Xaiv Yam Zoo Nyob Rau Tiam Kawg No

1. Peb nyob rau tiam twg lawd?

PEB nyob rau “lub sijhawm txom nyem nyuaj siab kawg.” Txij xyoo 1914 los peb nyob rau “tiam kawg” lawm. Lub qab ntuj no thiaj phem ua luaj li lawm. (2 Timaute 3:1-5) Tsuas muaj yuav phem zuj zus ntxiv xwb. Peb paub li ntawd rau qhov phau Vajlugkub qhia tias “cov neeg phem thiab cov neeg txawj dag yuav phem heev zuj zus.”​—2 Timaute 3:13.

2. Tibneeg nyiam tej kev lomzem ua si zoo li cas xwb? (Saib daim duab ntawm sab no.)

² Niaj hnub no muaj ntau yam kev lomzem ua si. Tibneeg nyiam kev plees kev yi, kev sib ntaus sib tua, thiab kev ua dab ua qhua, khawv koob yees siv. Ntau yam hauv Is Taws Nej, hauv this vis (TV), hauv tej yeeb yaj kiab, thiab hauv tej ntaub ntawv ua rau tibneeg xav tias kev sib ntaus sib tua, thiab kev nkauj kev nraug yeej tsis txhaum leejtwg li. Muaj tej yam uas yav thaum ub tej kev lig kevcai txwv tsis pub ua thiab tsis pub saib, tiamsis nimno nyob puag ncig peb lawm. Ua li Yehauvas puas pom zoo muaj tej ntawd? Nws yeej tsis pom zoo kiag li.​—Nyeem Loos 1:28-32.

3. Tibneeg xav li cas txog cov uas coj raws li Vajtswv tej kevcai?

³ Nyob thawj 100 xyoo, tibneeg nyiam saib tej kev sib ntaus sib tua thiab kev nkauj kev nraug kawg li. Tiamsis Yexus cov thwjtim tsis coj li cov neeg ntawd vim lawv xav coj raws li Vajtswv txoj kevcai xwb. Phau Vajlugkub qhia tias lawv tes haujlwm zoo ua rau sawvdaws “phimhwj” kawg li. Tibneeg thiaj thuam cov Khixatia thiab tsim txom lawv heev. (1 Petus 4:4) Niaj hnub no los, thaum peb coj raws li Vajtswv txoj kevcai tibneeg kuj thuam tias peb coj txawv heev. Phau Vajlugkub thiaj ceeb toom tias cov uas xyaum Yexus Khetos tus qauv “yuav raug tsim txom.”​—2 Timaute 3:12.

“QHOV UAS NROG COV NEEG PHEM UA KE YEEJ YUAV RHUAV QHOV UAS YUS UA ZOO”

4. Ua cas tsis zoo rau peb qaug rau lub qab ntuj no?

⁴ Phau Vajlugkub qhia tias yog peb xav ua raws li Vajtswv lub siab nyiam, peb yuav tsum “tsis txhob nyiam kev ntiajteb thiab tej uas nyob hauv ntiajteb.” (Nyeem 1 Yauhas 2:15, 16.) Xatas yog “tus dab uas kav tiam no,” thiab kav tag nrho lub qab ntuj neeg. Nws muab tej kev ntseeg, tej tseem fwv, tej koom haum kev lag kev luam, thiab tej yam tso tawm hauv this vis thiab Is Taws Nej los ntxias tibneeg yuam kev. (2 Khaulee 4:4; 1 Yauhas 5:19) Peb yuav tsum xaiv cov phoojywg zoo, thiab xaiv tej yam zoo los saib thiab los nyeem xwb, peb thiaj tsis raug lub qab ntuj no haub ntxias. Phau Vajlugkub thiaj ceeb toom li no: “Qhov uas nrog cov neeg phem ua ke yeej yuav rhuav qhov uas yus ua zoo.”​—1 Khaulee 15:33.

5, 6. Peb yuav tsum ceev faj cov neeg zoo li cas? Yog vim li cas?

