Saib Taus Lwm Tus

1. Vim li cas tib neeg nyiam heev thaum luag saib taus lawv? (Pajlug 22:1)

NTSHE koj yuav zoo siab heev thaum lwm tus saib taus koj. Txhua tus tib neeg yeej txaus siab heev thaum lwm tus saib taus lawv. Thaum luag saib taus peb mas ua rau peb luag ntxhwb ntxhi xwb. Vim li no phau Vajlugkub thiaj li hais tias “xaiv qhov luag saib taus zoo dua li xaiv yuav nyiaj thiab kub”!​—Nyeem Pajlug 22:1.

2-3. Peb yuav tau saib taus leej twg?

² Muaj tej thaum tsis yooj yim rau peb saib taus lwm tus. Ib qho yog vim peb paub qhov tsis zoo ntawm lwm tus. Tsis tas li ntawd, peb kuj nyob rau tiam uas tib neeg ib leeg saib tsis taus ib leeg. Tiam sis peb yuav tsum tsis txhob coj li ntawd vim Yehauvas xav kom peb “hwm txhua tus.”​—1 Petus 2:17.

³ Nyob rau hauv zaj kawm no yuav tham txog tias saib taus lwm tus yog li cas tiag thiab yuav ua li cas peb thiaj saib taus (1) peb tsev neeg, (2) cov kwv tij nkauj muam, thiab (3) cov tsis ntseeg Yehauvas. Peb kuj yuav kawm seb peb yuav saib taus lwm tus li cas tab txawm nyuaj npaum twg.

SAIB TAUS LWM TUS YOG LI CAS TIAG?

4. Thaum peb saib taus lwm tus ces peb yuav coj cwj pwm zoo li cas?

⁴ Saib taus lwm tus yog li cas tiag? Muaj tej tug muaj koob nto npe, tuav hauj lwm siab, txawj ua ub ua no los sis coj cwj pwm zoo ces thaum peb pom lawv peb thiaj li mloog lawv tej lus. Tsis tas li ntawd, peb kuj muab lawv tso rau ib qho chaw siab uas lawv paub tias peb saib lawv rau nqi. Thiab tej peb ua ntawd tsis yog ua kom tag kev tag cai tiam sis tawm plaws hauv nruab siab tuaj.​—Mathais 15:8.

5. Dab tsi pab tau kom peb saib taus lwm tus?

⁵ Yehauvas xav kom peb saib taus lwm tus. Xws li nws hais kom peb saib taus “tej nom tswv.” (Loos 13:1, 7) Tiam sis ib txhia hais tias, ‘Yog nws ua zoo ces luag yeej yuav hwm tsis tas hais.” Ua li yog peb xav li no puas yog lawm? Tsis yog rau qhov Yehauvas xav kom peb hwm lwm tus tab txawm lawv ua tau zoo thiab tsis zoo los xij peem. Vim peb hlub Yehauvas thiab xav ua li nws hais, peb thiaj li saib taus lwm tus.​—Yausuas 4:14; 1 Petus 3:15.

