntxiv. Los sis yog tias koj ho yog ib tug neeg uas nyiam saib duab liab qab ces tej zaum koj yuav muab liam rau lwm tus tias, ‘Tos kuv muaj lub siab zoo li no los twb yog tim kuv poj niam tsis muab kev hlub txaus rau kuv.’ Yog koj pheej xav li hais no ces koj yuav tswj tsis tau lub siab uas ntshaw plias mus ua tej yam tsis zoo. Yog li ntawd, tsis txhob liam tus ub tus no tiam sis koj yuav tau ris koj lub nra.​—Kalatias 6:7.

16. Yuav ua li cas koj thiaj li ua tau qhov zoo qhov yog?

¹⁶ Dua li qhov uas koj xam pom tias koj yuav tau hloov, koj yuav tsum tau tswj koj lub siab kam tiag kom tsis txhob rov mus ua ntxiv. (1 Kauleethaus 9:26, 27; 1 Thexalaunikes 4:4; 1 Petus 1:15, 16) Ua tib zoo xav seb dab tsi sim koj lub siab tshaj thiab yog thaum lub caij twg. Xws li puas yog thaum koj nkees nkees los sis yog thaum ib tag hmo? Koj yuav tau npaj koj tus kheej thiab xav seb koj yuav ua li cas thaum koj lub siab xav txog tej kev sim siab ntawd. Tsis txhob tos thaum muaj kev sim siab koj mam li xav tiam sis koj yuav tau xav ua ntej.​—Pajlug 22:3.

17. Yauxej tso tau yam ntxwv li cas rau peb xyaum? (Chivkeeb 39:7-9) (Saib cov duab.)

¹⁷ Puag thaum ub muaj ib tug txiv neej hu Yauxej raug nws tus los pav Pautifas tus poj niam ntxias deev tiam sis Yauxej txawm teb ntua tias nws tsis kam nrog tus poj niam ntawd sib daj sib dee. (Nyeem Chivkeeb 39:7-9.) Zaj no qhia tau peb li cas? Yauxej yeej paub tias tsis zoo rau yus mus txeeb luag tej poj niam los yuav. Yauxej yeej ib txwm xav li no ua ntej Pautifas tus poj niam haub ntxias nws. Niaj hnub nim no los peb yeej cob tau peb tus kheej ib yam li Yauxej ua ntej yuav muaj kev sim siab. Yog peb ua li no lawm ces yuav yooj yim rau peb ua raws li tej uas peb twb npaj tseg lawm thaum muaj kev sim siab.

“TSHUAJ NEJ TUS KHEEJ”

18. Yuav ua li cas koj thiaj kov yeej lub siab uas ntshaw plias mus ua tej yam tsis zoo? (2 Kauleethaus 13:5)

¹⁸ Yuav kom yus kov yeej txoj kev ntshaw plias mus ua tsis zoo, yus yuav tsum “tshuaj” ntshis yus tus kheej seb yus coj li cas rau li cas. (Nyeem 2 Kauleethaus 13:5.) Nco ntsoov tej thaud yus yuav tau tshuaj tej uas yus xav thiab ua. Yog muaj qho yam yus yuav tau hloov ces kav tsij hloov. Xws li yog yus xav zam kom dhau kev sim siab ces nco ntsoov tshuaj yus tus kheej li no: ‘Siv sij hawm ntev npaum li cas kuv mam li teb tias tsis kam?’ Yog yus pheej ua xyem xyav, tsis txhob rawm maj rau txim rau yus tus kheej tiam sis ua zoo xav seb lwm zaus yus yuav ua li cas thiaj zoo. Koj yuav tau tshuaj li no ntxiv: ‘Ua li yav tom ntej no yog thaum twg kuv xav kiag tau ib yam tsis zoo, kuv puas tswj tau tam sim ntawd es mus xav dua lwm yam? Tej yam kuv saib, nyeem los sis mloog puas ua rau kuv mus xyaum ua tej yam tsis zoo? Thaum pom tej yeeb yaj kiab los sis duab ua kev plees kev yis, kuv puas fee plhu? Kuv puas nkag siab tias tej Yehauvas qhia zoo dua thiab puas tsim nyog rau kuv mloog Yehauvas lus es tsis mus saib thiab ua tej yam tsis zoo?’​—Phau Ntawv Nkauj 101:3.

19. Tej yam uas zoo li tsis loj ua luaj twg ho coj tau peb mus ua raws li peb lub siab ntshaw li cas?

¹⁹ Thaum koj tshuaj koj tus kheej, ua zoo saib kom koj tsis txhob rov dag koj tus kheej kom tau zoo mus ua tej yam tsis zoo. Nyob hauv phau Vajlugkub hais tias: “Tsis muaj ib yam dabtsi uas txawj dag ntxias li neeg lub siab.” (Yelemis 17:9) Yexus hais tias “tej uas tawm hauv lub siab tuaj ua rau neeg xav phem.” (Mathais 15:19) Xws li tus tib neeg uas tsis saib tej duab liab qab lawm tej zaud tom qab no nws kuj xav tias tsis ua li cas yog nws saib tej thaj duab uas luag yees tau plees plees vim tsis pom tus tib neeg ntawd liab qab. Los sis tej zaum nws kuj hais tias, ‘Yog kuv twb tsis ua ces kuv xav xwb los tsis ua li cas.’ Yog tus tib neeg xav li no ces twb yog nws “ntaus tswv yim mus ua txhaum raws li cev nqaij daim tawv ntshaw.” (Loos 13:14) Yuav ua li cas koj thiaj zam tau es tsis mus ua tej no? Yog koj ceev faj thiab txawj txiav txim siab rau tej yam uas tsis ua luaj twg loj ces koj yeej yuav txawj txiav txim siab rau thaum muaj tej yam loj.b Thaum koj rov dag koj tus kheej los sis pheej “ntaus tswv yim mus ua txhaum” ces koj yuav tau fee hlo tsis txhob mloog.

20. Peb tos tsis hnyu rau tej yam twg yav tom ntej, thiab tam sim no peb ho tau kev pab li cas?

²⁰ Raws li peb kawm hauv zaj no Yehauvas yeej yuav muab lub dag zog kom peb kov yeej kev sim siab. Peb ua nws tsaug rau nws txoj kev hlub tshua, peb thiaj li muaj txoj kev vam kev cia siab uas yuav nyob mus ib txhis hauv lub qab ntuj tshiab. Thaum lub caij ntawd, peb yuav muaj lub siab dawb paug teev tiam Yehauvas mas yuav ua rau peb nyob kaj siab lug! Ua ntej lub sij hawm ntawd los txog, cia peb nco ntsoov tias peb yeej tsis tag kev cia siab thiab peb yeej muaj peev xwm kov yeej tau tej yam tsis zoo uas peb lub siab ntshaw plias mus ua. Yog Yehauvas twb foom koob hmoov rau peb lawm ces peb yeej yuav kov yeej xwb xwb li!