⁵ Yog peb xav nrog Yehauvas sib raug zoo, peb tsis txhob nrog cov uas nyiam ua phem. Muaj ib co ua txuj pe hawm Yehauvas xwb, tiamsis lawv txhob txwm tsis mloog Yehauvas lus. Yog tias cov ntawd lam mus ua txhaum loj, thiab lawv tsis kam ntxeev dua siab tshiab, ces peb yuav txiav kev phoojywg nrog lawv.​—Loos 16:17, 18.

⁶ Peb txhua tus yeej xav kom peb cov phoojywg nyiam thiab ncawg peb, puas yog? Yog peb pheej nrog cov neeg tsis mloog Vajtswv lus ua ke, ces ntev mus ntev tuaj peb yuav tsis mloog Vajtswv lus es lawv thiaj nyiam peb thiab. Yog peb pheej nrog cov neeg nyiam ua nkauj ua nraug, ces tej zaum peb yuav pib nyiam ib yam li lawv thiab. Peb cov kwvtij nkauj muam ib txhia twb ntsib qhov teeb meem no los lawm. Muaj ib txhia tsis kam ntxeev dua siab tshiab, lawv thiaj raug rho tawm hauv lub koom txoos mus. (1 Khaulee 5:11-13) Yog lawv tsis kho lawv lub neej, ces thaum kawg yuav muaj raws li tus tubtxib Petus cov lus hauv 2 Petus tshooj 2.​—Nyeem 2 Petus 2:20-22.

7. Zoo rau peb nrog leejtwg ntaus phoojywg xwb?

⁷ Tsim nyog peb hais lus zoo rau txhua leej txhua tus, tiamsis tsis txhob nrog cov neeg uas tsis coj Vajtswv txoj kevcai ntaus phoojywg. Yog ib tug Timkhawv xav nrhiav txij nkawm, nws yuav tsum nrhiav tus uas twb ua kevcai raus dej lawm thiab npuab siab rau Yehauvas xwb. Nco ntsoov tias qhov uas Yehauvas txaus siab rau peb, zoo dua li cov neeg tsis hlub Yehauvas txaus siab rau peb. Peb yuav tsum nrog cov neeg uas hlub Yehauvas sib raug zoo xwb. Yexus hais tias: “Leejtwg ua raws li Vajtswv lub siab nyiam, tus ntawd yog kuv li kwv, kuv li muam thiab kuv niam.”​—Malakau 3:35.

8. Thaum cov Yixayee nrog cov neeg tsis hlub Yehauvas sib raug zoo, lawv raug teeb meem li cas?

⁸ Yog peb nrog cov uas tsis hlub Yehauvas ua ke ces peb yuav ntsib kev nyuaj siab ntau yam. Xav txog cov Yixayee thaum ub. Thaum lawv tsis tau mus txog lub tebchaws uas Vajtswv cog tseg, Yehauvas twb ceeb toom kom lawv ceev faj cov neeg hauv lub tebchaws ntawd. Nws hais tias: “Tsis txhob pe tsis txhob teev lawv tej dab. Tsis txhob coj raws li lawv tej kevcai dab. Nej yuav tsum muab lawv tej dab mlom rhuav pov tseg thiab muab lawv tej ncej uas teev dab tsoo kom pob tag huvsi. Nej yuav tsum pe hawm [Yehauvas] uas yog nej tus Vajtswv.” (Khiav Dim 23:24, 25) Tiamsis cov Yixayee feem coob tsis mloog Vajtswv lus. (Ntawv Nkauj 106:35-39) Thaum kawg zoo li cas xwb? Yehauvas tsis yuav lawv ua nws haiv neeg lawm. Nws thiaj xaiv lub koom txoos Khixatia los ua nws haiv tibneeg.​—Mathai 23:38; Tubtxib Tes Haujlwm 2:1-4.