6. Piav seb peb puas saib taus tej tug uas twb tsis kam saib taus peb. (Saib daim duab ntawm lub khaum.)

⁶ Muaj ib txhia hais li no tias, ‘Puas tsim nyog peb saib taus tej tug uas twb saib tsis taus peb?’ Peb yeej saib taus. Xws li thaum Vaj Ntxwv Xa-us hais lus tshawv tshawv rau nws tus tub Yaunathas tab meeg sawv daws. (1 Xamuyees 20:30-34) Txawm li ntawd los Yaunathas haj tseem saib taus nws txiv thiab nrog nws txiv mus ntaus rog mus tas nws txiv lub neej txoj sia. (Khiav Dim 20:12; 2 Xamuyees 1:23) Hos muaj dua ib zaug tus Pov Thawj Hlob Elis hais lus saib tsis taus Hanas thiab liam tias nws qaug cawv. (1 Xamuyees 1:12-14) Txawm li ntawd los Hanas yeej hais lus saib taus Elis tab txawm luag paub tias Elis tsis yog ib leej txiv thiab ib tug pov thawj hlob zoo. (1 Xamuyees 1:15-18; 2:22-24) Ntxiv ntawd muaj ib co txiv neej nyob hauv Athees thuam tias tus tub txib Povlauj yog ib tug “neeg ntau ncauj.” (Tes Hauj Lwm 17:18) Txawm li ntawd los Povlauj yeej tsis hais lus siab cov txiv neej ntawd ib tug li. (Tes Hauj Lwm 17:22) Cov yam ntxwv no qhia tias yog peb txoj kev hlub rau Yehauvas loj heev thiab xav ua haum nws siab ces yuav tsis nyuaj rau peb hwm lwm tus tab txawm yuav nyuaj npaum cas los xij peem. Cia peb mus tham seb leej twg yog cov uas tsim nyog rau peb hwm thiab yog vim li cas.

SAIB TAUS PEB TSEV NEEG

7. Vim li cas ho nyuaj rau peb saib taus peb tsev neeg?

⁷ Qhov nyuaj. Peb yeej lauj sij hawm ntau heev nrog peb tsev neeg ua ke ces peb yeej paub qhov lawv ua tau zoo thiab qhov lawv ua tau tsis zoo. Tej zaud ib txhia nyob hauv peb tsev neeg muaj mob ces yuav nyuaj rau peb tu lawv los sis ib txhia muaj ntau yam kev nyuaj siab. Hos ib txhia kuj tsis txawj hais lus thiab tsis txawj coj ces yuav ua siab siab rau ib txhia. Ntxiv ntawd ib txhia tsis xav kom tsev neeg nyias nyob nyias ces pheej txob kom muaj kev sib cav sib ceg vim nws saib tsis taus nws tsev neeg. Vim muaj tej yam zoo li no nyob rau hauv tsev neeg ces tsev neeg thiaj tsis muaj kev sib haum xeeb. Cia peb muab ua piv txwv li no tias lub cev piv rau ib tse neeg ces thaum ib tse neeg tsis sib haum ces zoo li lub cev mob laug. Tej zaum peb kho tsis tau kom lub cev txhob mob laug tiam sis peb yeej kho tau kom peb tsev neeg ib leeg saib taus ib leeg.

8. Vim li cas ho tseem ceeb rau peb saib taus peb tsev neeg? (1 Timautes 5:4, 8)

⁸ Vim li cas yuav tau saib taus? (Nyeem 1 Timautes 5:4, 8.) Nyob rau hauv Povlauj thawj tsab ntawv uas nws sau rau Timautes tham txog tsev neeg ib leeg yuav tsum pab ib leeg. Nws qhia tias qhov uas peb saib taus peb tsev neeg tsis yog lam ua kom tas kev cai xwb tiam sis yog vim peb muab siab npuab Vajtswv. Qhov no qhia tias tos peb ua li no yog vim peb hlub Yehauvas thiab kuj yog ib feem ntawm qhov uas peb teev tiam Yehauvas. Yehauvas yog tus npaj kom tsev neeg zoo li cas rau li cas. (Efexaus 3:14, 15) Yog li ntawd, thaum peb hwm ib tug hauv peb tsev neeg ces twb yog peb hwm Yehauvas tus uas pub kom muaj tsev neeg. Yog peb nco ntsoov li no ces peb yuav saib taus peb tsev neeg!

