Tej Uas Peb Xav Paub

Tus uas sau Pajlug 30:18, 19 hais tias “kuv xav tsis thoob thiab tsis totaub . . . qhov uas pojniam txivneej txawj sibnyiam.” Ua li puas muaj li ntawd tiag?

Muaj coob leej ntau tus tsis nkag siab tias cov lus no yog hais li cas tiag, tsis hais cov neeg uas tshawb fawb phau Vajlugkub huv tib si. Tag nrho ob nqe Vajlugkub ntawd hais tias: ‘Muaj plaub yam uas ua rau kuv xav tsis thoob thiab tsis totaub: qhov uas tus dav ya tau saum nruabntug, qhov uas tus nab ntaug tau saum tej pobzeb, qhov uas lub nkoj khiav tau ntab yees saum nplaimdej, thiab qhov uas pojniam txivneej txawj sibnyiam.’​—Pajlug 30:18, 19.

Yav tag los lawd peb xav hais tias “qhov uas pojniam txivneej txawj sibnyiam” yog hais txog ib yam tsis zoo. Tos peb hais li no los muaj dua lwm nqe piav txog tej yam tsis zoo uas hais tsis ntxaws. (Pajlug 30:15, 16) Thiab nyob rau ntawm nqe 20 hais txog “tus pojniam uas tsis ncaj.” Nws tsis kam lees tias nws tau ua yuam kev. Yog li ntawd peb thiaj li xav tias nqe ntawd hais txog ib yam uas ib tug tau ua es tsis muaj pov thawj qhia tias nws tau ua lawm. Zoo ib yam li tus dav ya saum nruab ntug, tus nab ntaug saum pob zeb los sis lub nkoj uas ntab deb deb saum nplaim dej, tus txiv neej tau ua ib yam uas tsis muaj neeg paub txog. Sob lus no thiaj ua rau peb xav tias yog hais txog ib yam phem uas tus tub hluas ntxias ib tug hluas nkauj nrog nws pw ua niam txiv.

Tiam sis zoo yam li ob nqe ntawd yog hais mus rau qhov zoo. Tus uas sau ntawd tsuas piav txog tej yam ua rau nws xav tsis thoob xwb.

Cov lus Henplais kuj qhia tias ob nqes no tsuas hais rau qhov zoo xwb. Raws li ib phau ntawv uas tshawb nrhiav txog phau Vajlugkub,a cov lus Henplais “xav tsis thoob thiab tsis to taub” hauv Pajlug 30:18 “qhia txog ib yam zoo heev los sis ntseeg tsis taus.”

Nyob hauv Yunaithim Xatej (United States), muaj ib tug xib hwb nyob hauv tsev kawm ntawv qib siab npe hu ua Khafaws Tos (Crawford H. Toy) hais tias ob nqes no tsis yog hais mus rau qhov phem. Nws hais tias: “Tus sau tsuas yog hais txog tej yam uas ua rau nws xav tsis thoob xwb.”

Raws li tshawb nrhiav no mas cov lus nyob hauv Pajlug 30:18, 19 yog piav txog tej yam uas zoo heev uas tsis muaj ib hnub peb nkag siab tau. Zoo ib yam li tus sau phau Pajlug, peb yeej xav tsis thoob tias vim li cas tus dav ho txawj ya mus siab heev, vim li cas nab ho txawj ntaug tau saum lub pob zeb, vim li cas ib lub nkoj hnyav hnyav ho ntab yees saum nplaim dej, thiab vim li cas ib tug tub hluas thiab ntxhais hluas ho sib hlub tau thiab nyob tau ua ke zoo siab hlo.