NYEEM THIAB SAIB TEJ YAM ZOO XWB

9. Vim li cas peb yuav tsum ceev faj tej yam uas lub qab ntuj no tso tawm?

⁹ Hauv lub qab ntuj no muaj ntau yam tawm hauv this vis, hauv Is Taws Nej, thiab hauv tej ntaub ntawv uas yuav rhuav tau peb txojkev sib raug zoo nrog Yehauvas. Nco ntsoov tias lub qab ntuj txhob txwm tso tawm tej ntawd los ntxias kom peb tso siab rau Xatas lub sim ceeb phem xwb. Tsis yog tso los txhawb kom peb tso siab rau Yehauvas thiab nws tej lus cog tseg. Yog li ntawd, peb yuav tsum ua neeg thoob tsib. Ua ntej peb saib ib zaj yeeb yaj kiab, mloog ib zaj nkauj, lossis nyeem ib phau ntawv twg, ua tib zoo xav seb yam ntawd puas ua rau yus muaj “tej kev ntshaw uas yog ntiajteb li.”​—Titau 2:12.

10. Yuav ua li cas rau ib puas tsav yam hauv Xatas lub qab ntuj?

¹⁰ Tshuav tsis ntev xwb ib puas tsav yam hauv Xatas lub qab ntuj yuav raug rhuav tshem. Phau Vajlugkub hais tias: “Lub ntiajteb thiab tej uas lub ntiajteb ntshaw yuav dua mus, tiamsis tus uas ua raws li Vajtswv lub siab nyiam yuav nyob mus ib txhis.” (1 Yauhas 2:17) Tus sau zaj nkauj kuj hais li no: “Cov neeg limhiam yuav raug muab txiav tawm mus.” Nws hais ntxiv tias: “Cov uas txo hwjchim yuav tau lub tebchaws ua lawv teej lawv tug, thiab lawv yuav zoo siab xyiv fab rau qhov uas lawv vam meej nplua mias.” Lawv yuav tau nyob hauv lub tebchaws lossis lub ntiajteb ntev npaum li cas? Nws hais tias: “Cov ncaj ncees yuav tau lub tebchaws ua lawv teej lawv tug, thiab tau nyob rau hauv mus ib txhis.”​—Ntawv Nkauj 37:9, 11, 29.

11. Vajtswv pab kom peb muab siab npuab nws li cas?

¹¹ Yehauvas lub koom haum tsis thooj li Xatas lub qab ntuj. Lub koom haum qhia peb taug txojkev mus rau txojsia ib txhis tsis kawg. Yexus thov Vajtswv li no: “Txojsia ib txhis tsis kawg yog li no, yog qhov uas lawv paub koj uas yog tus Vajtswv tib leeg uas yog tus tseem Tswv thiab paub Yexus Khetos uas koj txib los.” (Yauhas 17:3) Yehauvas lub koom haum npaj tej ntaub ntawv, tej yeeb yaj kiab thiab lub Vej xaij los pab peb xwv peb thiaj paub Yehauvas zoo thiab paub teev tiam nws. Nws lub koom haum npaj ntau txojkev sib txoos rau peb. Muaj tshaj li 110,000 lub koom txoos thoob ntiajteb. Thaum peb mus kev sib txoos thiab mus cov rooj sib txoos loj, peb kawm tau ntau yam uas txhawb peb txojkev ntseeg rau Yehauvas thiab kom peb hajyam tso siab rau nws tej lus cog tseg.​—Henplais 10:24, 25.

YUAV TUS “UAS NTSEEG TUS TSWV” XWB

12. Phau Vajlugkub lo lus sam hwm kom yuav tus “uas ntseeg tus Tswv” xwb txhais li cas?

¹² Cov Khixatia uas xav nrhiav txij nkawm yuav tsum ua tib zoo xaiv lawv cov phoojywg. Vajtswv Txojlus ceeb toom peb li no: “Tsis txhob nrog tus uas tsis ntseeg koom ib tug quab. Rau qhov txojkev ncaj ncees yuav koom nrog txojkev tsis ncaj tau li cas? Thiab qhov kaj yuav koom nrog qhov tsaus ntuj tau li cas?” (2 Khaulee 6:14) Phau Vajlugkub qhia kom Vajtswv cov tub qhe yuav tus “uas ntseeg tus Tswv” xwb. Yog li ntawd, lawv yuav tsum nrhiav tus uas coj raws li Yehauvas tej kevcai, uas twb muab nws tus kheej cob rau Yehauvas thiab ua kevcai raus dej lawm xwb. (1 Khaulee 7:39) Yog lawv yuav ib tug uas hlub Yehauvas, ces lawv tus txij nkawm yuav txhawb tau lawv muab siab npuab Vajtswv Yehauvas mus li.