9. Tus txiv thiab tus niam ib leeg saib taus ib leeg li cas? (Saib cov duab.)

⁹ Yuav saib taus li cas? Tus txiv uas saib taus nws tus poj niam yeej saib taus thaum nyob hauv vaj hauv tsev thiab thaum tawm sab nraud. (Pajlug 31:28; 1 Petus 3:7) Nws tsis ntaus, tsis ncaws, tsis thuam los sis ua kom nws tus poj niam tsis muaj nuj nqis. Muaj ib tug kwv tij nyob teb chaws Antsitinas (Argentina) npe hu ua Lisa hais tias: “Kuv poj niam muaj ib tug mob ces tej thaud nws lam tau lam hais tej lo ua rau kuv tu siab heev. Thaum muaj li no kuv pheej hais rau kuv tus kheej tias nws tsis yog ib tug neeg zoo li ntawd thiab nws muaj mob nws thiaj lam tau lam hais li ntawd xwb. Tej lub sij hawm nyuaj rau kuv kawg tiam sis kuv nco ntsoov 1 Kauleethaus 13:5 uas txhawb kom kuv ua tib zoo nrog nws hais lus es tsis txhob cem thiab npau taws rau nws.” (Pajlug 19:11) Tus poj niam uas hwm nws tus txiv yeej hais qhov zoo txog nws tus txiv rau lwm tus xwb. (Efexaus 5:33) Nws tsis thuam, tsis hais lus tuam mom, thiab muab nws tus txiv hu tej npe phem phem. Nws paub tias yog nws ua li ntawd ces tsuas rhuav nws txoj kev txij nkawm xwb. (Pajlug 14:1) Muaj ib tug muam nyob rau teb chaws Ithali (Italy) tus txiv muaj kev nyuaj siab tau hais tias: “Tej thaud kuv xav tias kuv tus txiv txhob txwm kov xwb. Yav tag los lawd thaum kuv tus txiv ua li ntawd mas kuv ua ntsej muag dub txig thiab hais lus nyaum tsawv rau nws. Tiam sis thaum kuv nrog cov phooj ywg uas hais lus saib taus lwm tus ces kuj pab tau kom kuv hais lus saib taus kuv tus txiv.”

10. Cov me nyuam qhia tau li cas tias lawv saib taus lawv niam lawv txiv?

¹⁰ Cov hluas, cia li mloog tej kev cai uas nej niam nej txiv tsa rau hauv nej vaj nej tsev. (Efexaus 6:1-3) Hais lus saib taus nej niam nej txiv. (Khiav Dim 21:17) Thaum nkawd laus lawm, tej zaum nkawd yuav xav tau nej tej kev pab. Cia li ua npaum li nej ua tau los mus pab nkawd. Cia peb mus tham txog ib tug muam npe hu ua Maiv Mim. Nws txiv tsis yog Yehauvas ib tug Tim Khawv. Thaum nws txiv mob ces nws txiv ua nyuaj heev rau nws. Maiv Mim hais tias: “Kuv thov Yehauvas pab kom kuv saib taus kuv txiv thiab ua qhia tias kuv yeej saib taus nws. Kuv xav tias yog Yehauvas twb xav kom peb hwm peb niam peb txiv ces nws yeej yuav ntxiv dag ntxiv zog kom kuv ua tau li ntawd. Ntev mus ntev tuaj kuv xam pom tias txawm kuv txiv tsis hloov nws tus cwj pwm los kuv yuav tau saib taus kuv txiv.” Thaum peb saib taus peb tsev neeg tab txawm nyuaj npaum li cas, twb yog peb hwm qhov uas Yehauvas npaj kom muaj tsev neeg.

SAIB TAUS COV KWV TIJ NKAUJ MUAM

11. Vim li cas ho nyuaj rau peb saib taus cov kwv tij nkauj muam?

¹¹ Qhov nyuaj. Peb cov kwv tij nkauj muam yeej siv zog xyaum ua neej raws li qhia rau hauv phau Vajlugkub tiam sis muaj tej lub sij hawm lawv ua tau tsis zoo rau peb, lawv coj tsis ncaj rau peb los sis ua tej yam xeeb txob peb. Yog ib tug kwv tij nkauj muam twg “ua tau siab yus” ces yeej tsis yooj yim rau yus saib taus nws. (Kaulauxis 3:13) Ua li dab tsi thiaj li yuav pab tau kom peb saib taus nws?