13. Vajtswv sam hwm kom cov Yixayee txhob ua dabtsi?

¹³ Yehauvas yeej xav kom peb tau zoo xwb nws thiaj sam hwm kom peb yuav tus “uas ntseeg tus Tswv” xwb. Yav thaum ub Yehauvas kuj sam hwm kom nws haiv neeg Yixayee ceev faj li no thiab. Nws qhia kom Mauxe cob lawv li no: “Tsis txhob nrog lawv ua tshoob ua kos, tsis txhob muab nej tej ntxhais qua rau lawv tej tub thiab tsis txhob yuav lawv tej ntxhais rau nej tej tub. Rau qhov lawv yuav ua rau nej tej tub tso kuv tseg mus ua koom tu luag tej dab. Mas [Yehauvas] yuav npau taws rau nej thiab ua kom nej puam tsuaj sai sai.”​—Kevcai 7:3, 4.

14, 15. Thaum Xalaumoo hla Yehauvas cov lus sam hwm, ua li cas rau nws lawd?

¹⁴ Thaum Xalaumoo tau ua vajntxwv, nws thov kom Yehauvas pub tswvyim rau nws kav cov Yixayee. Yehauvas zoo siab hlo tsav tswvyim rau Xalaumoo. Xalaumoo thiaj nto moo heev, thiab nws lub npe nrov ncha moo lug thoob tebchaws. Tus poj vaj hauv Senpa thiaj qhuas Xalaumoo li no: “Koj lub tswvyim thiab koj tej kev vam meej ntawd yeej ntau dua tej uas kuv tau hnov lawd.” (1 Vajntxwv 10:7) Tiamsis tom qab no Xalaumoo hla Vajtswv txoj kevcai mus yuav cov pojniam uas tsis teev tiam Yehauvas.​—Laj Lim Tswvim 4:13.

¹⁵ Txawm tias Yehauvas twb foom koob hmoov nplua mias rau Xalaumoo los nws tseem hla Yehauvas txoj kevcai thiab. Phau Vajlugkub qhia tias Xalaumoo “nyiam lwm haiv neeg tej ntxhais ntau leej” uas tsis teev tiam Yehauvas. Thaum kawg nws yuav tau 700 tus niam yau thiab 300 tug hluas nkauj. Thaum Xalaumoo laus lawd, nws cov pojniam “haub nws mus ua koom tu luag tej dab.’’ Thaum kawg “Xalaumoo thiaj ua tej uas [Yehauvas] pom tias phem kawg li.” (1 Vajntxwv 11:1-6) Twb yog Xalaumoo nrog cov neeg uas tsis pe hawm Yehauvas ua ke, nws thiaj tsis npuab siab rau Yehauvas lawm. Yog tias ib tug neeg muaj tswvyim npaum li Xalaumoo twb qaug, ces peb yuav tsum ceev faj tiag tiag. Txhob cia yus lub siab qaug rau tus neeg uas tsis hlub Yehauvas!

16. Yog tias ib tug txij nkawm tsis ntseeg Yehauvas, phau Vajlugkub qhia kom tus Timkhawv coj li cas?

¹⁶ Muaj tej tug Timkhawv ib leeg los ntseeg Yehauvas xwb, tiamsis lawv tus txij nkawm tsis los. Txawm li ntawd los phau Vajlugkub qhia kom lawv xyaum li no: “Nej cov pojniam kuj ib yam nkaus, nej yuav tsum nyob hauv nej tus txiv qab kev tswjhwm. Txawm yog cov txiv qee leej tsis ntseeg Vajtswv txojlus los qhov uas cov pojniam xyaum zoo yuav coj tau cov txiv los ntseeg tsis txog hais ib los li.” (1 Petus 3:1) Nqe no kuj pab tau cov txiv tsev uas tus pojniam tsis ntseeg Yehauvas thiab. Vajtswv Txojlus yeej qhia meej kom cov Timkhawv ua ib tug qauv zoo, thiab kom tej niam txiv sib hlub sib hwm raws li Vajtswv txoj kevcai. Yog tias cov Timkhawv xyaum zoo li ntawd, tej zaum lawv tus txij nkawm yuav xav los paub Yehauvas thiab. Muaj coob tus twb pab tau lawv tus txij nkawm los ntseeg lawm.