12. Vim li cas ho tseem ceeb rau peb saib taus cov kwv tij nkauj muam? (2 Petus 2:9-12)

¹² Vim li cas yuav tau saib taus? (Nyeem 2 Petus 2:9-12.) Nyob rau hauv Petus tsab ntawv ob, Petus hais txog tias muaj ib co Khixatias nyob thawj 100 xyoo hais lus saib tsis taus cov txwj laus. Cov tub txib saum ntuj yeej pom thiab hnov tej lus uas lawv hais ntawd. Ua li cov tub txib saum ntuj coj li cas xwb? Lawv tsis hais ib lo lus los tawm tsam cov tib neeg ntawd vim lawv saib taus Yehauvas! Lawv cia seb Yehauvas yuav txiav txim li cas xwb. (Loos 14:10-12; muab piv rau Yudas 9.) Cia peb kawm cov tub txib saum ntuj no. Yog peb twb saib taus cov uas tawm tsam peb txoj kev ntseeg ces peb yuav tau yim huab saib taus cov kwv tij nkauj muam uas nrog peb ntseeg Yehauvas ua ke. Cia peb “xub hwm” luag ua ntej. (Loos 12:10) Qhov uas peb ua li no qhia tias peb saib taus Yehauvas.

13-14. Piav seb yuav ua li cas peb thiaj saib taus cov uas nyob hauv lub koom txoos. (Saib cov duab.)

¹³ Yuav saib taus li cas? Cov txwj laus, thaum nej yuav qhia lwm tus, nej yuav tau muaj lub siab hlub. (Filemoos 8, 9) Thaum nej yuav ntuas ib tug twg, ua tib zoo hais, tsis txhob hais thaum nej chim. Cov muam, qhov uas nej pab tau kom cov uas nyob hauv lub koom txoos ib leeg saib taus ib leeg yog nej tsis txhob ua neeg taug xaiv los sis tsis txhob hais lus dag txog ib tug twg. (Titus 2:3-5) Peb txhua tus yeej muaj rab peev xwm saib taus cov txwj laus yog tias peb mloog lawv hais thiab ris txiaj ntsig rau tej hauj lwm uas lawv ua xws li coj thaum mus kev sib txoos, coj thaum mus tshaj tawm txoj xov zoo, thiab pab tus uas “pib yuam kev.”​—Kalatias 6:1; 1 Timautes 5:17.

¹⁴ Muaj ib tug muam npe hu ua Lug hais tias nyuaj heev rau nws saib taus ib tug txwj laus uas ntuas nws. Nws hais tias: “Kuv xav tias nws ntuas kuv hnyav zog lawm. Nyob hauv tsev, kuv hais phem kawg li txog nws. Txawm kuv tsis tab meeg ua qhia tias kuv tsis nyiam nws tej lus ntuas los nyob hauv kuv nruab siab kuv tsis mloog nws hais.” Puas muaj dab tsi pab tau Lug? Nws hais tias: “Thaum kuv nyeem 1 Thexalaunikas 5:12, 13, kuv xam pom tias kuv saib tsis taus tus kwv tij no ces kuv lub siab rov qab nkaug kuv. Kuv thov Yehauvas thiab tshawb nrhiav tej ntaub ntawv uas Yehauvas lub koom haum luam tawm los pab kom kuv hloov kuv tus cwj pwm. Kuv mam li ras tias qhov teeb meem tsis yog tus kwv tij tiam sis yog tim kuv tsis txo hwj chim. Tam sim no kuv xam pom tias kuv yuav tau txo hwj chim, kuv thiaj li saib taus lwm tus. Kuv haj tseem niaj hnub xyaum tiag kom kuv saib taus lwm tus thiab kuv xam pom tias Yehauvas txaus siab rau tej uas kuv ua ntawd.”

SAIB TAUS COV TSIS NTSEEG YEHAUVAS

15. Vim li cas ho nyuaj rau peb saib taus cov uas tsis ntseeg Yehauvas?

¹⁵ Qhov nyuaj. Muaj ntau zaus thaum peb mus tshaj tawm txoj xov zoo peb ntsib cov tib neeg uas tsis nyiam phau Vajlugkub thiab Vajtswv. (Efexaus 4:18) Hos ib txhia tsis kam mloog vim lawv yeej ib txwm loj hlob los ntseeg dua lwm yam. Tej zaud koj tus los pav tom hauj lwm los sis xib hwb tom tsev kawm ntawv kuj ua nyuaj heev thiab tej zaum cov neeg nrog koj ua hauj lwm los sis cov nrog koj kawm ntawv kuj ua nyuaj rau koj thiab. Ntev mus ntev tuaj qhov uas peb saib taus lawv txawm tsuag zuj zus lawm thiab peb kuj tsis tshua xav ua zoo rau lawv.

16. Vim li cas ho tseem ceeb rau peb saib taus cov uas tseem tsis tau los ntseeg Yehauvas? (1 Petus 2:12; 3:15)

¹⁶ Vim li cas yuav tau saib taus? Nco ntsoov Yehauvas yeej saib seb peb puas ua zoo rau cov uas tsis ntseeg Yehauvas. Tus tub txib Petus hais rau cov Khixatias tias yog lawv coj zoo ces tej zaum yuav ua rau lwm tus “qhuas Vajtswv.” Yog li ntawd nws thiaj hais tias thaum lawv piav lawv txoj kev ntseeg rau lwm tus, lawv yuav tsum muaj lub siab “mosmuag” thiab “hwm” lwm tus. (Nyeem 1 Petus 2:12; 3:15, 16.) Txawm cov Khixatias yuav tau piav lawv txoj kev ntseeg rau ib tug txiav txim los sis ib tug neeg zej zog, lawv yuav tau saib taus lwm tus ib yam li lawv tab meeg sawv ntawm Vajtswv lub xub ntiag. Yehauvas yeej mloog thiab saib ntsoov seb peb hais li cas rau lwm tus. Qhov no qhia tias peb yuav tau saib taus cov uas tsis ntseeg Yehauvas tiag tiag li!

17. Peb ho saib taus cov uas tsis ntseeg Yehauvas li cas?

¹⁷ Yuav saib taus li cas? Thaum peb mus tshaj tawm, peb yuav tau tsis txhob saib tsis taus tej tug uas tsis tshua paub Vajlugkub. Peb yuav tau nco ntsoov tias Vajtswv saib lawv rau nqi heev thiab peb yuav tau saib lawv hlob dua peb. (Hakais 2:7; Filipis 2:3) Yog muaj leej twg thuam peb txoj kev ntseeg, peb yuav tau tswj peb lub siab es tsis txhob hais lus tuam mom rau lawv. (1 Petus 2:23) Yog peb ho hais tau siab tau qis lawm los cia li thov kev zam txim tam sim ntawd. Ua li peb yuav coj li cas nrog cov ua hauj lwm nrog peb? Rau siab ntso ua hauj lwm thiab xyaum coj cwj pwm zoo rau koj tus los pav thiab cov neeg koj ua hauj lwm nrog. (Titus 2:9, 10) Tej zaud thaum koj ua hauj lwm tsis muaj neeg pom tias koj coj ncaj thiab nquag ua hauj lwm los Yehauvas yeej pom thiab nws txaus siab heev rau koj.​—Kaulauxis 3:22, 23.

18. Vim li cas ho zoo rau peb saib taus lwm tus?

¹⁸ Raws li zaj kawm no peb pom tias thaum peb saib taus peb tsev neeg thiab cov kwv tij nkauj muam ces twb yog peb hwm peb Leej Txiv Yehauvas. Thaum peb saib taus cov uas tsis ntseeg Yehauvas ces twb yog peb qhib txoj hau kev rau lawv los qhuas thiab hwm Yehauvas. Txawm tias tib neeg saib tsis taus peb los peb yuav tau saib taus lawv. Vim li cas peb ho yuav tau ua li ntawd? Yog peb ua li no Yehauvas thiaj yuav foom koob hmoov rau peb. Nws cog lus tias: “Kuv yuav hwm tus uas hwm Kuv.”​—1 Xamuyees 2:30.