NROG COV UAS HLUB YEHAUVAS UA KE

17, 18. (1) Thaum dej dag nyab ntiajteb, ua cas Nau-a thiaj dim? (2) Thaum Yeluxalees raug puam tsuaj, ua cas cov Khixatia thiaj dim?

¹⁷ Yog peb nrog cov neeg phem ua ke, ces lawv yuav haub peb mus hla Yehauvas txoj kevcai. Tiamsis cov neeg zoo pab tau kom peb muab siab npuab Yehauvas. Nau-a tseg tus qauv zoo heev rau peb. Phau Vajlugkub qhia tias tiam Nau-a nyob “kev phem loj kawg rau hauv lub ntiajteb, thiab pom tias [tibneeg] tsuas yog pheej xav zaj phem rau hauv lub siab mus li xwb.” (Chiv Keeb 6:5) Twb yog vim li ntawd, Yehauvas thiaj txiav txim siab muab tiam neeg ntawd rhuav tshem tibsi. Nau-a tsis coj li cov tibneeg phem ntawd. Phau Vajlugkub qhia tias Nau-a yog ib tug neeg “ncaj ncees” uas “nrog nraim Vajtswv.”​—Chiv Keeb 6:7-9.

¹⁸ Nau-a tsis nrog cov neeg tsis hlub Yehauvas ua ke. Tiamsis Nau-a nrog nws pojniam tub nyab sib raug zoo. Lawv sib pab nroos txua lub nkoj. Phau Vajlugkub qhia tias Nau-a kuj “tshaj tawm txojkev ncaj ncees” rau sawvdaws hnov thiab. (2 Petus 2:5) Nau-a tsev neeg rau siab ntso ua tej yam uas haum Vajtswv siab, thaum dej dag nyab ntiajteb lawv thiaj tau dim. Peb sawvdaws yog lawv cov xeeb ntxwv. Tsim nyog peb nco txiaj ntsig tias Nau-a tsev neeg mloog Yehauvas lus thiab txav deb ntawm cov neeg uas tsis hlub Yehauvas. Puag tom qab no, tiam thawj 100 xyoo cov Khixatia coj ib yam li Nau-a. Lawv tsis kam nrog cov neeg uas tsis hlub Yehauvas ua ke. Lawv mloog Yehauvas lus lawv thiaj dim thaum Yeluxalees raug puam tsuaj xyoo 70 T.Q.Y.​—Luka 21:20-22.

19. Peb yuav tsum nrog leejtwg sib raug zoo peb thiaj muab siab npuab Yehauvas?

¹⁹ Nau-a tsev neeg thiab cov Khixatia nyob thawj 100 xyoo yeej tsis kam nrog cov uas tsis hlub Yehauvas ua ke. Ua li, peb yuav nrog leejtwg ntaus phoojywg xwb? Nco ntsoov tias peb muaj cov kwvtij nkauj muam coob heev nyob thoob ntiajteb, uas hlub Vajtswv Yehauvas. Cia peb nrog lawv sib raug zoo. Nyob tiam kawg no, lawv yog cov uas yuav txhawb kom peb “nyob ruaj hauv txojkev ntseeg.” (1 Khaulee 16:13; Paj Lug 13:20) Xav seb thaum peb thev dhau lub qab ntuj phem no es mus nyob rau hauv Vajtswv Yehauvas lub qab ntuj tshiab lawm, peb yuav zoo siab xyiv fab npaum li cas tiag! Cia peb txav deb ntawm cov neeg uas tsis hlub Yehauvas tamsim no.